কেৰালাৰ প্ৰাক্তন মুখ্যমন্ত্ৰী পিনাৰায় বিজয়নৰ ঘৰত বলবৎকাৰী সঞ্চালকালয় চমুকৈ ইডিৰ তালাচী অভিযান (ED Raid) । জানিব পৰা মতে, ‘কোচিন মিনাৰেলছ এণ্ড ৰুটাইল লিমিটেড’ৰ সৈতে জড়িত দুৰ্নীতিৰ গোচৰৰ ভিত্তিত এই তালাচী চলোৱা হৈছে। এই গোচৰৰ সৈতে জড়িত বিজয়নৰ কন্যা। কেৱল বিজয়নৰ ঘৰতে নহয়, ইডিয়ে এই গোচৰত সমগ্ৰ কেৰালাৰ আন ৯টা স্থানত তালাচী চলাইছে।
ইডিৰ বিষয়াসকলৰ উদ্ধৃতি দি এএনআয়ে প্ৰকাশ কৰা অনুসৰি, এই তালাচী ‘কোচিন মিনাৰেলছ এণ্ড ৰুটাইল লিমিটেড’ আৰু বিজয়নৰ কন্যা টি বীনাৰ কোম্পানী ‘এক্সেলজিক ছলিউচনছ প্ৰাইভেট লিমিটেড’ৰ বিৰুদ্ধে উত্থাপিত আৰ্থিক অনিয়মৰ অভিযোগৰ অংশ। ঔদ্যোগিক ৰাসায়নিক পদাৰ্থ উৎপাদন কৰা কেৰালাৰ কোম্পানী ‘কোচিন মিনাৰেলছ এণ্ড ৰুটাইল লিমিটেড’ৰ বিৰুদ্ধে উৎকোচ আৰু ধন সৰবৰাহৰ অভিযোগত তদন্ত চলি আছে।
অভিযোগ অনুসৰি, বিজয়নৰ কন্যাৰ কোম্পানীটোৱে কোনো ধৰণৰ সেৱা আগনবঢ়োৱাকৈ ‘কোচিন মিনাৰেলছ এণ্ড ৰুটিল লিমিটেড’ৰ পৰা বিপুল পৰিমাণৰ ধন লৈছিল। অৱশ্যে এই গোচৰত অভিযুক্ত হিচাপে বিজয়নৰ নাম পোনপটীয়াকৈ উল্লেখ কৰা হোৱা নাই।
২০২৩ চনৰ আগষ্ট মাহত প্ৰথম অভিযোগ পোহৰলৈ আহিছিল।সেই সময়ত ‘এক্সেলজিক ছলিউচনছ প্ৰাইভেট লিমিটেড’এ ২০১৭ চনৰ পৰা ২০২০ চনৰ ভিতৰত কোনো ধৰণৰ সেৱা প্ৰদান নকৰাকৈ ‘এক্সেলজিক ছলিউচনছ প্ৰাইভেট লিমিটেড’ৰ পৰা ১.৭২ কোটি টকা লাভ কৰা বুলি দাবী কৰা হৈছিল।
২০২৫ চনৰ এপ্ৰিল মাহত কেন্দ্ৰীয় কৰ্প’ৰেট পৰিক্ৰমা মন্ত্ৰালয়ে বিজয়নৰ কন্যাৰ বিৰুদ্ধে অবৈধ ধন দিয়াৰ অভিযোগত গোচৰ ৰুজু কৰাৰ অনুমতি দিছিল। এছ এফ আই অ’ই তেওঁলোকৰ অভিযোগনামাত বীনা আৰু ‘কোচিন মিনাৰেলছ এণ্ড ৰুটিল লিমিটেড’ৰ সঞ্চালক শশীধৰণকে ধৰি ২৭জন লোকক অভিযুক্ত হিচাপে উল্লেখ কৰিছে।
কেৱল সেয়াই নহয়, চাৰ্জশ্বীটত কেইবাটাও কোম্পানীৰ কথাও উল্লেখ কৰা হৈছিল। কোম্পানী আইনৰ ৪৪৭ ধাৰাত বীনাৰ বিৰুদ্ধে অভিযোগ উত্থাপন কৰা হৈছে। এই অভিযোগত দোষী সাব্যস্ত হ’লে ব্যক্তিজন ছমাহৰ পৰা ১০ বছৰৰ কাৰাদণ্ডৰ সন্মুখীন হ’ব পাৰে। ইয়াৰ উপৰি অভিযুক্তই প্ৰৱঞ্চনাৰ সৈতে জড়িত ধনৰ তিনিগুণ ধন দিব লাগিব।
