নিশা এক অনুষ্ঠানৰ পৰা উভতি অহাৰ পথত এজন ব্যৱসায়ীক প্ৰহাৰ কৰি হত্যা কৰাৰ অভিযোগ উত্থাপন হৈছে তিনিগৰাকী খাদ্য ডেলিভাৰী কৰ্মীৰ (Delivery Boy) বিৰুদ্ধে। যোৱা ৩ জানুৱাৰীত মধ্য দিল্লীৰ কন’ট প্লেচ এলেকাত সংঘটিত হয় এই ঘটনা। গুৰুতৰভাৱে আঘাতপ্ৰাপ্ত হৈ প্ৰায় দুসপ্তাহ ধৰি চিকিৎসালয়ত ভৰ্তি হৈ আছিল যুৱকজন।
যোৱা ১৯ জানুৱাৰীত চিকিৎসাধীন অৱস্থাত তেওঁৰ চিকিৎসালয়ত মৃত্যু হয়। এই ঘটনাত এতিয়ালৈকে আৰক্ষীয়ে দুজন লোকক গ্ৰেপ্তাৰ কৰিছে। আন এজন ব্যক্তিৰ অনুসন্ধান চলি আছে। নিহত লোকজনৰ নাম শিৱম গুপ্তা (৩৬)।
আৰক্ষীৰ সূত্ৰ অনুসৰি, যোৱা ৩ জানুৱাৰীৰ নিশা অনুষ্ঠানৰ পৰা উভতি আহোঁতে পথত তিনিজন খাদ্য ডেলিভাৰী কৰ্মীৰ সৈতে কাজিয়াত লিপ্ত হয় যুৱকজনে। ইয়াৰ পিছতে যুৱকজনক তীব্ৰ প্ৰহাৰ কৰি তাৰ পৰা পলায়ন কৰাৰ অভিযোগ উত্থাপন হয় তিনি কৰ্মীৰ বিৰুদ্ধে।
ঘটনা সন্দৰ্ভত তথ্য লাভ কৰাৰ লগে লগে আৰক্ষীয়ে ৰক্তাক্ত অৱস্থাত যুৱকজনক উদ্ধাৰ কৰি চিকিৎসালয়লৈ লৈ যায়। চিকিৎসাধীন অৱস্থাত প্ৰায় ১৬ দিনৰ অন্তত তাতেই তেওঁৰ মৃত্যু হয়। চিকিৎসালয়ৰ সূত্ৰ অনুসৰি, শিৱমৰ মূৰত গুৰুতৰভাৱে আঘাতপ্ৰাপ্ত হয়।
আৰক্ষীয়ে তদন্ত কৰি অঞ্চলটোৰ চিচিটিভি কেমেৰা পৰীক্ষা কৰে। তাত দেখা গৈছে যে তিনিওজন কৰ্মীয়ে বিবাদৰ বাবে নিৰ্বিচাৰে হেলমেটেৰে ব্যৱসায়ীজনক প্ৰহাৰ কৰে। ইয়াৰ পিছত যুৱকজনক তাতে এৰি পলাই যায়। শিৱমৰ তেজৰ দাগ পৰা কাপোৰ ফৰেনছিক পৰীক্ষাৰ বাবে প্ৰেৰণ কৰে আৰক্ষীয়ে। আৰক্ষীয়ে এই ঘটনাৰ কাৰণৰ তদন্ত অব্যাহত ৰাখিছে।
আক্ৰমণকাৰী মৃত লোকজনৰ চিনাকি আছিল নেকি সেই বিষয়েও তদন্ত অব্যাহত ৰাখিছে। এই ঘটনাৰ পিছত শিৱমৰ পিতৃ অনিলকান্ত গুপ্তাই কয় যে শিৱম কোনো অনুষ্ঠানলৈ ওলাই গৈছে বুলি কৈ ২ জানুৱাৰীৰ সন্ধিয়া ঘৰৰ পৰা ওলাই গৈছিল।
তেওঁ কয়, “মই ৰাতি শিৱমক বাৰে বাৰে ফোন কৰি আছিলোঁ। কিন্তু কোনো উত্তৰ পোৱা নাছিলোঁ। কিছু সময়ৰ পাছত আৰক্ষীৰ পৰা ফোন আহিল আৰু মোৰ ল’ৰাটোক চিকিৎসালয়ত ভৰ্তি হোৱাৰ কথা জনালে।”
অনিলকান্তই অভিযুক্ত কৰ্মীকেইজনক কঠোৰতম শাস্তি প্ৰদানৰ দাবী জনায়। তেওঁ কয়, “মোৰ ল’ৰাটো মোৰ সকলো আছিল। এতিয়া আমি কেৱল ন্যায়ৰ আশা কৰিছোঁ। দোষীক ইমানেই কঠোৰ শাস্তি দিয়া উচিত যাতে আন কাৰো ঘৰ এইদৰে ধ্বংস নহয়।”
