কাৰ্বি আংলঙৰ খটখটী (Khatkhati of Karbi Anglong) থানাৰ অন্তৰ্গত টিলাবস্তিৰ শান্তিগাঁৱত ড্ৰাগছসহ এজন যুৱকক আটক (Youth arrested with drugs)। খটখটীয়ে আৰক্ষীয়ে নাকা তালাচী চলোৱাৰ সময়ত মঙলবাৰে দুপৰীয়া সন্দেহযুক্ত ড্ৰাগছসহ যুৱকজনক আটক কৰিবলৈ সক্ষম হয়। আৰক্ষী সূত্ৰৰ পৰা জানিব পৰা মতে, এক গোপন তথ্যৰ ভিত্তিত খটখটী থানাৰ আৰক্ষী বিষয়া সূৰ্য কুমাৰ বৰাৰ নেতৃত্বত এই অভিযান চলোৱা হয়। তেওঁৰ সৈতে উপ-পৰিদৰ্শক দেৱাশিস বৰা, অমৰজ্যোতি গগৈ আৰু প্ৰিয়ংক বৰদলৈ আৰু থানাৰ আৰক্ষীৰ দলে নাকা তালাচী চলাই থকাৰ সময়তে এজন যুৱক সন্দেহজনকভাৱে খোজকাঢ়ি গৈ থকা অৱস্থাত ধৰা পৰে।
পিছত আৰক্ষীয়ে যুৱকজনক তালাচী চলোৱাত তেওঁৰ বেগৰ ভিতৰত লুকুৱাই অনা প্ৰায় ২৪টা কণ্টেইনাৰৰ মাজত ৫.৯১ গ্ৰাম সন্দেহযুক্ত ড্ৰাগছ উদ্ধাৰ (Drug seizure) কৰে। উদ্ধাৰ হোৱা এই ড্ৰাগছখিনি হেৰ’ইন বুলি সন্দেহ কৰা হৈছে। আটক কৰা যুৱকজন গোলাঘাট জিলাৰ উৰিয়ামঘাট থানাৰ অন্তৰ্গত ৩নং ৰাজাপুখুৰীৰ আব্দুল জলিলৰ পুত্ৰ মহম্মদ আব্দুল কালাম (২১) বুলি জানিব পৰা গৈছে। অধিক তথ্যৰ বাবে খটখটী আৰক্ষীয়ে তদন্ত অব্যাহত ৰাখিছে।
