সুবিধা থকাৰ পিছতো যদি কোনোৱে পাইপলাইন গেছ (Pipe gas) বা পি এন জি (PNG) নলয়, তেন্তে তিনিমাহৰ ভিতৰত বন্ধ কৰি দিয়া হ’ব। নতুন নিৰ্দেশিকাত এই কথা জনাইছে কেন্দ্ৰীয় চৰকাৰে। পশ্চিম-এছিয়াৰ যুদ্ধৰ পৰিস্থিতিৰ বাবে ভাৰতত ৰন্ধন গেছৰ যোগানক লৈ উদ্বেগ সৃষ্টি হৈছে। নিৰ্দিষ্ট সময়ৰ ভিতৰত গেছ উপলব্ধ নহয় বুলি বহুতে অভিযোগ উত্থাপন কৰিছে। এনে পৰিস্থিতিত কেন্দ্ৰই ৰন্ধা-বঢ়াৰ বাবে পাইপ গেছ বা পি এন জি ব্যৱহাৰ কৰিবলৈ উৎসাহিত কৰিছে। পেট্ৰ’লিয়াম মন্ত্ৰালয়ৰ বিশেষ সচিব সুজাতা শৰ্মাই পি এন জিৰ গ্ৰাহক হ’বলৈ কেইবাবাৰো অনুৰোধ জনাইছে। কিন্তু দেশৰ এক বৃহৎ অংশত এল পি জি ব্যৱহাৰ কৰা হয়। পি এন জি এতিয়াও ইমান সাধাৰণ নহয়। তাৰ বাবে এইবাৰ কেন্দ্ৰ কঠোৰ হৈছে। পি এন জি বাধ্যতামূলক কৰা হৈছে।
সকলোতে পি এন জিৰ যোগান আৰম্ভ কৰাটো এতিয়াও সম্ভৱ হোৱা নাই। কোনো কোনো ঠাইত কাৰিকৰী বাধাৰ সৃষ্টি হৈছে। কেন্দ্ৰৰ নতুন গাইডলাইনত কোৱা হৈছে যে য’ত পি এন জি ব্যৱহাৰ কৰাৰ সুবিধা আছে, সেই সকলো ঘৰতে এল পি জিৰ সলনি ইয়াক ব্যৱহাৰ কৰিব লাগে। যিসকলে সুযোগ পায়ো তেনে নকৰে তেওঁলোকৰ এল পি জি সংযোগ তিনিমাহৰ ভিতৰত বিচ্ছিন্ন হ’ব। কেন্দ্ৰই দেশৰ মুঠ এল পি জি চাহিদাৰ ৬০ শতাংশ বাহিৰৰ পৰা আমদানি কৰে। কিন্তু পি এন জি সেৱা আমদানি কৰাৰ প্ৰয়োজন নাই। কাৰণ এই পাইপ গেছ দেশত উৎপাদিত হয়। বহু উৎসৰ পৰা পোৱা যায়। ইয়াক এল পি জিৰ সুবিধাজনক বিকল্প বুলি দাবী কৰিছে চৰকাৰে।
পেট্ৰ’লিয়াম মন্ত্ৰালয়ে ২৪ মাৰ্চ, মঙলবাৰে অত্যাৱশ্যকীয় সামগ্ৰী আইনৰ অধীনত ‘প্ৰাকৃতিক গেছ আৰু পেট্ৰ’লিয়াম সামগ্ৰী বিতৰণ নিৰ্দেশনা, ২০২৬’ জাৰি কৰিছে। ইয়াৰ লক্ষ্য হৈছে দেশত পি এন জিৰ আন্তঃগাঁথনি ত্বৰান্বিত কৰা, পি এন জিৰ অনুমোদন প্ৰক্ৰিয়া সৰল কৰা আৰু জনসাধাৰণক এল পি জিৰ পৰা পি এন জিলৈ ৰূপান্তৰিত কৰিবলৈ উৎসাহিত কৰা। চৰকাৰে দেশৰ বাকী অংশত পি এন জি প্ৰৱৰ্তন কৰিব বিচাৰিছে, একে সময়তে যিবোৰ অংশত পি এন জি সেৱা কাৰিকৰীভাৱে সম্ভৱ নহয়, সেইবোৰ অংশত এল পি জিৰ যোগান সীমিত কৰিব বিচাৰিছে। তেল সচিব নীৰজ মিট্টালৰ মতে, পি এন জিৰ পদক্ষেপৰ জৰিয়তে চৰকাৰে ‘এটা সংকটক সুযোগলৈ ৰূপান্তৰিত’ কৰিছে।
পি এন জি গাইডলাইন শীঘ্ৰে কাৰ্যকৰী কৰাৰ বাবে নিৰ্ধাৰিত সময়সীমাৰ ভিতৰত প্ৰয়োজনীয় অনুমোদন প্ৰদান কৰিবলৈ চৰকাৰে অনুৰোধ জনাইছে। ইয়াৰ উপৰি নিৰ্দিষ্ট পৰিমাণৰ ক্ৰয়ৰ ওপৰত অতিৰিক্ত মাচুল আৰোপ কৰাত নিষেধাজ্ঞা আৰোপ কৰিছে। ঘৰৰ ক্ষেত্ৰত সংশ্লিষ্ট কৰ্তৃপক্ষই তিনিদিনৰ ভিতৰত পি এন জিৰ অনুমতি প্ৰদান কৰি ৪৮ ঘণ্টাৰ ভিতৰত সেৱা আগবঢ়াব লাগিব। কোনো আবেদন নাকচ কৰিব নোৱাৰিব। তদুপৰি অনুমোদিত প্ৰতিষ্ঠানৰ ক্ষেত্ৰত চাৰি মাহৰ ভিতৰত গেছ পাইপ স্থাপনৰ কাম আৰম্ভ কৰিব লাগিব। অন্যথা শাস্তি প্ৰদান কৰা হ’ব বুলিও কেন্দ্ৰই প্ৰকাশ কৰিছে। কাৰিকৰী সমস্যাৰ ক্ষেত্ৰত এল পি জি ব্যৱহাৰৰ বাবে অনুমতিৰ প্ৰমাণপত্ৰ বা এন অ’ চি দেখুৱাব লাগিব।
