বিহাৰৰ ৰাজনৈতিক পৰিৱেশত এক নতুন অধ্যায় আৰম্ভ হ’বলৈ গৈ আছে। বুধবাৰে জনতা দল (ইউনাইটেড) বিধায়িনী দলৰ নেতা হিচাপে নিৰ্বাচিত হয় নীতিশ কুমাৰ (Nitish Kumar)। আনহাতে, দিনটোৰ শেষৰ ফালে তেওঁক এন ডি এৰ নেতা হিচাপেও নিৰ্বাচিত কৰা হয়।
ইয়াৰ লগে লগে নীতিশ কুমাৰে অভিলেখ সংখ্যক দশমবাৰৰ বাবে বিহাৰৰ মুখ্যমন্ত্ৰী হিচাপে শপত লোৱাৰ পথ হয়। বৃহস্পতিবাৰে পাটনাত এক আড়ম্বৰপূৰ্ণ অনুষ্ঠানত নীতিশ কুমাৰে অভিলেখ ৰচনা কৰি বিহাৰৰ মুখ্যমন্ত্ৰী হিচাপে শপত গ্ৰহণ কৰিব। এই অনুষ্ঠানত উপস্থিত থাকিব প্ৰধানমন্ত্ৰী নৰেন্দ্ৰ মোদীকে ধৰি এন ডি এৰ বিভিন্ন নেতাসকল।
ইতিমধ্যে তেওঁ বিহাৰৰ ৰাজ্যপাল আৰিফ মহম্মদ খানক বিদায়ী মুখ্যমন্ত্ৰী হিচাপে পদত্যাগ পত্ৰ দাখিল কৰি নতুন চৰকাৰ গঠনৰ দাবী জনাইছে। ২০ নৱেম্বৰত পাটনাৰ গান্ধী মৈদানত নীতিশ কুমাৰৰ সৈতে কমেও ২০ জন মন্ত্ৰীয়ে শপত লোৱাৰ সম্ভাৱনা আছে বুলি চৰকাৰী সূত্ৰই প্ৰকাশ কৰিছে।
পুৱা ১১.৩০ বজাত ঐতিহাসিক গান্ধী ময়দানত শপতগ্ৰহণ অনুষ্ঠানত প্ৰধানমন্ত্ৰী নৰেন্দ্ৰ মোডী, কেন্দ্ৰীয় গৃহমন্ত্ৰী অমিত শ্বাহ, কেইবাজনো কেন্দ্ৰীয় মন্ত্ৰী আৰু এন ডি এশাসিত বিভিন্ন ৰাজ্যৰ মুখ্যমন্ত্ৰীসকল উপস্থিত থাকিব। ইতিমধ্যে উপ-মুখ্যমন্ত্ৰী হিচাপে সৰ্বসন্মতিক্ৰমে নিৰ্বাচিত হৈছে বিদায়ী বিহাৰৰ চৰকাৰৰ উপ-মুখ্যমন্ত্ৰী সম্ৰাট চৌধুৰী আৰু বিজয় সিনহা।
উল্লেখ্য যে শেহতীয়া বিহাৰ বিধানসভা নিৰ্বাচনত এন ডি এ মিত্ৰজোঁট অৰ্থাৎ জে ডি ইউ আৰু বিজেপিয়ে ২৪৩ জনীয়া বিধানসভাত ২০২ খন আসন লাভ কৰে।
