সদয় সমাপ্ত অসম বিধানসভা নিৰ্বাচন (Assam Legislative Assembly Election)ত চমকপ্ৰদ সফলতাৰে পুনৰ শাসনৰ বাঘজৰী ধৰি ৰাখিছে বিজেপি নেতৃত্বাধীন মিত্ৰজোঁটে (BJP-led alliance)। ইয়াৰ বিপৰীতে একপ্ৰকাৰ ধূলিসাৎ হৈছে বিৰোধী মিত্ৰজোঁট। আনকি বিধানসভাত বিৰোধীৰ আসন (Opposition seats in the legislative assembly)ত বহিব পৰাকৈয়ো আসন সংখ্যা লাভ কৰা নাই কোনো এটা বিৰোধী দলে। ফলত আগন্তুক অসম বিধানসভাত বিৰোধী দলপতি নথকাৰ সম্ভাৱনা প্ৰকট হৈ পৰিছে। উল্লেখ্য যে সোমবাৰে প্ৰকাশিত অসম বিধানসভা নিৰ্বাচনৰ ফলাফল অনুসৰি, বিজেপিয়ে ৮২ খন আসন, কংগ্ৰেছে ১৯ খন, বিপিএফে ১০ খন, অসম গণ পৰিষদে ১০ খন, এআইইউডিএফে ২ খন, ৰাইজৰ দলে ২ খন আৰু তৃণমূল কংগ্ৰেছে এখন আসন লাভ কৰিবলৈ সক্ষম হৈছে।
ইতিমধ্যে বিজেপিয়ে অকলে ১২৬ জনীয়া অসম বিধানসভাত চৰকাৰ গঠনৰ বাবে যি যোগ্য়তা সেয়া অৰ্জন কৰিছে যদিও নিৰ্বাচনৰ পূৰ্বৰ মিত্ৰতা অনুসৰি অসম গণ পৰিষদ আৰু বিপিএফ চৰকাৰৰ অংশীদাৰ হ’ব। কিন্তু গুৰুত্বপূৰ্ণ কথাটো হৈছে যে এইবাৰ অসম বিধানসভাত বিৰোধীৰ আসনত কংগ্ৰেছ, এআইইউডিএফ, ৰাইজৰ দল আৰু তৃণমূল কংগ্ৰেছ থাকিব যদিও বিৰোধী দলপতি হয়তো কোনো নাথাকিব।
কিয়নো বিধানসভাৰ প্ৰচলিত নিয়ম অনুসৰি কোনো এটা বিৰোধী দলে যদি বিধানসভাৰ মুঠ আসনৰ ন্যূনতম এক ষষ্ঠাংশ আসন লাভ কৰে তেতিয়াহে বিৰোধী দলপতিৰ আসন লাভ কৰিব পাৰে। সেই অনুসৰি বিৰোধী দলপতিৰ আসন লাভ কৰিবৰ বাবে কোনো এটা বিৰোধী দলক সৰ্বনিম্ন ২১ খন আসনৰ প্ৰয়োজন। কিন্তু কংগ্ৰেছে সৰ্বাধিক ১৯ খন আসনহে লাভ কৰিছে। সেয়ে আগন্তুক বিধানসভাত বিৰোধী দলপতিৰ আসনখন শূন্য হৈ থাকিব নেকি তাক লৈ এতিয়া চৰ্চা চলিছে।
