শ্ৰীভূমি জিলাৰ মাইজগ্ৰাম এলেকাত সংঘটিত হৈছে এক চাঞ্চল্যকৰ হত্যাকাণ্ড। নিজ ঘৰৰ শোৱাপাটীত হাত-ভৰি বন্ধা অৱস্থাত উদ্ধাৰ হৈছে মহুৰি সুশান্ত ৰয় কৰৰ মৃতদেহ।
জানিব পৰা মতে, ঘটনাৰ সময়ত সুশান্ত ৰয় কৰ ঘৰত অকলশৰে আছিল। দুৰ্বৃত্তই গামোচাৰে তেওঁৰ মুখ বান্ধি, শাৰ্টেৰে হাত আৰু মোবাইল চাৰ্জাৰৰ তাঁৰেৰে ভৰি বান্ধি হত্যা কৰাৰ সন্দেহ কৰা হৈছে। ঘৰৰ আচবাব-পত্ৰও লণ্ডভণ্ড অৱস্থাত উদ্ধাৰ হৈছে।
ঘটনাস্থলীৰ সন্মুখৰ দুৱাৰ-খিৰিকী বন্ধ হৈ আছিল যদিও পিছফালৰ দুৱাৰখন খোলা আছিল বুলি স্থানীয় প্ৰত্যক্ষদৰ্শীয়ে জানিবলৈ দিয়ে। বিশ্বকৰ্মা পূজাৰ আনন্দৰ মাজতে সংঘটিত এই নৃশংস ঘটনাই সমগ্ৰ মাইজগ্ৰাম এলেকাত তীব্ৰ চাঞ্চল্যৰ সৃষ্টি কৰিছে।
অসমৰ্থিত সূত্ৰৰ মতে, বিশেষ কামৰ বাবে সুশান্ত ৰয় কৰে ঘৰত প্ৰায় সাত লাখ টকা ৰাখিছিল। সেই ধনৰ বাবেই তেওঁক হত্যা কৰি লুটপাত চলোৱা হৈছিল নেকি, তাক লৈ সন্দেহৰ সৃষ্টি হৈছে। অৱশ্যে ধনৰ পৰিমাণ আৰু লুটপাতৰ বিষয়টো আৰক্ষীয়ে এতিয়াও আনুষ্ঠানিকভাৱে নিশ্চিত কৰা নাই।
ইতিমধ্যে আৰক্ষী আৰু ফৰেনছিক দলে ঘটনাস্থলীত উপস্থিত হৈ তদন্ত আৰম্ভ কৰিছে। এয়া পৰিকল্পিত ডকাইতি আৰু হত্যাকাণ্ড নে ঘটনাৰ আঁৰত আন কোনো কাৰণ আছে, সেয়া আৰক্ষীৰ তদন্ততহে স্পষ্ট হ’ব।
