কাৰ্বি আংলঙৰ কাৰাগাঁও নাকা তালাচীত মৰফিনসহ এজনক আটক (Morphine seized) । এখন ট্ৰাকৰ পৰা জব্দ মৰফিনখিনি। দেওবাৰে নিশা কাৰ্বি আংলং জিলাৰ খটখটী থানাৰ অধীনস্থ কাৰাগাঁও নাকা তালাচীত খটখটী আৰক্ষীয়ে জব্দ কৰে এই মৰফিনখিনি।
খটখটী আৰক্ষীয়ে সন্দেহৰ ভিত্তিত নাগালেণ্ডৰ দিশৰ পৰা আহি থকা AS-01-JC-8941 নম্বৰৰ ট্ৰাকখন আটক কৰি তালাচী চলোৱাৰ সময়তে মৰফিনখিনি উদ্ধাৰ হয়। ১৪ টা পেকেটত ভৰাই অনা এই মৰফিনখিনিৰ ওজন ৬ কেজি ৫২৬ গ্ৰাম বুলি আৰক্ষীয়ে প্ৰকাশ কৰিছে।
আনহাতে, জব্দকৃত মৰফিনখিনিৰ বজাৰ মূল্য প্ৰায় ১২ কোটি টকা বুলি অনুমান কৰা হৈছে। ইফালে ঘটনাৰ সৈতে জড়িত এজন লোকক আৰক্ষীয়ে আটক কৰাৰ লগতে নিচাযুক্ত দ্ৰব্যখিনি সৰবৰাহত ব্যৱহাৰ কৰা ট্ৰাকখনো জব্দ কৰা হৈছে।
আটক কৰা লোকজনক মণিপুৰৰ সেনাপতি জিলাৰ চেছুৱাল পাৰাগোদাৰ ডেলিৰাম ডেমালৰ পুত্ৰ কৃষ্ণা ডেমাল বুলি জানিব পৰা গৈছে। এই অভিয়ানৰ নেতৃত্ব লৈছিল খটখটী থানা ভাৰপ্ৰাপ্ত আৰক্ষী বিষয়া সূৰ্য কুমাৰ বৰাই।
তেওঁৰ নেতৃত্বত উপ-পৰিদৰ্শক জীৱন শইকীয়া কাৰাগাঁও আৰক্ষী চকীৰ ভাৰপ্ৰাপ্ত বিষয়া ইমৰাণ হুছেইন আৰু থানাৰ জোনাৱসকলে এই অভিযান চলায়। অধিক তথ্যৰ সন্ধানত আৰক্ষীয়ে তদন্ত অব্যাহত ৰাখিছে।
