ডিফু চিকিৎসা মহাবিদ্যালয় আৰু হাস্পাতালত আজিৰে পৰা এমআৰআই সেৱা আৰম্ভ কৰা হৈছে ৷ কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে আজি এই সেৱা উদ্বোধন কৰে ৷ মহাবিদ্যালয়খনৰ প্ৰথম মহলাত ৰোগীৰ বাবে এই সেৱা উদ্ধোধন কৰা হয় ৷
সংবাদ মাধ্যমৰ আগত ৰংহাঙে কয়যে, বিগত চাৰিটা বছৰে এই সেৱাৰ বাবে পৰিষদে চেষ্টা চলাই আহিছিল ৷ প্ৰায় ১৫ কোটি টকা ব্যয় সাপেক্ষে এই মেচিন অনা বুলি জানিবলৈ দি চিকিৎসা মহাবিদ্যালয়খনৰ বাবে এই এমআৰআই মেচিন প্ৰদান কৰাৰ বাবে অসমৰ মুখ্যমন্ত্ৰীক ধন্যবাদ জ্ঞাপন কৰে ৷
কাৰ্বি আংলং, ডিমা হাছাও জিলাৰ লগতে লামডিং, লংকা আৰু হোজাই আদিৰ ৰোগীয়েও ইয়াৰ দ্বাৰা উপকৃত হব বুলি ৰংহাঙে আশা প্ৰকাশ কৰে ৷ আনহাতে চিকিৎসা মহাবিদ্যালয় খনৰ অধ্যক্ষ্যা সুমিত্ৰা হাগজেৰে এই সেৱাৰ দ্বাৰা বিভিন্ন ৰোগ নিৰূপন কৰিব পৰা হব বুলি প্ৰকাশ কৰি এই সেৱা লাভৰ বাবে ৰোগীয়ে চৰকাৰী নিৰিখ অনুযায়ী ধন খৰছ কৰিব লাগিব বুলি ব্যক্ত কৰে ৷
