অসমৰ সাংস্কৃতিক জগতক উকা কৰি গুচি গ’ল বিশিষ্ট নাট্যকাৰ, পৰিচালক, গীতিকাৰ তথা অভিনেতা হেমন্ত দত্ত (Hemanta Dutta)। ৮৪ বছৰ বয়সত সোমবাৰে গুৱাহাটী চিকিৎসা মহাবিদ্যালয়ত শেষ নিশ্বাস ত্যাগ কৰে হেমন্ত দত্তই।
উল্লেখ্য যে হৃদৰোগত আক্ৰান্ত হৈ দীৰ্ঘদিন ধৰি অসুস্থ হৈ থকা বিশিষ্ট নাট্যকাৰগৰাকীৰ স্বাস্থ্যৰ অৱনতি ঘটাত দেওবাৰে গুৱাহাটী চিকিৎসা মহাবিদ্যালয় হাস্পতালত ভৰ্তি কৰোৱা হৈছিল। তাতেই তেওঁ শেষ নিশ্বাস ত্যাগ কৰে।
বিশিষ্ট নাট্যশিল্পীগৰাকীৰ মৃত্যুত শোকস্তব্ধ হৈ পৰিছে ৰাজ্যৰ সাংস্কৃতিক জগত। তেওঁৰ মৃত্যুত বিভিন্ন অনুষ্ঠান-প্ৰতিষ্ঠান, দল-সংগঠন তথা বিশিষ্ট ব্যক্তিয়ে শোক প্ৰকাশ কৰাৰ লগতে তেওঁলৈ অন্তিম শ্ৰদ্ধা জ্ঞাপন কৰে। আনহাতে, হেমন্ত দত্তৰ মৃত্যুত শোক প্ৰকাশ কৰিছে মুখ্যমন্ত্ৰী ডঃ হিমন্ত বিশ্ব শৰ্মাই।
তেওঁ সামাজিক মাধ্যমত এক শোকবাৰ্তাত লিখিছে, “প্ৰসিদ্ধ গীতিকাৰ, নাট্যকাৰ, অভিনেতা, পৰিচালক আমাৰ অতি শ্ৰদ্ধাৰ হেমন্ত দত্ত ডাঙৰীয়াৰ প্ৰয়াণৰ খবৰ শুনি অতিকৈ মৰ্মাহত হৈছোঁ ৷ কেইবা দশক ধৰি সাংস্কৃতিক ক্ষেত্ৰখনলৈ বিশেষ অৱদান আগবঢ়োৱা দত্ত ডাঙৰীয়াই লিখা প্ৰতিটো গীতেই একো একোটি চিৰসেউজ গীত ৷ একেধৰণে তেখেতৰ দ্বাৰা সৃষ্ট নাটকসমূহে প্ৰতিগৰাকী শ্ৰোতা-দৰ্শকক মন্ত্ৰমুগ্ধ কৰি ৰাখিছিল ৷ প্ৰবীণ শিল্পীগৰাকীৰ বিয়োগ অসমৰ সমাজ জীৱন তথা সাংস্কৃতিক পৰিমণ্ডলৰ বাবে অপূৰণীয় ক্ষতি ৷ তেখেতৰ বিদেহ আত্মাৰ চিৰশান্তি কামনাৰ অৰ্থে ঈশ্বৰৰ শ্ৰীচৰণত প্ৰাৰ্থনা জনালোঁ আৰু শোকসন্তপ্ত পৰিয়ালবৰ্গ তথা গুণমুগ্ধক সমবেদনা জ্ঞাপন কৰিলোঁ ৷” উল্লেখ্য যে হেমন্ত দত্তৰ জন্ম হৈছিল ১৯৪১ চনৰ ২৪ ছেপ্টেম্বৰত দৰং জিলাৰ খাৰুপেটীয়াত।
তেওঁৰ পিতৃৰ নাম হলিৰাম দত্ত আৰু মাতৃ বিৰজা বালা দত্ত। তেওঁ মঙলদৈত স্কুলীয়া শিক্ষা গ্ৰহণ কৰাৰ পিছত ডিব্ৰুগড়ৰ কানৈ মহাবিদ্যালয়ৰ পৰা কলেজীয়া শিক্ষা সাং কৰে।
তেওঁ অসমৰ ভ্ৰাম্যমাণ নাট্য জগতলৈ ৩৫০ৰো অধিক নাটকৰ অৱদান আগবঢ়োৱাৰ লগতে বহুকেইখন নাট পৰিচালনা কৰি গৈছে।
লগতে ৩০০ৰো অধিক নাটকত অভিনয়ো কৰিছে। ইয়াৰ উপৰি ১৯৮০ চনত মুক্তিলাভ কৰা ছবি ‘উপপথ’ তেওঁ পৰিচালনা কৰিছিল। তেওঁৰ এখন উল্লেখযোগ্য নাট হৈছে ‘টাইটানিক’। এই নাটখনৰ জৰিয়তে তেওঁ সৃষ্টি কৰা ভ্ৰাম্যমাণ থিয়েটাৰৰ অভিলেখ আজিও কোনো নাটকে ভংগ কৰিব পৰা নাই৷
তেওঁৰ কেইখনমান উল্লেখযোগ্য নাট হৈছে, এটা নষ্ট ল’ৰাৰ গল্প, পথ, সেন্দূৰ, আকাশৰ দৰে মন, মুক্তি, চক্ৰবেহু, জেতুকা পাতৰ ৰং আদি। হেমন্ত দত্তই ৫দদৰো অধিক গীতো ৰচনা কৰিছে। তাৰ ভিতৰত মই যি বাটেৰে ওলালোঁ আজি, এই আকাশ বৰ বিশাল, তুমি আহিছিলা চেনাই আদি গীত অধিক জনপ্ৰিয়। উল্লেখ্য যে ২০২৪-২৫ বৰ্ষত তেওঁক অসম চৰকাৰে ‘অসম সৌৰভ’ বঁটাৰে সন্মানিত কৰে।
