প্ৰধানমন্ত্ৰী নৰেন্দ্ৰ মোদীয়ে (Narendra Modi) এন ডি এ মিত্ৰজোঁটৰ সকলো সাংসদকে নিজৰ বাসগৃহত নৈশ আহাৰ গ্ৰহণ কৰিবলৈ নিমন্ত্ৰণ জনায়। বৃহস্পতিবাৰে বিজেপিৰ ৪০১ জন সাংসদ আৰু এন ডি এৰ অন্যান্য অংশীদাৰসকলে এই আমন্ত্ৰণ গ্ৰহণ কৰে।
খোৱা টেবুলত যেন এখন ‘মিনি ভাৰত’ গঢ় লৈ উঠে। কাৰণ বিভিন্ন ৰাজ্য আৰু বিভিন্ন দলৰ সাংসদ প্ৰতিখন টেবুলত বহিছিল। তেওঁলোকৰ মাজত সমন্বয়ৰ দায়িত্বত আছিল মন্ত্ৰী আৰু ৰাজ্যিক মন্ত্ৰীসকল। নৈশ আহাৰৰ আড্ডা ডেৰ-দুঘণ্টাৰো অধিক সময় ধৰি চলে।
বিজেপিৰ সূত্ৰ অনুসৰি, প্ৰধানমন্ত্ৰীয়ে নৈশ আহাৰত অংশগ্ৰহণ কৰি সকলো সাংসদৰ সৈতে কুশল বাৰ্তা আদান-প্ৰদান কৰে। দীৰ্ঘদিন ধৰি এন ডি এৰ সাংসদসকলক নিজৰ ঘৰলৈ নিমন্ত্ৰণ কৰি একেলগে আহাৰ গ্ৰহণ কৰাৰ ইচ্ছা আছিল বুলিও তেওঁ কয়। বৃহস্পতিবাৰে তেওঁ সেই ইচ্ছা পূৰণ কৰে।
সূত্ৰ অনুসৰি, প্ৰতিখন টেবুলত সাতৰ পৰা আঠজন সাংসদ বহিব পৰা ব্যৱস্থা আছিল। বহাৰ ব্যৱস্থা এনেদৰে কৰা হৈছিল যে প্ৰতিখন টেবুলত অন্ততঃ এজনকৈ মন্ত্ৰী বা ৰাজ্যিক মন্ত্ৰী আছিল। একেখন ৰাজ্যৰ এজনতকৈ অধিক সাংসদক একেলগে ৰখাৰ পৰিৱৰ্তে বিভিন্ন ৰাজ্য আৰু বিভিন্ন অংশীদাৰ দলৰ সাংসদক একেলগে বহিবলৈ কোৱা হৈছিল।
আনহাতে, সূত্ৰ অনুসৰি প্ৰধানমন্ত্ৰীৰ বাসগৃহৰ নৈশভোজৰ মেনু নিৰামিষ শৈলীত সজাই থোৱা হৈছিল। কেইবাবিধো নিৰামিষ চুপ, কাটলেট, কোপ্টা, দালি, বিভিন্ন ধৰণৰ ফলমূল আৰু ফলৰ ৰস আছিল। ইয়াৰ বাহিৰেও ৰুটী, পৰঠা আৰু বিশেষ ধৰণৰ ভাজি ভাত মেনুত আছিল।
প্ৰধানমন্ত্ৰীৰ বাসগৃহত আয়োজন কৰা এন ডি এৰ সাংসদসকলৰ এই নৈশ আহাৰক লৈ গোপনীয়তা আৰু সতৰ্কতাও অৱলম্বন কৰা হৈছিল। সংসদ ভৱনৰ পৰা প্ৰধানমন্ত্ৰীৰ বাসগৃহলৈ লৈ যোৱা বাছখনত নিৰাপত্তাৰ দায়িত্বত আছিল এছ পি জি। সকলোৱে মোবাইল ফোন জমা ৰাখি ভিতৰলৈ সোমাবলগা হয়।
