ইৰাণে বন্ধুত্বপূৰ্ণ দেশৰ বাবে (Iran War) হৰমুজ প্ৰণালী মুকলি কৰি ৰাখিছে। বন্ধু দেশৰ তালিকাত আছে ভাৰত-পাকিস্তানৰো নাম। বুধবাৰে মাজনিশা ইৰাণে এক বিবৃতিত এই কথা স্পষ্ট কৰি দিয়ে। ভাৰত আৰু পাকিস্তানকে ধৰি পাঁচখন বন্ধু দেশৰ নামো ৰাজহুৱা কৰিছে তেহৰানে।
ইৰাণে ইয়াৰ পূৰ্বে কৈছিল যে তেহৰানে তেওঁলোকৰ প্ৰতি শত্ৰুতা নকৰা দেশৰ জাহাজক হৰমুজ প্ৰণালীৰ মাজেৰে নিৰাপদে পাৰ হ’বলৈ অনুমতি দিবলৈ ইচ্ছুক। কিন্তু সেই তালিকাত কোনবোৰ দেশ আছে সেয়া প্ৰথমে স্পষ্ট হোৱা নাছিল।
বুধবাৰে বিয়লি পাকিস্তান অভিমুখী এখন জাহাজে হৰমুজ প্ৰণালী পাৰ হৈ যোৱাৰ সময়ত বাধাৰ সন্মুখীন হোৱাৰ খবৰ বিয়পি পৰে। কাকতলীয়াকৈ ক’বলৈ গ’লে বৰ্তমান পাকিস্তানে আমেৰিকা আৰু ইৰাণৰ মাজৰ সংঘাত বন্ধ কৰিবলৈ মধ্যস্থতা কৰাৰ চেষ্টা চলাইছে। এনে পৰিস্থিতিত বুধবাৰে মাজনিশা ইৰাণে নিজৰ পাঁচখন বন্ধু দেশৰ নাম ঘোষণা কৰে।
ইৰাণৰ বৈদেশিক মন্ত্ৰী আব্বাছ আৰাঘচিয়ে কয় যে তেহৰানে বন্ধুত্বপূৰ্ণ দেশসমূহক হৰমুজ প্ৰণালী ব্যৱহাৰ কৰিবলৈ অনুমতি দিছে। এই তালিকাত চীন, ৰাছিয়া, ভাৰত, ইৰাক আৰু পাকিস্তান অন্তৰ্ভুক্ত আছে।
আৰাঘচিৰ এই বাৰ্তা ছচিয়েল মিডিয়াত প্ৰকাশ কৰিছে মুম্বাইত থকা ইৰাণৰ দূতাবাসে। আৰাঘচিৰ সৈতে হোৱা এক সাক্ষাৎকাৰ ইৰাণৰ চৰকাৰী টেলিভিছনত সম্প্ৰচাৰিত হৈছিল। তাত তেওঁ কয়, “হৰমুজ প্ৰমালী সম্পূৰ্ণৰূপে বন্ধ নহয়। ইৰাণৰ সৈতে বন্ধুত্বপূৰ্ণ কেইবাখনো দেশৰ জাহাজক তাৰ মাজেৰে পাৰ হ’বলৈ দিয়া হৈছে।”
সংবাদ সংস্থা ৰয়টাৰৰ তথ্য অনুসৰি, আৰাঘচিয়ে কয়, “জাহাজৰ নিৰাপদ যাতায়াতৰ বাবে বিভিন্ন দেশে ইৰাণৰ সৈতে যোগাযোগ কৰিছে।এই দেশবোৰৰ কিছুমানক আমি বন্ধু বুলি গণ্য কৰোঁ। তেনে ক্ষেত্ৰত আমাৰ সশস্ত্ৰ বাহিনীয়ে সেই জাহাজবোৰক নিৰাপদে পাৰ হোৱাৰ ব্যৱস্থা কৰিছে। আপুনি বাতৰিত দেখিছে- চীন, ৰাছিয়া, পাকিস্তান, ইৰাক আৰু ভাৰত। কিছুদিন আগতে এই পথেৰে দুখন জাহাজ পাৰ হৈ গৈছিল। মই ভাবো আৰু অধিক হ’ব, সম্ভৱতঃ বাংলাদেশো।”
দুদিন পূৰ্বে ইৰাণে ৰাষ্ট্ৰসংঘক জনাইছিল যে যদিও আমেৰিকা আৰু ইজৰাইলৰ বাহিৰে আন দেশৰ জাহাজক ‘পাছ’ দিছে, ইৰাণে কিছুমান পূৰ্বচৰ্ত ঘোষণা কৰিছে। তেওঁলোকে ৰাষ্ট্ৰসংঘক জনাইছে যে ইৰাণে শত্ৰু বুলি গণ্য নকৰা দেশৰ জাহাজবোৰহে হৰমুজৰ মাজেৰে পাৰ হ’ব পাৰিব। অৱশ্যে এই ক্ষেত্ৰত তেওঁলোকে আগতীয়াকৈ ইৰাণী কৰ্তৃপক্ষৰ সৈতে সমন্বয় স্থাপন কৰিব লাগিব।
একে সময়তে এই কথাও কোৱা হৈছে যে সেই জাহাজসমূহ ইৰাণৰ বিৰুদ্ধে আক্ৰমণৰ সৈতে জড়িত বা সমৰ্থন কৰা উচিত নহয়। সেই জাহাজসমূহেও ইৰাণে অঞ্চলটোত ঘোষণা কৰা নিৰাপত্তা আৰু সুৰক্ষাৰ নিয়মসমূহ সম্পূৰ্ণৰূপে মানি চলিব লাগিব।
