মঙলবাৰে মুখ্যমন্ত্ৰী ডঃ হিমন্ত বিশ্ব শৰ্মা (Himanta Biswa Sarma)ই ডিফুৰ কাছা ক্ৰিকেট ষ্টেডিয়াম (Kacha Cricket Stadium, Diphu)ত অনুষ্ঠিত এক চৰকাৰী কাৰ্যসূচীত ৭,২৯৮ গৰাকী পৰম্পৰাগত কাৰ্বি পুৰোহিতক (কুৰুছাৰ) ১০ হেজাৰ টকাকৈ আৰ্থিক সাহায্য (Financial assistance)ৰ চেক প্ৰদান কৰে। লগতে মুখ্যমন্ত্ৰী আত্মনিৰ্ভৰ অসম অভিযানৰ অধীনত কাৰ্বি আংলং, ডিমা হাচাও আৰু পশ্চিম কাৰ্বি আংলং জিলাৰ ১,৯৪৪ গৰাকী যুৱক-যুৱতীক ২ লাখ আৰু ১ লাখ টকাৰ প্ৰথম কিস্তিৰ ধন বিতৰণ (Wealth Distribution) কৰে৷ কাৰ্বি পুৰোহিতসকলক পূৰ্বে ঘোষণা কৰা অনুসৰি ধন প্ৰদান কৰি মুখ্যমন্ত্ৰীয়ে কয় যে তেওঁ পুনৰ মুখ্যমন্ত্ৰী হ’লে মাহে ২ হেজাৰকৈ বছৰত ১২ হেজাৰ টকা প্ৰদান কৰিব৷ লগতে তেওঁলোকক নিজৰ ধৰ্মৰ পৰা ধৰ্মান্তৰিত ন’হৈ তেওঁলোকৰ সন্তানক কাৰ্বি সংহাৰী ধৰ্মৰ শিক্ষা দিবলৈ আহ্বান জনায়৷ লগতে তেওঁ দিয়া প্ৰতিশ্ৰুতি ৰক্ষা কৰি তেওঁলোকক সন্মান প্ৰদান কৰা বুলি উল্লেখ কৰি কংগ্ৰেছ আৰু এ পি এইচ এল চিয়ে এনেধৰণৰ কথা কেতিয়াও কল্পনাও কৰিব নোৱাৰে বুলি উল্লেখ কৰে৷
আনহাতে, মুখ্যমন্ত্ৰী আত্মনির্ভৰ আঁচনিৰ চেক বিতৰণ কৰি মুখ্যমন্ত্ৰীয়ে কয় যে তেওঁ নিৰ্বাচনৰ আগতে দিয়া প্ৰতিশ্ৰুতি অনুসৰি ১ লাখ নিবনুৱাক চাকৰি প্ৰদান কৰা কাম কেতিয়াবাই পূৰণ কৰিছে৷ আনহাতে, পুনৰ মুখ্যমন্ত্ৰী হ’লে তেওঁ ৩০ লাখ যুৱক-যুৱতীক আত্মনিৰ্ভৰ অসম আঁচনিৰ অধীনত আত্মনিৰ্ভৰশীল কৰি তোলাৰ প্ৰতিশ্ৰুতি দিয়ে৷ লগতে প্ৰথম কিস্তিৰ ধনৰ সদব্যৱহাৰ কৰিবলৈ সকলোকে আহ্বান জনায়৷ তেওঁ লগতে এইবছৰ এই আঁচনিৰ জৰিয়তে ৭৫ হাজাৰ যুৱক-যুৱতী উপকৃত হোৱা বুলি প্ৰকাশ কৰে৷
আনহাতে, অনুষ্ঠানত থাকি কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে ভাষণ প্ৰসংগত কাৰ্বি কুৰুছাৰ আৰু নিৱনুৱাসকলক মুখ্যমন্ত্ৰীয়ে যিদৰে সন্মান দিছে সেয়া আন কোনোৱে কৰা নাই বুলি দাবী কৰে৷ সেয়ে পুনৰ চৰকাৰ গঠনৰ বাবে বিজেপিক সকলোকে আশীৰ্বাদ দিবলৈ আহ্বান জনায়৷
ইফালে ভূপেন বৰাৰ বিজেপিত যোগদান সন্দৰ্ভত সাংবাদিকৰ সৈতে বাৰ্তালাপত মুখ্যমন্ত্ৰীয়ে কয় যে কৰি কয় যে কংগ্ৰেছৰ প্ৰাক্তন সভাপতি ভূপেন বৰাই বিজেপি দলত যোগদান কৰিব৷ সেইবাবে তেওঁক ঘৰলৈ মাতিছে আৰু সন্ধিয়া তেওঁ ভূপেন বৰাৰ ঘৰলৈ যাব৷
