গৰুৰ গাখীৰত সোণ (Gold in cow’s milk) থকাৰ দাবী বা ‘দেশী গৰু আই, জাৰ্চি গৰু মাহীআই’ বুলি গোমাতাৰ ওপৰত কৰা মন্তব্যক লৈ বিতৰ্কৰ মাজতো দিলীপ ঘোষে (Dilip Ghosh) নিজৰ স্থিতিত অটল আছে। এইবাৰ মন্ত্ৰী দিলীপ ঘোষে কয় যে ৰক্তচাপ স্বাভাৱিক কৰি ৰখাতো গৰু উপযোগী। গৰু এটাক পোহপাল দিলে উচ্চ ৰক্তচাপ (High blood pressure) হ্ৰাস পায়।
মঙলবাৰে ৰাজ্যৰ পঞ্চায়ত, পশুধন আৰু কৃষি বিপণন মন্ত্ৰীগৰাকীয়ে উত্তৰ কলকাতাৰ কংকুৰগাছিত এক চাহমেলত অংশগ্ৰহণ কৰি গৰুৰ উপকাৰিতাৰ বিষয়ে কয়, “গৰু এটাক মৰম-আদৰ কৰিলে ৰক্তচাপ হ্ৰাস পাব পাৰে।” লগতে কয়, “গৰুটোৰ ডিঙিত বা পিঠিত হাত বুলাই দিলে ৰক্তচাপ সোনকালে কমি যায়।”
কেইবছৰমান পূৰ্বে মধ্যপ্ৰদেশৰ বিজেপিৰ প্ৰাক্তন সাংসদ প্ৰজ্ঞা সিং ঠাকুৰেও একেই দাবী কৰিছিল। তেওঁ কৈছিল, “গৰুৰ পিছফালৰ পৰা ডিঙিলৈকে মালিচ কৰিলে ৰক্তচাপ ভাল হ’ব পাৰে।” মঙলবাৰে দিলীপ ঘোষে কয় যে গৰুৰ গোবৰৰ ৰোগ নিৰাময়ৰ শক্তিও আছে। তেওঁৰ এজন আত্মীয়ৰ উদাহৰণ দি মন্তব্য কৰে, “শৰীৰৰ ফুলা অংশত গৰুৰ গোবৰ লগোৱাৰ পিছত ৰোগটো কমি যায়।”
উল্লেখ্য যে ২০১৯ চনত বিজেপিৰ তদানীন্তন ৰাজ্যিক সভাপতি দিলীপ ঘোষে কৈছিল যে গৰুৰ গাখীৰত সোণ থাকে। ২০১৯ চনত বুৰ্দৱানত এখন ৰাজহুৱা সভাত তেওঁ দাবী কৰিছিল যে দেশীয় গৰুৰ কুঁজত এক প্ৰকাৰৰ সোণালী দালি থাকে, যাৰ সহায়ত গৰুটোৱে সূৰ্যৰ পোহৰৰ পৰা সোণ তৈয়াৰ কৰিব পাৰে। গতিকে দেশীয় গৰুৰ গাখীৰত সোণৰ দৰে উপাদান বা হালধীয়া ৰং থাকে। তেওঁ কয় যে কৰোনাকালত গৰুৰ প্ৰস্ৰাৱ পানীৰ লগত মিহলাই শৰীৰৰ ৰোগ প্ৰতিৰোধ ক্ষমতা বৃদ্ধি কৰিব লাগে। এই সন্দৰ্ভত বহু আলোচনা আৰু বিতৰ্ক চলিছিল। কিন্তু তেওঁৰ প্ৰত্যাক্ৰমণ আছিল, “মই গৰুৰ কথা ক’লে বহুতে অস্বস্তি অনুভৱ কৰে। আচলতে গাধ এটাই কেতিয়াও গৰুৰ সাৰমৰ্ম বুজি নাপাব।” মঙলবাৰে তেওঁ কয় যে দুগ্ধ উদ্যোগৰ সৈতে জড়িত ব্যৱসায়ী আৰু গো-শালাৰ মালিকসকলৰ সৈতে বৈঠকত মিলিত হ’ব। তাৰ পূৰ্বে মন্ত্ৰীগৰাকীয়ে গৰুৰ গুণগত মানৰ বিষয়ে বুজাই দিয়ে।
