হিমালয় অঞ্চলত প্ৰচণ্ড তুষাৰপাত (Heavy snowfall)ৰ বাবে উত্তৰ, উত্তৰ-পূব আৰু মধ্য ভাৰতৰ প্ৰায়বোৰ ৰাজ্যতে তাপমাত্ৰা (Temperature in almost all states) যথেষ্ট হ্ৰাস পাইছে (Has decreased sufficiently)। কিছু ঠাইত নূন্যতম উষ্ণতা বহু তললৈ নামি গৈছে। কোনো কোনো ঠাইত ১ৰ পৰা ১০ ডিগ্ৰীৰ আশে-পাশে আছে। ইতিমধ্যে ১৫ খনতকৈও অধিক ৰাজ্যত শীতপ্ৰবাহৰ সতৰ্কবাণী জাৰি কৰা হৈছে। কেৱল সেয়াই নহয়, বতৰ বিজ্ঞান বিভাগে ঠাণ্ডাৰ লগতে ঘন কুঁৱলীৰ উপস্থিতিৰ ইংগিতো দিছে।
মধ্যপ্ৰদেশৰ শ্বাহদোলৰ কল্যাণপুৰৰ তাপমাত্ৰা ২ ডিগ্ৰী চেলছিয়াছলৈ হ্ৰাস পাইছে। আনহাতে, ৰাজস্থানৰ চাৰিখন চহৰৰ নূন্যতম উষ্ণতা ৫ ডিগ্ৰীৰ তলত। ৰাজ্যখনৰ ২৩ খন জিলাত বৃহস্পতিবাৰে কুঁৱলীৰ প্ৰভাৱ পৰিব বুলিও বতৰ বিজ্ঞান বিভাগে প্ৰকাশ কৰিছে। শীতপ্ৰবাহৰ সতৰ্কবাণীৰ বাবে ৰাজস্থানৰ ২৫ খন জিলাত বিদ্যালয় বন্ধ কৰিবলৈ নিৰ্দেশ দিয়া হৈছে। হিমালয়ৰ উত্তৰাখণ্ড ৰাজ্যৰ তিনিখন চহৰত তাপমাত্ৰা ২ ডিগ্ৰীলৈ হ্ৰাস পাইছে। ইয়াৰ ভিতৰত আছে পিথোৰাগড়ৰ আদি কৈলাস, ৰুদ্ৰপ্ৰয়াগৰ কেদাৰনাথ, উত্তৰকাশীৰ যমুনোত্ৰি ধাম আদি।
উত্তৰ প্ৰদেশৰ বাৰাণসী, মীৰাট, ঝান্সীকে ধৰি ৩৮ খন জিলাত ঘন কুঁৱলীৰ সতৰ্কবাণী জাৰি কৰা হৈছে। আনহাতে, বতৰ বিজ্ঞান বিভাগে লক্ষ্ণৌ আৰু কানপুৰকে ধৰি ২৬ খন জিলাত শীত প্ৰৱাহৰ ভৱিষ্যদ্বাণী কৰিছে। শুকুৰবাৰৰ পৰা পাহাৰীয়া ৰাজ্যসমূহত তুষাৰপাত বৃদ্ধি পাব পাৰে। শনিবাৰে উত্তৰ প্ৰদেশ, ৰাজস্থান, বিহাৰ, মধ্যপ্ৰদেশ, ঝাৰখণ্ড, ছত্তীশগড়, পঞ্জাব, হাৰিয়ানাত বৰষুণ হোৱাৰ সম্ভাৱনা আছে। বিহাৰৰ ৩৭ খন জিলাৰ নূন্যতম তাপমাত্ৰা ১০ ডিগ্ৰীৰ আশে-পাশে আছে। হাৰিয়ানাৰ কেইবাখনো জিলাত শীত প্ৰৱাহৰ সতৰ্কবাণী জাৰি কৰা হৈছে। ঘন কুঁৱলীৰ বাবে উত্তৰ ভাৰতলৈ যোৱা আৰু উত্তৰ ভাৰতৰ পৰা দেশৰ অন্যান্য অঞ্চললৈ যোৱা দীৰ্ঘ দূৰত্বৰ ৰে’লবোৰ পলমকৈ চলি আছে। বিমান সেৱাও ব্যাহত হৈ পৰিছে।
বতৰ বিজ্ঞান কেন্দ্ৰই জনোৱা মতে, অসমকে (Assam) ধৰি হিমাচল প্ৰদেশ, পঞ্জাব, হাৰিয়ানা, বিহাৰ, পশ্চিমবংগ, ওড়িশা, ছিকিম, মেঘালয়, ত্ৰিপুৰা, মিজোৰাম, মণিপুৰ, নাগালেণ্ড, ৰাজস্থান, মধ্যপ্ৰদেশ, ছত্তীশগড় আৰু উত্তৰাখণ্ডত শীত প্ৰৱাহ অব্যাহত থাকিব। তদুপৰি দিল্লী, জম্মু-কাশ্মীৰ আৰু চণ্ডীগড়ৰ বাবে এলাৰ্ট জাৰি কৰা হৈছে।
