২০২৬ চনৰ বিধানসভা নিৰ্বাচনৰ পূৰ্বে যেন অসমত এন ডি এৰ ৰণডংকা বজাবলৈ উপস্থিত হৈছে কেন্দ্ৰীয় গৃহমন্ত্ৰী অমিত শ্বাহ (Amit Shah)। বৃহস্পতিবাৰে দুদিনীয়া ভ্ৰমণসূচীৰে গুৱাহাটীত উপস্থিত হোৱা অমিত শ্বাহে শুকুৰবাৰে খানাপাৰাত অনুষ্ঠিত এন ডি এৰ পঞ্চায়ত প্ৰতিনিধিৰ সন্মিলনত অংশগ্ৰহণ কৰে। এক কথাত ক’বলৈ গ’লে এই প্ৰতিনিধি সভাৰ জৰিয়তেই নিৰ্বাচনী ৰণডংকা বজাব অমিত শ্বাহে।
উল্লেখ্য যে এই পঞ্চায়ত প্ৰতিনিধি সন্মিলনত এন ডি এৰ অংশীদাৰ দল বিজেপি, অগপ, ৰাভা হাছং যৌথ সংগ্ৰাম সমিতি আৰু জনশক্তিকে ধৰি সকলো দলৰ শীর্ষ নেতৃত্ব তথা পঞ্চায়ত প্ৰতিনিধিসকলে অংশগ্ৰহণ কৰিছে। প্রায় ২০ হাজাৰ পঞ্চায়ত প্ৰতিনিধিৰ ভিতৰত বিজেপিৰ ১৬ হাজাৰোধিক আৰু অসম গণ পৰিষদৰ ১৫০০ ৰো অধিক প্রতিনিধিয়ে অংশগ্ৰহণ কৰিছে।
উল্লেখ্য যে বৃহস্পতিবাৰে সন্ধিয়া গুৱাহাটীত উপস্থিত হোৱা অমিত শ্বাহে নিশা বিজেপিৰ ৰাজ্যিক কাৰ্যালয়ত প্ৰদেশ বিজেপিৰ কৰ্ণধাৰ কমিটীৰ এক বৈঠকত অংশগ্ৰহণ কৰি নিশাটো কইনাধৰাৰ ৰাজ্যিক অতিথিশালাত কটায়। তাৰ পৰা গৈ শুকুৰবাৰে পুৱা তেওঁ নৱনিৰ্মিত ৰাজভৱনৰ নতুন গৃহ উদ্বোধন কৰে।
ইয়াৰ পাছতে খানাপাৰাত আয়োজিত এন ডি এৰ পঞ্চায়ত প্ৰতিনিধি সন্মিলনত অংশগ্ৰহণ কৰিবলৈ যায়। ইয়াৰ পিছত গৃহমন্ত্ৰীয়ে অসমৰ প্ৰথমগৰাকী অনা কংগ্ৰেছী মুখ্যমন্ত্ৰী গোলাপ বৰবৰাৰ জন্ম শতবৰ্ষৰ বছৰজোৰা কাৰ্যসূচীৰ শুভাৰম্ভণি কৰিব। এই অনুষ্ঠান অনুষ্ঠিত হ’ব শ্ৰীমন্ত শংকৰদেৱ কলাক্ষেত্ৰত।
