ইৰাণ যুদ্ধৰ ফলত বিশ্বৰ বেছিভাগ দেশেই ইন্ধনৰ সংকটত ভুগিছে। ভাৰতৰ চুবুৰীয়া শ্ৰীলংকাও ইয়াৰ ব্যতিক্ৰম নহয়। সংকটৰ দিনত ভাৰতে বন্ধুৰ সহায়ৰ বাবে আগবাঢ়ি আহিছে। নতুন দিল্লীয়ে এক সংকটজনক পৰিস্থিতিত শ্ৰীলংকালৈ ৩৮,০০০ মেট্ৰিক টন ইন্ধন তেল যোগান ধৰিছে। দেওবাৰে দেশলৈ পেট্ৰ’ল আৰু ডিজেল প্ৰেৰণ কৰে।
সংকটৰ সময়ত ভাৰতৰ পৰা এই সহায় লাভ কৰাৰ বাবে দেশৰ শাসনাধিষ্ঠ আৰু বিৰোধী দল উভয়ে মোডী চৰকাৰৰ প্ৰতি কৃতজ্ঞতা জ্ঞাপন কৰিছে। ২৮ মাৰ্চত শ্ৰীলংকাৰ ৰাষ্ট্ৰপতি অনুৰা কুমাৰ দিছানায়েকে প্ৰধানমন্ত্ৰী নৰেন্দ্ৰ মোদীলৈ টেলিফোন কৰে।
সেই ফোন কলত তেওঁ শ্ৰীলংকাৰ শক্তি সংকট সমাধানৰ বাবে ভাৰতৰ সহায় বিচাৰিছিল। পিছত কলম্বোস্থিত ভাৰতীয় দূতাবাসে বিষয়টো ৰাজহুৱা কৰে। শনিবাৰে ২০,০০০ মেট্ৰিক টন ডিজেল আৰু ১৮,০০০ মেট্ৰিক টন পেট্ৰ’ল শ্ৰীলংকালৈ প্ৰেৰণ কৰে।
দেওবাৰে কলম্বো বন্দৰত ইন্ধন উপস্থিত হয়। শ্ৰীলংকাৰ চৰকাৰ আৰু বিৰোধী উভয়ে ভাৰতক সহায়ৰ বাবে ধন্যবাদ জনাইছে। শ্ৰীলংকাৰ বিৰোধী দলপতি চাজিথ প্ৰেমাদাছাই ভাৰতৰ প্ৰতি ধন্যবাদ আৰু কৃতজ্ঞতা জ্ঞাপন কৰে।
এক এক্স প’ষ্টত তেওঁ লিখিছে, “জৰুৰীকালীন পৰিস্থিতিত শক্তি সহায়ৰ বাবে আমি ভাৰতক ধন্যবাদ জনাইছো। এই ঘটনাই আমাক সোঁৱৰাই দিয়ে যে যিকোনো বন্ধুত্বৰ প্ৰকৃত পৰীক্ষা সংকটৰ সময়ত হয়, সকাহৰ সময়ত নহয়। যিসকলে দেশৰ কঠিন সময়ত আমাৰ কাষত থিয় দিছিল। তেওঁলোকক পাহৰি নাযাওঁ আহক।”
উল্লেখ্য যে কেৱল শ্ৰীলংকাই নহয় ভাৰতেও শেহতীয়াকৈ শক্তি সংকটত বাংলাদেশলৈ সহায়ৰ হাত আগবঢ়াইছে। শুকুৰবাৰে চৰকাৰী সূত্ৰৰ মতে বাংলাদেশলৈ অতিৰিক্ত ৫০০০ লিটাৰ ডিজেল ৰপ্তানি কৰা হৈছে। মুঠতে ভাৰতে সংকটৰ বজাৰত ইয়াৰ চুবুৰীয়া দেশলৈ মুঠ ১৫০০০ মেট্ৰিক টন ডিজেল প্ৰেৰণ কৰিছে।
এইটো জনা গৈছে যে অতিৰিক্ত ৬,০০০ টন ডিজেল প্ৰেৰণ কৰাৰ বাবে ২৮ মাৰ্চৰ পৰা পাম্পিং প্ৰক্ৰিয়া আৰম্ভ হ’ব। ভাৰতে এপ্ৰিলৰ ভিতৰত বাংলাদেশক ৪০,০০০ মেট্ৰিক টন ডিজেল যোগান ধৰাৰ লক্ষ্য লৈছে। অসমৰ নুমলীগড় শোধনাগাৰৰ পৰা ইন্ধন পৰিবহণ কৰা হ’ব। এই ডিজেল পাইপলাইনৰ মাজেৰে যাব।
