ভাৰতৰ পৰা নিৰ্মূল হৈছে মাওবাদী সন্ত্ৰাস। সোমবাৰে লোকসভাত এই মন্তব্য কেন্দ্ৰীয় গৃহমন্ত্ৰী অমিত শ্বাহৰ (Amit Shah)। একে সময়তে তেওঁ কয় যে মাওবাদীৰ শেষ দুৰ্গ ছত্তীশগড়ৰ বস্তাৰে উন্নয়নৰ পথত খোজকাঢ়িছে। বস্তাৰৰ উদাহৰণ দি শ্বাহে কয় যে লাল সন্ত্ৰাসবাদ নাইকিয়া হৈছে।
গৃহমন্ত্ৰীগৰাকীয়ে কয়, “ভাৰতত মাওবাদ এতিয়া বিলুপ্তিৰ পথত আগবাঢ়িছে। যেতিয়া সমগ্ৰ প্ৰক্ৰিয়াটো আনুষ্ঠানিকভাৱে সম্পূৰ্ণ হ’ব তেতিয়া দেশবাসীক অৱগত কৰা হ’ব। কিন্তু মই ক’ব পাৰোঁ যে আমি নক্সালমুক্ত হৈ পৰিছোঁ।”
অমিত শ্বাহে ঘোষণা কৰিছিল যে ২০২৬ চনৰ ৩১ মাৰ্চৰ ভিতৰত ভাৰত মাওবাদীমুক্ত হ’ব। মঙলবাৰে নিৰ্ধাৰণ কৰা সময়সীমা শেষ হৈছে। ইয়াৰ পূৰ্বে সোমবাৰে লোকসভাত আলোচনা হৈছিল।
সেই আলোচনাত শ্বাহৰ ভাষণৰ এক বৃহৎ অংশ বস্তাৰৰ বিষয়ে আছিল। নৰেন্দ্ৰ মোদী চৰকাৰে বস্তাৰক কেনেদৰে বিকশিত কৰিছে সেই কথা বুজাই দিয়ে অমিত শ্বাহে। কেৱল বস্তাৰেই নহয়, দেশৰ প্ৰায় সকলো মাওবাদী বসতিপ্ৰধান অঞ্চল ‘সন্ত্রাসমুক্ত’ আৰু ‘উন্নয়ন’ৰ পথত খোজকঢ়া বুলি কয় কেন্দ্ৰীয় গৃহমন্ত্ৰীয়ে।
তেওঁ কয়, “বস্তাৰৰ প্ৰতিখন গাঁৱতে এখন বিদ্যালয় নিৰ্মাণৰ অভিযান আৰম্ভ কৰা হৈছে। পিছলৈ তাত ৰেচনৰ দোকান, স্বাস্থ্য কেন্দ্ৰ, পথ আদি এটা এটাকৈ নিৰ্মাণ কৰা হ’ল।” অমিত শ্বাহৰ মতে ‘লাল সন্ত্ৰাস’ৰ বাবে বস্তাৰত কোনো উন্নয়ন হোৱা নাছিল। তাত থকা মানুহবোৰ পিছপৰা আছিল। ‘লাল সন্ত্ৰাস’ৰ বাবে উন্নয়ন তাত উপনীত হ’ব পৰা নাছিল। এতিয়া সেই ছাঁ নোহোৱা হৈ গ’ল।
লগতে অমিত শ্বাহৰ ভাবুকি, “যিসকলে নিজৰ অস্ত্ৰ আত্মসমৰ্পণ কৰিবলৈ ইচ্ছুক তেওঁলোকৰ বিষয়ে আলোচনা কৰা হ’ব” -মোদী চৰকাৰে এই নীতিত বিশ্বাস কৰে। কেন্দ্ৰীয় গৃহমন্ত্ৰীয়ে পুনৰ বুজাই দিয়ে যে হিংসাৰ কোনো স্থান নাই। তেওঁ কয় যে যিসকলে অস্ত্ৰ তুলি লয়, তেওঁলোকক কোনো ধৰণৰ ৰেহাই দিয়া নহ’ব।
