অসম কেবিনেটে কালি ভৈয়াম কাৰ্বি সকলৰ বাবে এখন উন্নয়ন পৰিষদ গঠনৰ বাবে লোৱা প্ৰস্তাৱক আদৰণি জনাইছে কাৰ্বি আংলং জিলাৰ প্ৰাক্তন ছয় বিদ্রোহী সংগঠনৰ নেতৃবর্গই।
আজি ডিফুত এখন সংবাদ মেল সম্বোধন কৰি সংগঠনটোৰ নেতাসকলে কয় যে ছয় সংগঠনৰ সৈতে হোৱা চুক্তিৰ ৩.৬ দফাৰ এই দাবী অসম চৰকাৰে সমাধা কৰাৰ বাবে আমি অসম চৰকাৰক ধন্যবাদ জ্ঞাপন কৰিছো।
অসমৰ মুখ্যমন্ত্ৰীয়ে ভৈয়াম কাৰ্বি সংগঠন সমূহৰ সৈতে হোৱা আলোচনাত অতি শীঘ্রে এই দাবী পূৰণ কৰা হ’ব বুলি আশ্বাস প্রদান কৰিছিল বুলি প্রাক্তন বিদ্রোহী নেতা সংবিজিত ইংতি কাথাৰে জানিবলৈ দিয়ে। বিদ্রোহী সংগঠনৰ প্ৰাক্তন নেতা সকলে লগতে কয় যে- শান্তি চুক্তিৰ ৩.৫দফা অনুসৰি ভৈয়াম কাৰ্বি সকলক ষষ্ঠ অনুসূচীৰ অন্তৰ্ভূক্ত কৰাৰ দাবীও শীঘ্ৰে পূৰণ হ’ব বুলি তেওঁলোক আশাবাদী।
শান্তি চুক্তিৰ কেইটামান দফা আগন্তুক সংসদৰ শীতকালীন অধিবেশনত পূৰণ হোৱাৰো আশা প্রকাশ কৰে নেতাসকলে। ইয়াৰ লগতে এখন স্বায়ত্ত শাসিত ৰাজ্য দাবী সন্দর্ভতো চৰকাৰে গুৰুত্বসহকাৰে বিবেচনা কৰি আছে বুলিও তেওঁলোকে দাবী কৰে। সংসদৰ আগন্তুক অধিবেশনত সংবিধানৰ ১২৫তম সংশোধনীও হোৱাৰ সম্ভাৱনা আছে বুলি কয় নেতাসকলে।
সংবিজিত ইংতি কাথাৰে সংবাদ মাধ্যমৰ আগত কয় যে- সংগঠনৰ কিছু সদস্যৰ ওপৰত এতিয়াও গোচৰ আছে আৰু ৭৫শতাংশ গোচৰ ইতিমধ্যে শেষ কৰা হৈছে বাকিখিনিও অতি শীঘ্রে সমাপ্ত হ’ব বুলি আসা প্রকাশ কৰে। ছয় সংগঠনৰ সৈতে হোৱা শান্তি চুক্তিব ৮০ শতাংশ ইতিমধ্যে পূৰণ হোৱা বুলি উল্লেখ কৰি বাকি ২০ শতাংশ পৰৱৰ্তী চৰকাৰ গঠন হোৱাৰ পূর্বেই সম্পূর্ণ হ’ব বুলি আশা প্রকাশ কৰে।
