অসমীয়াৰ হিয়াৰ আমঠু, প্ৰাণৰ শিল্পী, ঐশ্বৰ পুত্ৰ জুবিন গাৰ্গৰ (Zubeen Garg) কায়িক অনুপস্থিতিত ভগ্ন হৃদয়েৰেই ৰাজ্যবাসীয়ে আজি উদযাপন কৰে জন্মদিন। ৫৩ বছৰীয়া এই জন্মদিন মঙলবাৰে সমগ্ৰ ৰাজ্যজুৰি তেওঁৰ অনুৰাগীসকলে বিভিন্ন কাৰ্যসূচীৰে আনুষ্ঠিত কৰিছে।
কায়িকভাৱে উপস্থিত নাথাকিলে কি হ’ল, প্ৰাণৰ শিল্পীগৰাকী মানুহৰ মাজত থকা সময়তকৈও বিশাল আৰু গাম্ভীৰ্যপূৰ্ণভাৱে জন্মদিন উদযাপন কৰি ৰাজ্যবাসীয়ে দেখুৱাইছে তেওঁৰ প্ৰতি কিমান মৰম আৰু ভালপোৱা আছে।
সোমবাৰে মাজনিশা ১২ বজাত জুবিন ক্ষেত্ৰত আয়োজন কৰা হয় জুবিন গাৰ্গৰ ৫৩ সংখ্যক জন্মজয়ন্তীৰ কেন্দ্ৰীয় অনুষ্ঠান। পত্নী গৰিমা গাৰ্গে অশ্ৰুসিক্ত নয়নেৰে হাজাৰ হাজাৰ অনুৰাগীৰ উপস্থিতিত কেক কাটি মৰমৰ গল্ডীৰ জন্মদিন উদযাপন কৰে।
কিন্তু সেই মুহূৰ্তত প্ৰিয় মানুহজনৰ অনুপস্থিতি বাৰুকৈয়ে উপলব্ধি কৰে এইগৰাকী লৌহ মানৱীয়ে। যাৰ বাবে তেওঁৰ বুকুত কঢ়িয়াই লৈ ফুৰা দুখৰ সাগৰখন বান্ধ ভাঙি ওলাই অহাক বাধা দি ৰাখিব নোৱাৰিলে। হুকহুকাই কান্দি বুকুৰ দুখবোৰ চকুলোৰে বোৱাই দিয়ে। সমগ্ৰ জুবিন ক্ষেত্ৰ এক আবেগ আৰু কৰুণ পৰিৱেশত ডুব যায়।
সকলোৰে কণ্ঠত মাত্ৰা জুবিনদা, জুবিনদা, জুবিনদা অমৰ হওক… মায়াবিনী ৰাতিৰ বুকুত…
একেদৰে সোমবাৰে নিশাৰ পৰা মঙলবাৰে দিনটোলৈকে জুবিন ক্ষেত্ৰত অনুৰাগীয়ে আয়োজন কৰিছে জুবিন গাৰ্গক স্মৰণৰ বিশেষ অনুষ্ঠান। ৰাজ্যৰ অন্যান্য প্ৰান্ততো কালজয়ী শিল্পীগৰাকীক জন্মদিনৰ শুভেচ্ছাৰে উপচাই দিয়ে, লগতে গীত-মাত-কথাৰে প্ৰাণৰ শিল্পীগৰাকীক স্মৰণ কৰে।
আনহাতে, জুবিন গাৰ্গৰ কাহিলিপাৰাস্থিত বাসগৃহৰ লগতে তেওঁৰ ষ্টুডিঅ’তো অনুৰাগীসকলে সোমবাৰে মাজনিশা জন্মদিন উদযাপন কৰে। ইয়াৰ উপৰি মঙলবাৰে পুৱা কাহিলিপাৰাস্থিত বাসগৃহত পুৱাৰে পৰা আয়তীসকলে দিহানামেৰে জুবিন গাৰ্গলৈ শ্ৰদ্ধাঞ্জলি জনোৱাৰ লগতে গায়ন-বায়নেৰে মুখৰিত হৈ পৰে।
ইয়াৰ লগতে জুবিন গাৰ্গৰ বাসগৃহৰ পদূলিত থকা তেওঁৰ প্ৰিয় বকুলজোপাৰ কাষত উন্মোচন কৰা হয় তেওঁৰ এটা আৱক্ষ মূৰ্তি। পিতৃ কপিল বৰঠাকুৰে উন্মোচন কৰাৰ সময়ত পত্নী গৰিমা শইকীয়া গাৰ্গ, পৰিয়ালবৰ্গৰ লগতে অজস্ৰ গুণমুগ্ধ উপস্থিত থাকে। এই আৱক্ষ মূৰ্তিটো তৈয়াৰ কৰিছে শিল্পী জ্যোতিশংকৰ ভটাচাৰ্যই।
মুখ্যমন্ত্ৰীৰ বিশেষ পোষ্ট
ইফালে জুবিন গাৰ্গৰ ৫৩ সংখ্য জন্মবাৰ্ষিকী উপলক্ষে মুখ্যমন্ত্ৰী ডঃ হিমন্ত বিশ্ব শৰ্মাই শিল্পীগৰাকীক স্মৰণ কৰি সামাজিক মাধ্যমত এটা পোষ্ট দিয়ে। পোষ্টটোত জুবিনৰ জীৱন আৰু কৰ্মক সুঁৱৰি শিল্পীগৰাকীক শ্ৰদ্ধাঞ্জলি জ্ঞাপন কৰে।
পোষ্টটোত তেওঁ লিখিছে, “জুবিন গার্গ— আপোনাৰ, মোৰ সকলোৰে হিয়াত গুঞ্জৰিত এটি সত্তাৰ নাম। আজি তেওঁৰ অবর্তমানত প্রথমটো ওপজা দিন। এই বিশেষ দিনটোত প্রাণৰ শিল্পীগৰাকীলৈ ৰাজ্যবাসীৰ হৈ জনালোঁ গভীৰ শ্রদ্ধার্ঘ্য।”
