ভাৰতৰ মুখ্য ন্যায়াধীশ সূৰ্য কান্তে (Chief Justice Surya Kant) ককৰোচ জনতা পাৰ্টীৰ (Cockroach Janata Party ) বিতৰ্কক এনে ‘আৱেগিক’ বা ‘চেন্টিমেণ্টেল’ ৰূপত নল’বলৈ পৰামৰ্শ দিছে। বিষয়টোৰ জৰুৰী শুনানি বিচাৰি উচ্চতম ন্যায়ালয়ত আবেদন দাখিল কৰাৰ সময়তে শনিবাৰে আইনী দলটোক এই পৰামৰ্শ প্ৰদান কৰে মুখ্য ন্যায়াধীশে। অধিবক্তা এন কে গোস্বামীয়ে আদালতত বিষয়টো উত্থাপন কৰি যুক্তি আগবঢ়ায় যে মুখ্য ন্যায়াধীশে নিজেই বিষয়টো স্পষ্ট কৰি দিয়াৰ পাছতো ইণ্টাৰনেটত “বিকৃত আৰু বিদ্বেষমূলক প্ৰচাৰ” চলি আছে। ইয়াৰ উত্তৰত মুখ্য ন্যায়াধীশগৰাকীৰ মন্তব্য, “ইমান আৱেগিকভাৱে নল’ব।”
শেহতীয়াকৈ এটা গোচৰৰ শুনানিৰ সময়ত মুখ্য ন্যায়াধীশে যুৱ সমালোচক বা ‘জেন জি’ ব্যৱহাৰকাৰীৰ এটা গোটক ‘পঁইতাচোৰা’ (cockroach) আৰু ‘পৰজীৱী’ (parasites) বুলি উল্লেখ কৰিছিল, যিটো পোহৰলৈ অহাৰ লগে লগে ছ’চিয়েল মিডিয়াত তীব্ৰ প্ৰতিক্ৰিয়াৰ সৃষ্টি কৰিছিল। অৱশ্যে পিছত মুখ্য ন্যায়াধীশগৰাকীয়ে স্পষ্ট কৰি দিয়ে যে তেওঁৰ মন্তব্য সাধাৰণ যুৱক-যুৱতীক লক্ষ্য কৰি নহয়, ‘ভুৱা ডিগ্ৰী’ লৈ ঘূৰি ফুৰাসকলকহে কৰা হৈছে। কিন্তু তেতিয়ালৈকে এই মন্তব্যক কেন্দ্ৰ কৰি নেট জগতত ‘ককৰোচ জনতা পাৰ্টী’ বা চিজেপি নামৰ এক ব্যংগাত্মক ইণ্টাৰনেট আন্দোলন আৰম্ভ হৈছিল আৰু ই দ্ৰুতগতিত যুৱক-যুৱতীসকলৰ এক বৃহৎ অনলাইন প্ৰতিবাদলৈ পৰিণত হয়। যোৱা সপ্তাহত আৰম্ভ হোৱা এই অনলাইন আন্দোলনে ছ’চিয়েল মিডিয়াত অবিশ্বাস্য সঁহাৰি লাভ কৰিছে। মাত্ৰ কেইদিনমানৰ ভিতৰতে এই আন্দোলনৰ ইনষ্টাগ্ৰাম হেণ্ডেলৰ অনুগামীৰ সংখ্যাই এক কোটি ৯০ লাখ অতিক্ৰম কৰে, যিটো ভাৰতৰ দুটা মূল ৰাজনৈতিক দল— বিজেপি আৰু কংগ্ৰেছৰ অফিচিয়েল ইনষ্টাগ্ৰাম একাউণ্টৰ একত্ৰিত সংখ্যাতকৈ অধিক।
শিক্ষা মন্ত্ৰালয়ৰ সিদ্ধান্ত, বিভিন্ন পৰীক্ষাত প্ৰশ্নকাকত ফাদিল বিতৰ্ক, প্ৰতিষ্ঠানিক জবাবদিহিতাৰ দাবীত অনলাইন আবেদনত স্বাক্ষৰ কৰিবলৈ নেটিজেনসকলে #MainBhiCockroach হেজটেগ ব্যৱহাৰ কৰিছে। যিটো মিম বা ইণ্টাৰনেট কৌতুক হিচাপে আৰম্ভ হৈছিল, সেয়া এতিয়া যুৱক-যুৱতীসকলৰ বাবে চাকৰি, প্ৰতিষ্ঠানিক বিশ্বাসযোগ্যতা আৰু পৰীক্ষাৰ দুৰ্নীতিৰ বিৰুদ্ধে নিজৰ অন্তৰ্নিহিত ক্ষোভ প্ৰকাশ কৰাৰ অন্যতম ডাঙৰ কাৰক হৈ পৰিছে।
শনিবাৰে এই বিতৰ্কৰ সৈতে জড়িত আন এক পিআইএল উচ্চতম ন্যায়ালয়ত জৰুৰী শুনানিৰ বাবে দাখিল কৰা হয়। এই আবেদনত আদালতত ন্যায়াধীশসকলে ইণ্টাৰনেটত কৰা মৌখিক মন্তব্যৰ ইছ্যুকৰণৰ ওপৰত নিষেধাজ্ঞা আৰোপ কৰাৰ লগতে সমগ্ৰ দেশতে সক্ৰিয় ‘ভুৱা অধিবক্তা’সকলৰ ওপৰত চিবিআইৰ তদন্তৰ দাবী জনায়। অৱশ্যে মুখ্য ন্যায়াধীশ সূৰ্য কান্তে বিষয়টো খৰখেদা কৰাৰ প্ৰয়োজন নাই বুলি উল্লেখ কৰি নিয়ম অনুসৰি গোচৰৰ শুনানি যথা সময়ত হ’ব বুলি স্পষ্ট কৰি দিয়ে।
