দুদিনীয়া ভ্ৰমণসূচীৰে বৃহস্পতিবাৰে গুৱাহাটীত উপস্থিত হোৱা কেন্দ্ৰীয় গৃহমন্ত্ৰী অমিত শ্বাহে (Amit Shah) শুকুৰবাৰে পুৱা উজনবজাৰত নৱনির্মিত ৰাজভৱনৰ শুভ উদ্বোধন কৰে।
অনুষ্ঠানত উপস্থিত থাকে ৰাজ্যপাল লক্ষ্মণ প্ৰসাদ আচাৰ্য, মুখ্যমন্ত্ৰী ডঃ হিমন্ত বিশ্ব শৰ্মা, কেন্দ্ৰীয় মন্ত্ৰী সৰ্বানন্দ সোনোৱালকে ধৰি অসম চৰকাৰৰ মন্ত্ৰীসকল আৰু উচ্চ পদস্থ বিষয়াসকল। গৃহমন্ত্ৰীয়ে নৱনির্মিত ৰাজভৱন উদ্বোধনৰ লগতে আনকেইবাটাও প্ৰকল্পৰ শুভাৰম্ভ কৰে।
এই অনুষ্ঠান সন্দৰ্ভত মুখ্যমন্ত্ৰী ডঃ হিমন্ত বিশ্ব শৰ্মাই কয়, “অসমৰ বাবে আজি এটা উল্লেখনীয় দিন হিচাপে বিবেচিত হ’ব। আজি মাননীয় কেন্দ্ৰীয় গৃহ আৰু সমবায় বিভাগৰ মন্ত্ৰী অমিত শ্বাহ ডাঙৰীয়াই মাননীয় ৰাজ্যপাল লক্ষ্মণ প্রসাদ আচার্য আৰু আন বিশিষ্ট ব্যক্তিসকলৰ উপস্থিতিত খাৰঘুলিত ৰাজভৱনৰ ব্ৰহ্মপুত্ৰ উইং উদ্বোধন কৰা সময়ত তেখেতৰ সংগ প্ৰদান কৰি অতি আনন্দিত হওঁ৷
মাননীয় কেন্দ্ৰীয় গৃহমন্ত্ৰীগৰাকীয়ে লগতে দেৰগাঁৱৰ লাচিত বৰফুকন পুলিচ একাডেমীত ৰাষ্ট্ৰীয় চাইবাৰ ক্ৰাইম ফৰেনছিক লেবৰেটৰীৰ অনুসন্ধান কেন্দ্ৰ, গুৱাহাটীত সীমান্ত সুৰক্ষা বলৰ মুখ্য কাৰ্যালয়ৰ পৃথক আৱাসিক পৰিসৰ, আই টি বি পিৰ সোণাপুৰস্থিত ৩৩সংখ্যক বাহিনীৰ ৩৬০জন জোৱানৰ বেৰেক, বিষয়াৰ মেছ আৰু ১০খন বিছনাযুক্ত চিকিৎসালয়ৰ ভাৰ্চুৱেলী লোকাৰ্পণ কৰে।”
তেওঁ সামাজিক মাধ্যমত লিখিছে, “তদুপৰি তেখেতে শ্ৰীকোনাত অছাম ৰাইফলছৰ মহাপৰিদৰ্শকৰ মুখ্য কাৰ্যালয়, শিলচৰৰ মাইনৰ ইউনিট আৰু যোৰহাটৰ ক্ষেত্ৰীয় মুখ্য কাৰ্যালয়ত প্ৰশাসনিক আৰু আৱাসিক আন্তঃগাঁথনি নিৰ্মাণৰভাৰ্চুৱেলী শিলান্যাস কৰে।” উল্লেখযোগ্য যে ইয়াৰ পূৰ্বে গৃহমন্ত্ৰীয়ে ৰাজভৱনৰ ব্ৰহ্মপুত্ৰ উইঙৰ চৌহদত মন্দিৰ দৰ্শন, গো-পূজন আৰু গছপুলি ৰোপণ কৰে।
