ঘোষণা হ’ল অসম চৰকাৰ (Assam Govt.)ৰ নৱম ৰাজ্যিক চলচ্চিত্ৰ বঁটা (State Film Award)। শুকুৰবাৰে অসম চলচ্চিত্ৰ বিত্তীয় নিগমৰ অধ্যক্ষ সীমান্ত শেখৰৰ উপস্থিতিত ডিব্ৰুগড় জিলাৰ টিংখাঙৰ নিজা বাসগৃহত এক সংবাদমেলত মন্ত্ৰী বিমল বড়াই ঘোষণা (Bimal Bora’s announcement) কৰে নৱম অসম ৰাজ্যিক চলচ্চিত্ৰ বঁটা।
২০২০ আৰু ২০২১ বৰ্ষৰ এই ৰাজ্যিক চলচ্চিত্ৰ বঁটাত ‘বেলকনিত ভগৱান’ ছবিখনে ২০২০ বৰ্ষৰ চলচ্চিত্ৰ বঁটা লাভ কৰে। ছবিখনৰ পৰিচালক বিশ্বজিৎ বৰালৈ ব্ৰজেন বৰা শ্ৰেষ্ঠ পৰিচালক বঁটা আগবঢ়োৱা হৈছে। আনহাতে, ২০২১ বৰ্ষৰ চলচ্চিত্ৰ বঁটা লাভ কৰিছে ‘শব্দ নিশব্দ কোলাহল’ নামৰ ছবিখনে। ১৫ ফেব্ৰুৱাৰীত কলাক্ষেত্ৰত আয়োজিত এক অনুষ্ঠানত এই বঁটাসমূহ প্ৰদান কৰা হ’ব।
এই সন্দৰ্ভত সংবাদমেলত মন্ত্ৰী বিমল বড়াই কয় যে অসম চৰকাৰে অসমৰ চলচ্চিত্ৰ ক্ষেত্ৰখনৰ উন্নয়ন উত্তৰণৰ কাৰণে চলচিত্ৰ বঁটা প্ৰদান কৰি আহিছে। এইবাৰ অহা ১৫ ফেব্ৰুৱাৰীত নৱম ৰাজ্যিক চলচ্চিত্ৰ বঁটা প্ৰদান কৰাৰ সিদ্ধান্ত গ্ৰহণ কৰা হৈছে।
চলচ্চিত্ৰ নিৰ্মাতা, শিল্পী, কলা-কুশলী, লেখক আৰু যিসকল লোকে তেওঁলোকৰ অনবদ্য বৰঙণিৰে অসমৰ চলচ্চিত্ৰ জগতৰ উন্নয়ন, সংৰক্ষণ আৰু ৰাজ্যখনৰ সাংস্কৃতিক ঐতিহ্যসমূহক বিশ্ববাসীৰ ওচৰত তুলি ধৰিবৰ বাবে কাম কৰিছে তেওঁলোকক উৎসাহিত কৰাটোৱেই হৈছে এই বঁটা প্ৰদানৰ প্ৰধান উদ্দেশ্য।
