হিমাচল প্ৰদেশৰ ছিৰমৌৰত এখন বাছ খাৱৈত (Himachal Bus Accident) পৰি ১৪ জন লোকৰ মৃত্যু হয়। আনহাতে, আহত হয় কমেও ৩০ জন। শুকুৰবাৰে পুৱা সংঘটিত হয় এই দুৰ্ঘটনা।
জানিব পৰা মতে, চোলানৰ পৰা হৰিপুৰলৈ গৈ থকা এখন ব্যক্তিগত বাছে পাহাৰীয়া পথ এটাত ঘূৰাৰ সময়তে নিয়ন্ত্ৰণ হেৰুৱাই খাৱৈত ওলটি পৰে। প্ৰত্যক্ষদৰ্শীয়ে জনোৱা মতে, বাছখনে নিয়ন্ত্ৰণ হেৰুৱাই খাৱৈত পৰাৰ লগে লগে ভিতৰত থকা যাত্ৰীসকলে নিৰাপত্তাৰ বাবে চিঞৰিবলৈ আৰম্ভ কৰে। স্থানীয় ৰাইজে প্ৰথমে উদ্ধাৰ অভিযান আৰম্ভ কৰে।
এই ঘটনাৰ খবৰ পোৱাৰ পিছতে ঘটনাস্থলীত উপস্থিত হয় আৰক্ষী আৰু উদ্ধাৰকাৰী দল। তেওঁলোকে ভিতৰত আবদ্ধ হৈ পৰা যাত্ৰীসকলক উদ্ধাৰ চেষ্টা কৰে। আহতসকলক উদ্ধাৰ কৰি চিকিৎসালয়ত ভৰ্তি কৰোৱা হয়। আৰক্ষীৰ সূত্ৰ অনুসৰি, দুৰ্ঘটনা সংঘটিত হোৱাৰ লগে লগে ৮ জন লোকৰ মৃত্যু হয়। দীৰ্ঘসময় প্ৰচেষ্টাৰ অন্তত যাত্ৰীসকলক উদ্ধাৰ কৰা হয়।
আৰক্ষীয়ে জনোৱা মতে, প্ৰথম অৱস্থাত কুঁৱলীৰ বাবে পথৰ ভাঁজটো চালকজনে ধৰিব নোৱাৰি নিয়ন্ত্ৰণ হেৰুৱাই পেলোৱা বুলি অনুমান কৰা হৈছে। অৱশ্যে দুৰ্ঘটনাৰ সঠিক কাৰণ নিৰ্ণয়ৰ বাবে প্ৰচেষ্টা অব্যাহত আছে।
