জুবিন গাৰ্গৰ (Zubeen Garg) মৃত্যুৰ তদন্তৰ বাবে ছিংগাপুৰলৈ যাব অসম আৰক্ষীৰ এছ আই টি৷ ২০ অক্টোবৰত এই দলটো ছিংগাপুৰলৈ যাব৷
দলটোৰ নেতৃত্ব দিব এছ আই টিৰ মুৰব্বী তথা বিশেষ অতিৰিক্ত আৰক্ষী সঞ্চালক প্ৰধান মুন্না প্ৰসাদ গুপ্তাই। দলটোৱে ২১ অক্টোবৰত ছিংগাপুৰ আৰক্ষীক সাক্ষাৎ কৰিব। মুখ্যমন্ত্ৰী হিমন্ত বিশ্ব শৰ্মাই সামাজিক মাধ্যমযোগে এই কথা জনাইছে।
তেওঁ লিখিছে, “আমাৰ প্ৰিয় জুবিন গাৰ্গৰ ন্যায়ৰ দিশে আৰু এখোজ আগুৱাই যাবলৈ সক্ষম হৈছোঁ৷ অহা ২১ অক্টোবৰত ছিংগাপুৰ আৰক্ষী কৰ্তৃপক্ষই অতিৰিক্ত আৰক্ষী সঞ্চালকপ্ৰধান আৰু বিশেষ তদন্তকাৰী গোটৰ (SIT) মুৰব্বী বিষয়া শ্ৰীমুন্না গুপ্তাৰ নেতৃত্বত অসমৰ আৰক্ষী দলৰ সৈতে সাক্ষাতত মিলিত হ’ব।”
সামাজিক মাধ্যমত মুখ্যমন্ত্ৰীয়ে লগতে লিখিছে, “আমাৰ ঐক্যবদ্ধ সংকল্প— জুবিনৰ ন্যায়ে নিশ্চয়েই মৰ্যাদা পাব।”
