উৎসৱৰ বতৰত কেন্দ্ৰীয় চৰকাৰৰ কৰ্মচাৰীৰ বাবে সুখবৰ দিলে নৰেন্দ্ৰ মোদী চৰকাৰে (PM Modi) । কেন্দ্ৰীয় কেবিনেটে মহাৰ্ঘ ভাট্টা (ডি এ) আৰু তিনি শতাংশ বৃদ্ধিৰ অনুমোদন জনাইছে। বুধবাৰে এই মন্তব্য কৰে কেন্দ্ৰীয় মন্ত্ৰী অশ্বিনী বৈষ্ণৱে। ডি এ বৃদ্ধিৰ সুবিধা লাভ কৰিব পেঞ্চনাৰসকলেও।
মোদী চৰকাৰে চলিত বৰ্ষৰ আৰম্ভণিতে দুই শতাংশ ডি এ বৃদ্ধি কৰাৰ সিদ্ধান্ত লৈছিল। নতুন হাৰত ডি এ যোৱা মাৰ্চ মাহৰ পৰা কাৰ্যকৰী হৈছিল। ইয়াৰ পিছত কেন্দ্ৰই পুনৰ ডি এ বৃদ্ধি কৰাৰ সিদ্ধান্ত লয়। চলিত বৰ্ষৰ জুলাইৰ পৰা সেই হাৰত চৰকাৰী কৰ্মচাৰীক ডি এ দিয়া হ’ব। সূত্ৰ অনুসৰি, দেশৰ ১.২ কোটি চৰকাৰী কৰ্মচাৰী আৰু পেঞ্চনাৰে এই সুবিধা লাভ কৰিব। বৰ্তমান কেন্দ্ৰীয় চৰকাৰৰ কৰ্মচাৰীয়ে মূল দৰমহাৰ ৫৫ শতাংশ হাৰত ডি এ লাভ কৰে। এইবাৰ ৫৮ শতাংশলৈ বৃদ্ধি পাইছে।
কেন্দ্ৰীয় চৰকাৰৰ কৰ্মচাৰীৰ বছৰত দুবাৰকৈ ডি এ বৃদ্ধি পায়। চৰকাৰী কৰ্মচাৰীয়ে জানুৱাৰী আৰু জুলাই মাহত ডি এ লাভ কৰে। মন কৰিবলগীয়া যে যিহেতু কেন্দ্ৰই জুলাইৰ পৰা নতুন হাৰত ডি এ লাভ কৰিব বুলি ঘোষণা কৰিছে, গতিকে চৰকাৰী কৰ্মচাৰীয়ে অক্টোবৰৰ দৰমহাৰ লগতে যোৱা তিনিমাহৰ ডি এ লাভ কৰিব। পেঞ্চনাৰসকলৰ ক্ষেত্ৰতো একে নিয়ম প্ৰযোজ্য।
