ইৰাণ যুদ্ধৰ বাবে বিশ্ব বজাৰ অস্থিৰ হৈ পৰিছে। ইন্ধনৰ নাটনি পৰিস্থিতিত দেশৰ সাধাৰণ মানুহক জীয়াই ৰখাৰ বাবে মোদী চৰকাৰে এটা ডাঙৰ পদক্ষেপ গ্ৰহণ কৰিছে। ২৯ মাৰ্চ, দেওবাৰে কেন্দ্ৰীয় পেট্ৰ’লিয়াম আৰু প্ৰাকৃতিক গেছ মন্ত্ৰালয়ে এক বিশেষ নিৰ্দেশনাৰ জৰিয়তে দেশজুৰি জৰুৰীকালীন ভিত্তিত কেৰাচিন বিতৰণ কৰা হ’ব বুলি প্ৰকাশ কৰে। আনকি কেৰাচিনৰ যোগান (Supply of kerosene) বন্ধ হোৱা ২১ খন ৰাজ্য আৰু কেন্দ্ৰীয়শাসিত অঞ্চলতো এই ইন্ধন (Fuel) অহা ৬০ দিনলৈ বিশেষ ব্যৱস্থাৰ (Special arrangement for 60 days) অধীনত উপলব্ধ হ’ব। মূলতঃ ৰন্ধন ইন্ধনৰ যোগান নিশ্চিত কৰিবলৈ কেৰাচিন সংৰক্ষণ আৰু বিক্ৰীৰ নিয়মত অস্থায়ী শিথিলতা দিয়া হৈছে
নতুন নিয়ম অনুসৰি প্ৰতিখন জিলাত সৰ্বাধিক দুটা পেট্ৰ’ল পাম্পত কেৰাচিন বিক্ৰী কৰিব পাৰিব। এটা ডিপোত সৰ্বাধিক ৫০০০ লিটাৰ কেৰাচিন জমা কৰিব পাৰিব। ইয়াৰ বাবে তেল কোম্পানীসমূহৰ নিজা পাম্পক অগ্ৰাধিকাৰ দিয়া হ’ব। দ্ৰুত পৰিবহণৰ স্বাৰ্থত ট্ৰাক বা টেংকাৰৰ অনুজ্ঞাপত্ৰৰ সৈতে জড়িত কিছুমান নিয়ম শিথিল কৰা হৈছে। কেন্দ্ৰই কেন্দ্ৰীয় সংস্থা পেশ্ব’ৰ পৰামৰ্শ অনুসৰি ১৯৩৪ চনৰ পেট্ৰ’লিয়াম আইনখনৰ বিশেষ ধাৰা প্ৰয়োগ কৰি এই ৰেহাই দিছে।
বিগত কেইটামান বছৰত চৰকাৰে দিল্লী, হাৰিয়ানা, পঞ্জাব, উত্তৰ প্ৰদেশ, গুজৰাট, অন্ধ্ৰপ্ৰদেশ, গোৱা আদি ২১ খন ৰাজ্যলৈ কেৰাচিন যোগান বন্ধ কৰি দিছিল। কিন্তু বৰ্তমানৰ পৰিস্থিতিত কেন্দ্ৰই এই ৰাজ্যসমূহলৈ পুনৰ কেৰাচিন প্ৰেৰণ কৰাৰ সিদ্ধান্ত লৈছে। এই তালিকাত জম্মু-কাশ্মীৰ, লাডাখ আৰু আন্দামান আৰু নিকোবৰ দ্বীপপুঞ্জও অন্তৰ্ভুক্ত কৰা হৈছে। আনহাতে, অনুজ্ঞাপত্ৰৰ নিয়ম শিথিল হ’লেও সুৰক্ষাৰ ক্ষেত্ৰত কোনো আপোচ নহ’ব বুলি কেন্দ্ৰই স্পষ্ট কৰি দিছে।
নিৰ্দেশনাত উল্লেখ আছে :
- কেৰাচিন সংৰক্ষণ আৰু বিক্ৰীৰ প্ৰতিটো হিচাপ সঠিকভাৱে ৰাখিব লাগিব।
- জিলা প্ৰশাসন আৰু বিশেষজ্ঞ বিষয়াসকলে যিকোনো সময়তে পাম্পটোলৈ গৈ তালাচী চলাব পাৰে।
- এই কেৰাচিন কেৱল ৰন্ধা-বঢ়া আৰু পোহৰৰ কামতহে ব্যৱহাৰ কৰিব পাৰিব।
উল্লেখ্য যে ইৰাণ যুদ্ধৰ বাবে সমগ্ৰ বিশ্বতে তেলৰ মূল্য আকাশলংঘী হৈছে। ইতিমধ্যে চৰকাৰে পেট্ৰ’ল-ডিজেলৰ কৰ হ্ৰাস কৰি জনসাধাৰণক সকাহ দিয়াৰ চেষ্টা কৰিছে। ইয়াৰ বাবে ৰাজকোষৰ বৃহৎ লোকচান হোৱাৰ পাছতো চৰকাৰ পিছুৱাই যোৱা নাই। কিন্তু যুদ্ধ কিমান দূৰলৈ যাব তাক লৈ সন্দেহৰ সৃষ্টি হৈছে। যদিহে গেছ চিলিণ্ডাৰৰ যোগান কমি যায় বা দাম সাধাৰণ মানুহৰ হাতৰ মুঠিৰ বাহিৰলৈ যায়, তেন্তে বিকল্প হিচাপে কেৰাচিন একমাত্ৰ আশা। সেয়েহে ডিপোৰ জৰিয়তে আগতীয়াকৈ কেৰাচিন যোগান ধৰাৰ এই বিশেষ পৰিকল্পনা। জানিব পৰা মতে, আগন্তুক দুমাহলৈ এনেদৰে চলি থাকিব। তেনে ক্ষেত্ৰত বৰ্তমান কেৰাচিন মধ্যবিত্ত আৰু নিম্ন শ্ৰেণীৰ ‘জীৱনৰেখা’ হ’বলৈ গৈ আছে।
