গুৱাহাটী (Guwahati) মহানগৰীত জনসাধাৰণৰ নিৰাপত্তাহীনতাৰ দিশটো পুনৰ প্ৰকাশ হ’ল এক ডকাইতি (Robbery) কাণ্ডৰে৷ নিশা যান-বাহনত তালাচী চলোৱাৰ নামত এক সামান্য কাৰ্যৰ বাদে মহানগৰীত আৰক্ষীৰ ভূমিকা পুতৌজনক সেয়া বিভিন্ন সময়ত প্ৰতিপন্ন হৈ আহিছে৷ উল্লেখ্য যে গুৱাহাটী মহানগৰীত গণেশপাৰাৰ স্নেহাশ্ৰয়ত যোৱা নিশা হোৱা ডকাইতিয়ে জনসাধাৰণৰ মনত নিৰাপত্তাৰ দিশটো পুনৰ চিন্তাৰ বিষয় হৈ পৰিছে৷ হিন্দী চিনেমাৰ কায়দাৰে মহানগৰীৰ সদাব্যস্ত গণেশপাৰাত সংঘটিত হৈছিল শিহৰণকাৰী ডকাইতিৰ ঘটনা।
অনিল ডেকা নামৰ এজন ব্যৱসায়ীজনৰ ঘৰত সংঘটিত হয় চাঞ্চল্যকৰ ডকাইতি কাণ্ড। মুখত ক’লা কাপোৰ পৰিধান কৰি হাতত অস্ত্ৰধাৰী ডকাইতৰ দলে চিনেমাৰ কাইদাৰে ৪০ মিনিট ধৰি লুটপাত চলালে স্নেহাশ্ৰয়ত।
জানিব পৰা মতে পত্নী আৰু গাড়ী চালকক পিষ্টল আৰু ডেগাৰেৰে আক্ৰমণ কৰে চাৰিটাকৈ ডকাইতে৷ এখন বগা ৰঙৰ ছুইফট গাড়ীত যোৱা চাৰি ডকাইতে কৰিছিল এই কাণ্ড। ইংলেণ্ডত অধ্যয়ন কৰা কন্যাক থ’বলৈ দিল্লীলৈ গৈছিল ব্যৱসায়ী অনিল ডেকা। তেতিয়া ঘৰত চালক মনোজৰ সৈতে আছিল অনিল ডেকাৰ পত্নী কৰবী ডেকা। তাৰ সুযোগ লৈ ব্যৱসায়ীজনৰ অট্টালিকাটোৰ গেটৰ খুলি বীৰদৰ্পে প্ৰৱেশ কৰিছিল ডকাইতৰ দলটোৱে।
ঘৰটোত সোমাইছিল চাৰিজনীয়া অস্ত্ৰধাৰী ডকাইতৰ দলটো৷ ডকাইতৰ লুটপাতৰ সমগ্ৰ দৃশ্য চিচিটিভি কেমেৰাত বন্দী হৈছিল৷ অস্ত্ৰধাৰী ডকাইতৰ দলে কৰবী ডেকা আৰু চালক মনোজক আক্ৰমণ কৰে। আনকি আঙঠি খুলিব নোৱাৰাত আঙুলি কাটি দিবলৈ উদ্ধত হৈছিল ডকাইতে। প্ৰথমে অস্ত্ৰধাৰী ডকাইতে দাবী কৰিছিল ৫ লাখকৈ টকা। ডকাইতৰ দলে কৰবী ডেকাৰ মুখত পিষ্টল সোমোৱাই দিছিল । ডকাইতৰ দলটোৱে নগদ ধন-সোণকে মূল্যৱান সামগ্ৰী লুট কৰে৷ ঘটনা সন্দৰ্ভত নিশাই ফটাশিল থানাত এজাহাৰ দাখিল কৰে৷ ইতিমধ্যে ফটাশিল আৰক্ষীয়ে তদন্ত আৰম্ভ কৰিছে৷
