কথাটো আগতেই ঘোষণা কৰা হৈছিল। সেই কথা মতে আমেৰিকা যুক্তৰাষ্ট্ৰই (USA) বৃহস্পতিবাৰে বিশ্ব স্বাস্থ্য সংস্থাৰ (WHO) পৰা আনুষ্ঠানিকভাৱে নিজৰ সদস্য পদ প্ৰত্যাহাৰ (Resignation from membership) কৰিছে৷ ব্লুমবাৰ্গৰ তথ্য অনুসৰি আমেৰিকা যুক্তৰাষ্ট্ৰৰ স্বাস্থ্য বিভাগে বিশ্ব স্বাস্থ্য সংস্থালৈ সকলো অনুদান বন্ধ কৰি দিছে। বিশ্বজুৰি বিশ্ব স্বাস্থ্য সংস্থাৰ কাৰ্যালয়ৰ পৰাও আমেৰিকা যুক্তৰাষ্ট্ৰৰ বিষয়াসকলক স্থানান্তৰ কৰা হৈছে।
বিশ্ব স্বাস্থ্য সংস্থা আমেৰিকা যুক্তৰাষ্ট্ৰৰ ওচাত ২৬০ নিযুত ডলাৰ (ভাৰতীয় মুদ্ৰাত প্ৰায় ২৪০০ কোটি টকা) ঋণী হৈ আছে। নিয়ম অনুসৰি যদি কোনো দেশে বিশ্ব স্বাস্থ্য সংস্থাৰ সদস্যপদ ত্যাগ কৰে, তেন্তে ই এবছৰ আগতীয়াকৈ জাননী দিব লাগিব। ইয়াৰ উপৰি যোৱাৰ আগতে বকেয়া পৰিশোধ কৰিব লাগিব।
অৱশ্যে আমেৰিকা যুক্তৰাষ্ট্ৰই এনে কোনো নিয়ম অস্বীকাৰ কৰিছে।ব্লুমবাৰ্গৰ তথ্য অনুসৰি, আমেৰিকা যুক্তৰাষ্ট্ৰ ২০২২ চনৰ পৰা ২০২৩ চনলৈ বিশ্ব স্বাস্থ্য সংস্থাৰ সৰ্ববৃহৎ দাতা আছিল। সংস্থাটোৱে সমগ্ৰ বিশ্বতে ৰোগ নিৰ্ণয় আৰু নিৰ্মূল কৰাৰ বাবে কাম কৰে। আশংকা কৰা হৈছে যে আমেৰিকা যুক্তৰাষ্ট্ৰৰ সংগঠনটোৰ পৰা প্ৰত্যাহাৰে বিশ্বত পলিঅ’ নিৰ্মূলকৰণ, প্ৰসূতি আৰু শিশুৰ পুষ্টিত প্ৰভাৱ পেলাব।
উল্লেখ্য যে আমেৰিকা যুক্তৰাষ্ট্ৰই ৰাষ্ট্ৰসংঘৰ নিয়ন্ত্ৰণত থকা বিশ্ব স্বাস্থ্য সংস্থা (WHO)ক ক’ভিড মহামাৰীৰ সৈতে সঠিকভাৱে মোকাবিলা কৰাত ব্যৰ্থ হোৱা বুলি অভিযোগ কৰিছে। হোৱাইট হাউচে লগতে অভিযোগ কৰিছে যে বিশ্ব স্বাস্থ্য সংস্থা আন দেশৰ দ্বাৰা ৰাজনৈতিকভাৱে প্ৰভাৱিত হৈছে আৰু সংস্থাটো দীৰ্ঘদিন ধৰি সংস্কাৰ কৰা হোৱা নাই।
