এইবাৰ নিৰ্বাসিত ৰাজকুমাৰ ৰেজা পাহলৱীয়ে (Reza Pahalvi) ভাৰত আৰু ইৰাণৰ সম্পৰ্কৰ বিষয়ে মুকলিকৈ প্ৰকাশ কৰিছে। তেওঁ কয় যে যদি তেওঁৰ দেশ ‘স্বাধীন’ হয় তেন্তে ভাৰত আৰু ইৰাণৰ সম্পৰ্ক অধিক ঘনিষ্ঠ হ’ব। দুয়োখন দেশ ওচৰ চাপিব।
ভাৰতৰ প্ৰাক্তন প্ৰধানমন্ত্ৰী ইন্দিৰা গান্ধীৰ ইৰাণ ভ্ৰমণৰ কথাও তেওঁ স্মৰণ কৰে।
ৰাজকুমাৰ পাহলৱী ইৰাণৰ প্ৰাক্তন শাসক ৰেজা শ্বাহ পাহলৱীৰ পুত্ৰ। ৬৫ বছৰীয়া ৰাজকুমাৰজন বৰ্তমান আমেৰিকাত বাস কৰে। ১৯৭৯ চনত তেহৰাণত ইছলামিক বিপ্লৱত পিতৃক উৎখাত কৰাৰ আগৰে পৰাই তেওঁ ইৰাণৰ বাহিৰত বাস কৰি আহিছে।
বৰ্তমান ইৰাণৰ সৰ্বোচ্চ ধৰ্মীয় শাসক আয়াতুল্লাহ আলী খামেইনীৰ বিৰুদ্ধে আৰম্ভ হোৱা গণ আন্দোলনৰ অন্যতম মুখ হৈ পৰিছে পাহলৱী । তেওঁ দেশৰ বাহিৰৰ পৰাই নেতৃত্ব দি আহিছে। তেওঁৰ কথাই বিদ্ৰোহীসকলক অনুপ্ৰাণিত কৰিছে। শুকুৰবাৰে ছচিয়েল মিডিয়াতো ৰাজকুমাৰে ইৰাণৰ জনসাধাৰণক বাৰ্তা প্ৰদান কৰে।
তেওঁ তেওঁলোকক নতুন উদ্যমেৰে ৰাজপথলৈ ওলাই আহিবলৈ আহ্বান জনায়। তেওঁ লিখিছে, “আপোনালোকৰ ক্ষোভ আৰু বিদ্ৰোহৰ কণ্ঠক শক্তিশালী কৰক। সমগ্ৰ বিশ্বই আপোনালোকৰ সাহস দেখিছে। এই বিপ্লৱত সকলোৱে আপোনালোকক সমৰ্থন কৰিব।”
ইৰাণৰ নিৰ্বাসিত ৰাজকুমাৰে শুকুৰবাৰে আমেৰিকাত এক সংবাদমেলত ভাৰতৰ বিষয়টো উত্থাপন কৰি তেওঁ কয়, “গণতান্ত্ৰিক ইৰাণ স্বাধীনতা আৰু সাৰ্বভৌমত্বৰ প্ৰেক্ষাপটত যিকোনো দেশৰ সৈতে ভাল সম্পৰ্ক স্থাপনৰ বাবে প্ৰতিশ্ৰুতিবদ্ধ। ভাৰতত আমি এক চহকী সংস্কৃতি আৰু ইতিহাস লক্ষ্য কৰোঁ। মই ভাবোঁ, এখন দেশ হিচাপে আমি আমাৰ ঐতিহ্যক লৈ গৌৰৱান্বিত। ই সু-সম্পৰ্ক আৰু সহযোগিতাৰ পথ হ’ব পাৰে।” ইন্দিৰা গান্ধীৰ ইৰাণ ভ্ৰমণৰ বিষয়ে উল্লেখ কৰাৰ সময়ত পাহলৱীয়ে কয়, “তেতিয়া মই বহুত সৰু আছিলোঁ। ভাৰত আৰু ইৰাণৰ সম্পৰ্ক অতি পুৰণি।”
বিভিন্ন আন্তঃৰাষ্ট্ৰীয় সংকটত ইৰাণক ভাৰতৰ সহযোগিতাৰ প্ৰয়োজন হ’ব বুলি পাহলৱীয়ে উল্লেখ কৰি কয়, “এতিয়া বিশ্বত আমাৰ সন্মুখত বহু সংকট আছে। শক্তিৰ সমস্যা, শক্তিৰ নাটনিৰ সমস্যা, জনসংখ্যাৰ সমস্যাৰ সৈতে আমি মোকাবিলা কৰিব লাগিব।”
পাহলৱীৰ মতে, বিজ্ঞান আৰু প্ৰযুক্তিবিদ্যাৰ ক্ষেত্ৰত ভাৰতৰ স্থিতি আগৰণুৱা। সেয়েহে তেওঁ ইৰাণ আৰু ভাৰতৰ মাজত প্ৰযুক্তি আৰু ব্যৱসায়ৰ বিভিন্ন ক্ষেত্ৰত পাৰস্পৰিক সহযোগিতা দেখিবলৈ বিচাৰে। তেওঁ কয়, “মই আশা কৰিছোঁ যেতিয়া আমি স্বাধীন হ’ম তেতিয়া আমি সকলো নতুনকৈ আৰম্ভ কৰিব পাৰিম।”
দুসপ্তাহতকৈও অধিক সময় ধৰি ইৰাণত এই বিদ্ৰোহ চলি আছে। খামেইনীৰ ধৰ্মীয় শাসন উৎখাত কৰিবলৈ ৰাজপথলৈ ওলাই আহিছে জনসাধাৰণ। কঠোৰভাৱে দমন কৰা হৈছে বিদ্ৰোহ। এতিয়ালৈকে এই আন্দোলনত ২৬০০ৰো অধিক লোকৰ মৃত্যু হৈছে।
আমেৰিকাৰ ৰাষ্ট্ৰপতি ড’নাল্ড ট্ৰাম্পে বিদ্ৰোহীৰ কাষত থিয় দি খামেইনীক কেইবাবাৰো সকীয়াই দিছে। ইৰাণত সামৰিক কাৰ্যকলাপৰ কথাও তেওঁ কৈছে। অৱশ্যে যোৱা কিছুদিনত ইৰাণ কিছু শান্ত হৈছে। ট্ৰাম্পেও নিজৰ সুৰ কোমল কৰিছে। এনে অৱস্থাত নিৰ্বাসিত ৰাজকুমাৰে দেশবাসীক পুনৰ জাগ্ৰত হ’বলৈ আহ্বান জনায়।
