অন্ধ্ৰপ্ৰদেশত পুনৰ এখন (Andhra Pradesh Bus tragedy) যাত্ৰীবাহী বাছত অগ্নিকাণ্ড। বৃহস্পতিবাৰে পুৱা ৰাজ্যখনৰ মাৰ্কাপুৰম জিলাত এখন ট্ৰাকৰ সৈতে মুখামুখি সংঘৰ্ষৰ ফলত এখন বাছত অগ্নিকাণ্ড সংঘটিত হয়। যাৰ ফলত বহু যাত্ৰীয়ে নামিবলৈ সুযোগে নাপালে। বাছখনৰ ভিতৰত আবদ্ধ হৈ কমেও ১৪ জন লোকৰ মৃত্যু হয়। আন ২৩ জন আহত হয়। ইয়াৰে কিছুমানৰ অৱস্থা সংকটজনক।
মাৰ্কাপুৰমৰ উপ-আৰক্ষী অধীক্ষক নাগাৰাজুৱে সংবাদ মাধ্যমৰ আগত কয়, “কমেও ৮ জন লোকৰ মৃত্যু হৈছে। ১৮ জন লোক আহত হৈছে। আহতসকলক উদ্ধাৰ কৰি চিকিৎসালয়ত ভৰ্তি কৰা হৈছে।” অৱশ্যে স্থানীয় সূত্ৰ অনুসৰি, কমেও ১৪ জন লোকৰ মৃত্যু হৈছে। মৃতকৰ সংখ্যা আৰু বৃদ্ধি পাব পাৰে বুলি আশংকা কৰা হৈছে।
প্ৰত্যক্ষদৰ্শীয়ে জনোৱা মতে, বৃহস্পতিবাৰে পুৱা প্ৰায় ৬ বজাত তেলেংগানাৰ নিৰ্মলৰ পৰা অন্ধ্ৰপ্ৰদেশৰ নেল্লোৰলৈ গৈ আছিল বাছখন। মাৰ্কাপুৰমৰ সমীপত এখন ট্ৰাকৰ সৈতে মুখামুখি সংঘৰ্ষ হয়। সংঘৰ্ষৰ লগে লগে বাছখনত অগ্নিকাণ্ড সংঘটিত হয়। ভিতৰত আবদ্ধ হৈ পৰে যাত্ৰীসকল।
বহুতে বাছখনৰ খিৰিকীৰ কাঁচ ভাঙি পলায়ন কৰিবলৈ সক্ষম হয় যদিও সেই মুহূৰ্তত সকলোকে উদ্ধাৰ কৰিব পৰা নগ’ল। বাছখনৰ জুই দ্ৰুতগতিত বিয়পি পৰে। ভিতৰত অগ্নিদগ্ধ হোৱাৰ ফলত বহু লোকৰ মৃত্যু হয়। স্থানীয় ৰাইজে প্ৰথমে উদ্ধাৰৰ কাম আৰম্ভ কৰে। ইয়াৰ পিছতে আৰক্ষী আৰু অগ্নিনিৰ্বাপক বাহিনী উপস্থিত হয়।
অন্ধ্ৰপ্ৰদেশৰ মুখ্যমন্ত্ৰী চন্দ্ৰবাবু নাইডুৱে এই দুৰ্ঘটনাক লৈ শোক প্ৰকাশ কৰিছে। সমগ্ৰ পৰিস্থিতিৰ ওপৰত তীক্ষ্ণ দৃষ্টি ৰাখিবলৈ তেওঁ জিলা প্ৰশাসনক নিৰ্দেশ দিছে। লগতে আহতসকলৰ বাবে সম্ভৱপৰ সকলো চিকিৎসা ব্যৱস্থা কৰিবলৈ নিৰ্দেশ দিছে মুখ্যমন্ত্ৰীয়ে। তদুপৰি এই দুৰ্ঘটনা সন্দৰ্ভত এক পুংখানুপুংখ তদন্ত কৰিবলৈ জিলা প্ৰশাসনক নিৰ্দেশ দিয়া হৈছে।
