জৱাহৰলাল নেহৰু বিশ্ববিদ্যালয়ৰ প্ৰাক্তন ছাত্ৰ নেতা ওমৰ খালিদ আৰু শ্বাৰ্জিল ইমামৰ জামিন আবেদনৰ সন্দৰ্ভত সোমবাৰে উচ্চতম ন্যায়ালয়ে (Supreme Court of India) দিয়া ৰায়ক সমালোচনা কৰে।
সোমবাৰে উচ্চতম ন্যায়ালয়ে সোঁৱৰাই দিয়ে যে জামিনো ইউএপিএ (অবৈধ কাৰ্যকলাপ প্ৰতিৰোধ আইন)ৰ অধীনত এক নিয়ম। ২০২১ চনৰ এটা গোচৰত উচ্চতম ন্যায়ালয়ৰ ৰায়ৰ কথা উল্লেখ কৰি ন্যায়াধীশ বি ভি নাগাৰত্ন আৰু উজ্জ্বল ভুৱনৰ বিচাৰপীঠে সোমবাৰে কয় যে ওমৰৰ গোচৰত এই নিয়ম সঠিকভাৱে পালন কৰা হোৱা নাছিল।
চলিত বৰ্ষৰ ৫ জানুৱাৰীত উচ্চতম ন্যায়ালয়ে দিল্লী সাম্প্ৰদায়িক হিংসা গোচৰৰ ইউএপিএ গোচৰৰ অভিযুক্ত ওমৰ আৰু শ্বাৰ্জিলৰ জামিন আবেদন নাকচ কৰিছিল। আনহাতে, উচচতম ন্যায়ালয়ে একেটা গোচৰৰ আন পাঁচজন অভিযুক্ত গুলফিছা ফাতিমা, মীৰাণ হাইদৰ, শ্বিফা-উৰ-ৰেহমান, মহম্মদ ছাকিল খান আৰু ছাদাব আহমেদক জামিন মঞ্জুৰ কৰিছিল।
১৬ এপ্ৰিলত উচ্চতম ন্যায়ালয়ৰ ন্যায়াধীশ অৰবিন্দ কুমাৰ আৰু এন ভি অঞ্জৰিয়াকৰ বিচাৰপীঠে কৈছিল যে পৰ্যালোচনা আবেদন আৰু সংলগ্ন নথি-পত্ৰসমূহ পৰ্যালোচনা কৰাৰ পিছত বিচাৰপীঠে ২০২৬ চনৰ ৫ জানুৱাৰী তাৰিখৰ ৰায় পুনৰীক্ষণৰ কোনো উপযুক্ত ভিত্তি আৰু কাৰণ বিচাৰি পোৱা নাই। ফলত পুনৰীক্ষণ আবেদন খাৰিজ কৰা হয়।
কিন্তু সোমবাৰে ন্যায়াধীশ নাগাৰত্ন আৰু ভুৱনৰ বিচাৰপীঠে পূৰ্বৰ নিৰ্দেশক সমালোচনা কৰে। উল্লেখ্য যে ২০২১ চনত উচ্চতম ন্যায়ালয়ৰ তিনিজনীয়া বিচাৰপীঠে ৰায় দিছিল যে যদিহে ইউএপিএৰ অধীনত গ্ৰেপ্তাৰৰ বিচাৰ প্ৰক্ৰিয়াত যথেষ্ট পলম হয় তেন্তে অভিযুক্তক জামিন প্ৰদান কৰিব লাগে।
কিন্তু জম্মু-কাশ্মীৰৰ বাসিন্দা চৈয়দ ইফতিখাৰ আন্দ্ৰবীক এন আই এৰ তদন্তত চলি থকা ড্ৰাগছ-টেৰ’ৰ গোচৰত জামিন প্ৰদান কৰাৰ সময়ত ন্যায়াধীশ নাগাৰত্ন আৰু ভুৱনৰ বিচাৰপীঠে ওমৰৰ পুনৰীক্ষণ আবেদনত ২০২১ চনৰ ৰায় অনুসৰণ কৰা হোৱা নাছিল বুলি কয়।
দিল্লী হিংসাৰ গোচৰত ২০২০ চনৰ পৰা কাৰাগাৰত বন্দী হৈ আছে জৱাহৰলাল নেহৰু বিশ্ববিদ্যালয়ৰ প্ৰাক্তন ছাত্ৰ নেতা ওমৰ আৰু শ্বাৰ্জিল।
জানুৱাৰী মাহত উচ্চতম ন্যায়ালয়ে তেওঁলোকৰ জামিন আবেদন নাকচ কৰাৰ পিছত অৱসৰপ্ৰাপ্ত মুখ্য ন্যায়াধীশ ডি ৱাই চন্দ্ৰচুড়ে কৈছিল, “দোষী সাব্যস্ত হোৱাৰ পূৰ্বে জামিন সকলোৰে অধিকাৰ। কাৰণ আমাৰ আইনখন নিৰ্দোষিতাৰ অনুমানৰ ওপৰত নিৰ্মিত। বিচাৰত দোষী সাব্যস্ত নোহোৱালৈকে প্ৰতিজন অভিযুক্ত নিৰ্দোষী। যদি কোনোবাই পাঁচৰ পৰা সাত বছৰ বিচাৰাধীন বন্দী হিচাপে জে’ল খাটে আৰু পিছত নিৰ্দোষী বুলি প্ৰমাণিত হয়, তেন্তে সেই হেৰুওৱা সময়ৰ ক্ষতিৰ পৰিমাণ পূৰণ কৰিব নোৱাৰি।”
