প্ৰধানমন্ত্ৰী নৰেন্দ্ৰ মোদীয়ে (pM Modi Rome Visit) পাঁচখন দেশ ভ্ৰমণৰ অন্তিম পৰ্যায়ত মঙলবাৰে ইটালীত উপস্থিত হয়। ৰোমৰ ঐতিহাসিক কল’ছিয়ামত ইটালীৰ প্ৰধানমন্ত্ৰী জৰ্জিয়া মেল’নীয়ে মোদীক উষ্ম আদৰণি জনায়।
কল’ছিয়ামৰ গেলেৰীত তেওঁৰ সৈতে তোলা এখন ছবি ছ’চিয়েল মিডিয়াত পোষ্ট কৰি মেল’নীয়ে মোদীক ‘বন্ধু’ বুলি সম্বোধন কৰে। তেওঁৰ এক্স হেণ্ডেলত লিখিছে, “ৰোমলৈ স্বাগতম, মোৰ বন্ধু।” নৰৱে, ছুইডেন, নেদাৰলেণ্ড আৰু সংযুক্ত আৰব আমিৰশ্বাহী ভ্ৰমণ কৰি ভ্ৰমণৰ পঞ্চম আৰু অন্তিম লেগত ইটালীত ভৰি দিয়ে মোদীয়ে।
বৰ্তমান ভাৰত আৰু ইটালীৰ মাজত দ্বিপাক্ষিক সম্পৰ্ক যথেষ্ট শক্তিশালী। ‘যৌথ কৌশলগত কাৰ্যপৰিকল্পনা ২০২৫-২০২৯’ অনুসৰি দুয়োখন দেশে বাণিজ্য, বিনিয়োগ, প্ৰতিৰক্ষা, স্বচ্ছ শক্তি আৰু প্ৰযুক্তিৰ দৰে একাধিক ক্ষেত্ৰত একেলগে কাম কৰি আছে।
একাধিক সংবাদ মাধ্যমৰ সূত্ৰ অনুসৰি, ২০২৫ চনত দুয়োখন দেশৰ মাজত বাণিজ্য ১৬.৭৭ বিলিয়ন ডলাৰ আছিল। ২০০০ চনৰ পৰা ২০২৫ চনৰ ভিতৰত ভাৰতত ইটালীৰ মুঠ বিনিয়োগ আছিল প্ৰায় ৩.৬৬ বিলিয়ন ডলাৰ।
এই ভ্ৰমণ সন্দৰ্ভত মোদীয়ে কয় যে তেওঁৰ মূল লক্ষ্য হৈছে ভাৰত আৰু ইটালীৰ মাজৰ সম্পৰ্ক আৰু অধিক সুদৃঢ় কৰা।
এই ভ্ৰমণৰ সময়ত তেওঁ ইটালীৰ ৰাষ্ট্ৰপতি চাৰ্জিঅ’ মাটাৰেলা আৰু প্ৰধানমন্ত্ৰী জৰ্জিয়া মেল’নীৰ সৈতে বৈঠকত মিলিত হ’ব। জানিব পৰা মতে, ইয়াৰ উপৰি তেওঁ ৰাষ্ট্ৰসংঘৰ খাদ্য আৰু কৃষি সংস্থাৰ মুখ্য কাৰ্যালয়ত উপস্থিত হৈ বিশ্ব খাদ্য সুৰক্ষাৰ প্ৰতি ভাৰতৰ দায়বদ্ধতাক উজ্জ্বল কৰি তুলিব।
এক বাৰ্তাত প্ৰধানমন্ত্ৰীয়ে কয়, “মই ৰোমত উপস্থিত হৈছোঁ। ৰাষ্ট্ৰপতি আৰু প্ৰধানমন্ত্ৰীৰ সৈতে মোৰ দ্বিপাক্ষিক বৈঠক হ’ব। এই ভ্ৰমণৰ সময়ত ভাৰত-ইটালীৰ সম্পৰ্কৰ লগতে ‘ভাৰত-পশ্চিম এছিয়া-ইউৰোপ অৰ্থনৈতিক কৰিড’ৰ’ৰ (আইএমইচি) ওপৰত বিশেষ গুৰুত্ব দিয়া হ’ব। ইয়াৰ লগতে দুয়োখন দেশৰ যৌথ কাৰ্য্য পৰিকল্পনাও পৰ্যালোচনা কৰা হ’ব।”
ইয়াৰ পূৰ্বে প্ৰধানমন্ত্ৰী মোদীক ৰোম বিমানবন্দৰত উপস্থিত হোৱাৰ লগে লগে ইটালীৰ উপ-প্ৰধানমন্ত্ৰী এণ্টনিঅ’ তাজানীয়ে আদৰণি জনায়। তাত থকা প্ৰবাসী ভাৰতীয়সকলৰ সৈতেও তেওঁ মত বিনিময় কৰে। পিছত হোটেলত উপস্থিত হোৱাৰ লগে লগে তেওঁৰ সন্মানত শাস্ত্ৰীয় নৃত্য আৰু গীতৰ বিশেষ সাংস্কৃতিক অনুষ্ঠানৰ আয়োজন কৰা হয়।
