নতুনকৈ কোনোধৰণৰ অশান্তিকৰ পৰিস্থিতিৰ সৃষ্টি নহ’লেও পশ্চিম কাৰ্বি আংলঙ (West Karbi Anglong)ত এতিয়াও এক চেপা উত্তেজনাই বিৰাজ কৰি আছে। আনহাতে, অৰ্ধসামৰিক বাহিনী, আৰক্ষীৰ সমান্তৰালকৈ সেনাবাহিনীয়ে পৰিস্থিতিৰ ওপৰত চোকা দৃষ্টি ৰাখিছে। অৱশ্যে তাৰ মাজতে বৃহস্পতিবাৰেও ঠায়ে ঠায়ে কিছু উত্তেজনাৰ সৃষ্টি হয় যদিও কোনো ধৰণৰ নতুন অশান্তিকৰ (New unrest) পৰিস্থিতিৰ সৃষ্টি হোৱা নাই (Not created)। কিন্তু এতিয়াও অশান্তজৰ্জৰ অঞ্চলসমূহত বৃহৎ সংখ্যক আৰক্ষী জোৱান মোতায়েন হৈ আছে। পৰিস্থিতি নিয়ন্ত্ৰণৰ বাবে অৰ্ধসামৰিক আৰু সেনা জোৱানকো মোতায়েন কৰা হৈছে।
উল্লেখ্য যে বহিৰাগতক উচ্ছেদক লৈ বহু দিন ধৰি উত্তেজনা অব্যাহত আছে কাৰ্বি আংলং আৰু পশ্চিম কাৰ্বি আংলঙত। বিশেষকৈ জনজাতীয় অঞ্চলত হিন্দীভাষীয়ে ভূমি বেদখল কৰাৰ অভিযোগক লৈ স্থানীয় কাৰ্বি দল-সংগঠন আৰু বহিৰাগতৰ মাজত সংঘাতৰ সৃষ্টি হৈছে। কাৰ্বি দল-সংগঠনে ভূমি বেদখলৰ বিৰুদ্ধে প্ৰতিবাদ সাব্যস্ত কৰি আহিছে। তাৰ মাজতে মঙলবাৰে খবৰ বিয়পি পৰে যে আৰক্ষীয়ে কাৰ্বি নেতাক আটক কৰি লৈ গৈছে। তেতিয়াৰ পৰাই পৰিস্থিতি উত্তপ্ত হৈ পৰে।
এই উত্তেজনা দুদিন ধৰি অব্যাহত থাকে। মঙলবাৰে চি ই এম তুলিৰাম ৰংহাঙৰ পিতৃগৃহ জ্বলাই দিয়াৰ লগতে বুধবাৰেও কেইবাঠাইতো অগ্নিসংযোগ কৰা হয়। জ্বলাই দিয়া হয় বজাৰ, দোকান তথা বাহন। আনহাতে, এই ঘটনাত এজন লোক জীৱন্তে অগ্নিদগ্ধ হোৱাৰ লগতে আৰক্ষীৰ গুলীত আন এজনৰ মৃত্যু হয়। ইয়াৰ পিছত অৱশ্যে বৃহস্পতিবাৰে দিনটো পৰিস্থিতি কিছু স্বাভাৱিক হয় আৰু নতুনকৈ কোনো অশান্তিৰ খবৰ পোৱা হোৱা নাই। এগৰাকী শীৰ্ষ বিষয়াই জনোৱা মতে, “পৰিস্থিতি শান্ত এতিয়া। কোনো ধৰণৰ অশান্তিৰ খবৰ পোৱা নাই। আমাৰ বাহিনী সকলো স্থানতে মোতায়েন কৰা হৈছে। সকলো স্পৰ্শকাতৰ অঞ্চলত টহল দি আছে।” তেওঁ লগতে কয় যে অসম আৰক্ষী, ৰেপিড একচন ফ’ৰ্চ (আৰ এ এফ) আৰু চি আৰ পি এফৰ লগতে সেনা জোৱানকো অঞ্চলটোত মোতায়েন কৰা হৈছে।
উল্লেখ্য যে এই ঘটনাত নিহত দুয়োজনৰে মৃতদেহৰ শেষকৃত্য বুধবাৰে নিশা শান্তিপূৰ্ণভাৱে সম্পন্ন কৰা হয়। লগতে বিভিন্ন কাৰ্বি দল-সংগঠনে মৃতকলৈ শ্ৰদ্ধাঞ্জলি জ্ঞাপন কৰে।
ইফালে এই ঘটনাত সৰ্বাধিক ক্ষতিগ্ৰস্ত হৈছে পশ্চিম কাৰ্বি আংলং জিলাৰ খেৰণি অঞ্চল। কাৰ্বি জনগোষ্ঠীৰ লগতে এই অঞ্চলত বিহাৰী, বঙালী আৰু নেপালীয়েও বসবাস কৰে। আনহাতে, অশান্তিকৰ পৰিস্থিতিৰ সৃষ্টি হোৱাৰ পিছতে আইন-শৃংখলা বজাই ৰাখিবলৈ অঞ্চলটোত সান্ধ্য আইন জাৰি কৰা হয়। মোবাইল ইণ্টাৰনেট সেৱাও বন্ধ কৰি দিয়া হয়। অৱশ্যে নতুনকৈ কোনো অশান্তিকৰ পৰিস্থিতিৰ সৃষ্টি হোৱা নাই যদিও বৰ্তমানো সান্ধ্য আইন প্ৰত্যাহাৰ কৰা হোৱা নাই আৰু মোবাইল ইণ্টাৰনেট সেৱাও বন্ধ আছে।
