উচ্চতম ন্যায়ালয়ে (Suprem Court) বৃহস্পতিবাৰে কংগ্ৰেছ নেতা (Congress leader) পৱন খেৰা (Pawan Khera)ৰ অন্তৰ্ৱৰ্তীকালীন জামিন নাকচ কৰাৰ নিৰ্দেশ দিয়াৰ পিছত তেওঁ পুনৰ উচ্চতম ন্যায়ালয়ত আবেদন জনাইছিল। তেওঁৰ আবেদন আছিল যে জামিনৰ সময়সীমা অন্ততঃ অহা মঙলবাৰলৈকে বৃদ্ধি কৰিব লাগে। তেওঁ কিয় এই আবেদন কৰিছে তাৰ কাৰণো উল্লেখ কৰে। কিন্তু কাম নহ’ল। অসমৰ মুখ্যমন্ত্ৰী হিমন্ত বিশ্ব শৰ্মাৰ পত্নী ৰিণিকি ভূঞা শৰ্মাই দাখিল কৰা মানহানিৰ গোচৰত পৱন খেৰাৰ আবেদন উচ্চতম ন্যায়ালয়ে খাৰিজ কৰে। শীৰ্ষ ন্যায়ালয়ত খেৰাৰ আবেদন আছিল যে তেওঁৰ জামিনৰ সময়সীমা মঙলবাৰলৈ বৃদ্ধি কৰিব লাগে। কাৰণ অসমৰ আদালত সম্প্ৰতি বন্ধ।
আদালত খোলাৰ লগে লগে তেওঁ তাত আবেদন কৰিব। অৱশ্যে উচ্চতম ন্যায়ালয়ে কয় যে আগতীয়াকৈ জামিন আবেদন অসমৰ সংশ্লিষ্ট আদালতত দাখিল কৰিব লাগে। নথি-পত্ৰ আৰু তথ্য পৰীক্ষা কৰি অসমৰ আদালতে স্বতন্ত্ৰভাৱে নিৰ্দেশ দিব বুলিও আদালতে স্পষ্ট কৰি দিয়ে। উচ্চতম ন্যায়ালয়ৰ পূৰ্বৰ কোনো পৰ্যবেক্ষণৰ দ্বাৰা ইয়াত প্ৰভাৱ নপৰে বুলিও কয়। উচ্চতম ন্যায়ালয়ত পৱন খেৰাৰ হৈ যুক্তি আগবঢ়ায় অধিবক্তা অভিষেক মনু সিংভীয়ে। তেওঁৰ জৰিয়তে আদালতত পৱন খেৰাৰ প্ৰশ্ন, “মই এজন কুখ্যাত অপৰাধী নেকি, যিয়ে এই সামান্য সুবিধা নাপাম?”
তেওঁ লগতে কয় যে তেওঁৰ ক্লায়েণ্টে দাখিল কৰা নথি-পত্ৰত কিছু ভুল হৈছে। ইয়াৰ বাবেই শীৰ্ষ আদালতে তেলেংগানা উচ্চ ন্যায়ালয়ে প্ৰদান কৰা আগতীয়া জামিন নাকচ কৰে। পৱন খেৰাৰ মতে, “খৰখেদাকৈ তেলেংগানা আদালতত আবেদন দাখিল কৰা হয়। অৱশ্যে প্ৰশ্নোত্তৰৰ সময়ত এই বিষয়টো উত্থাপন কৰা হয়। পিছত শুদ্ধ নথি-পত্ৰও দাখিল কৰা হয়।” পৱন খেৰাৰ অধিবক্তাই দাবী কৰে যে তেওঁলোকে কোনো ধৰণৰ প্ৰৱঞ্চনা কৰা নাই। প্ৰকৃত ভুল আছিল। সেই ‘সৰু ভুল’ৰ বাবে ব্যক্তিগত স্বাধীনতা কৰ্তন কৰা উচিত নহয়।
উল্লেখ্য যে পৱন খেৰাৰ এক মন্তব্যৰ পৰাই বিতৰ্ক আৰম্ভ হয়। যোৱা দেওবাৰে দিল্লীত এক সংবাদমেলত কংগ্ৰেছৰ জনসংযোগ বিভাগৰ অধ্যক্ষগৰাকীয়ে অভিযোগ কৰিছিল যে অসমৰ মুখ্যমন্ত্ৰীৰ পত্নীৰ তিনিখন বিদেশী পাছপ’ৰ্ট, ডুবাইত সম্পত্তি আৰু আমেৰিকাত কোম্পানীত বৃহৎ বিনিয়োগ আছে। উক্ত মন্তব্যৰ পিছতে ৰিণিকি ভূঞা শৰ্মাই মানহানিৰ গোচৰ তৰে। ইয়াৰ পিছত পৱন খেৰাই তেলেংগানা উচ্চ ন্যায়ালয়ৰ কাষ চাপিছিল। ১০ এপ্ৰিলত তেলেংগানা উচ্চ ন্যায়ালয়ে তেওঁৰ আবেদনৰ ভিত্তিত তেওঁক এসপ্তাহৰ অন্তৰ্ৱৰ্তীকালীন জামিন প্ৰদান কৰে। সেই নিৰ্দেশক প্ৰত্যাহ্বান জনাই অসম চৰকাৰে উচ্চতম ন্যায়ালয়ৰ কাষ চাপিছিল। অসমৰ আদালতত আবেদন নকৰি তেলেংগানাত এই আবেদনৰ কোনো ন্যায্যতা নাই বুলি তেওঁলোকে যুক্তি আগবঢ়ায়। বৃহস্পতিবাৰে উচ্চতম ন্যায়ালয়ে তেলেংগানা উচ্চ ন্যায়ালয়ৰ আবেদন স্থগিত ৰাখে।
