গুজৰাটৰ সন্ত্ৰাসবাদ-বিৰোধী দলে আল কায়দা (Al-Qaeda) সন্ত্ৰাসবাদী সংগঠনৰ সৈতে জড়িত থকাৰ অভিযোগত বেংগালুৰুৰ এগৰাকী মহিলাক গ্ৰেপ্তাৰ কৰিছে। ধৃত মহিলাগৰাকীৰ নাম ছামা পাৰবীন।
তেওঁৰ বয়স ৩০ বছৰ। বুধবাৰে গ্ৰেপ্তাৰ হোৱাৰ পিছত গুজৰাটৰ গৃহ ৰাজ্য মন্ত্ৰী হৰ্ষ ৰমেশভাই সংঘৱীয়ে দাবী কৰে যে মহিলাগৰাকী মৌলবাদী আৰু অনলাইন সন্ত্ৰাসবাদী সংগঠনৰ সৈতে যোগাযোগত আছে বুলি অভিযোগ উঠিছে।
বিগত কেইদিনমানৰ পৰা গুজৰাটৰ এ টি এছে সন্ত্ৰাসবাদীৰ সন্দেহত পঞ্চমজন অভিযুক্তক গ্ৰেপ্তাৰ কৰিছে। আনহাতে, গুজৰাটৰ এ টি এছে বেংগালুৰুলৈ গৈ ছামাক গ্ৰেপ্তাৰ কৰা বুলি কয়। তেওঁৰ মোবাইল ফোনত পাকিস্তানৰ কেইবাজনো উচ্চ পদস্থ বিষয়াৰ নম্বৰ পোৱা গৈছে।
প্ৰথমতে জানিব পৰা মতে, তেওঁ তেওঁলোকৰ সৈতে নিয়মীয়াকৈ সংস্পৰ্শত আছিল। ধৃত ছামা প্ৰকৃততে ঝাৰখণ্ডৰ বাসিন্দা বুলিও জানিব পৰা গৈছে। বিগত ৩ বছৰে তেওঁ ভাতৃৰ সৈতে বেংগালুৰুত এটা ঘৰ ভাড়া কৰি আছিল। আগতে তেওঁ এটা কোম্পানীত কাম কৰিছিল। অৱশ্যে বৰ্তমান তেওঁ কৰ্মহীন হৈ আছিল।
ছামাৰ গ্ৰেপ্তাৰৰ ঘটনাই স্তম্ভিত কৰি তুলিছে তেওঁৰ বেংগালুৰুৰ চুবুৰীয়াক। স্বাভাৱিকতে তেওঁলোকে গম পোৱা নাছিল যে ৩০ বছৰীয়া যুৱতীগৰাকীৰ কোনো সন্ত্ৰাসবাদী সংগঠনৰ সৈতে কোনো সম্পৰ্ক থাকিব পাৰে। তদন্তকাৰীয়ে দাবী কৰিছে যে ছামা কেইবাজনো ‘হাই-প্ৰফাইল ৰেডিকেল’ৰ সৈতে নিয়মীয়াকৈ সংস্পৰ্শত আছিল।
ছামাৰ পূৰ্বে গুজৰাট এ টি এছে আৰু চাৰিজন লোকক গ্ৰেপ্তাৰ কৰিছে। তেওঁলোক আল কায়দাৰ সৈতে জড়িত বুলিও অভিযোগ উত্থাপন হৈছে। আটক কৰাকেইজনৰ ভিতৰত আছে দিল্লীৰ বাসিন্দা মহম্মদ ফৈক, আহমেদাবাদৰ যুৱক মহম্মদ ফাৰ্দিন, মোদাছাৰ ছাইফুল্লাহ কুৰেশ্বি আৰু নয়দাৰ জেছান আলী।
গ্ৰেপ্তাৰ হোৱা লোকসকলৰ সকলোৱে মিলি সন্ত্ৰাসবাদী সংগঠনটোৰ নেটৱৰ্ক সম্প্ৰসাৰণৰ বাবে কাম কৰিছিল বুলি দাবী কৰিছে এ টি এছে। ইয়াৰ লগতে তেওঁলোকে ইনষ্টাগ্ৰাম আৰু অন্যান্য ছ’চিয়েল মিডিয়াত বিভিন্ন অপপ্ৰচাৰৰ ভিডিঅ’ পোষ্ট কৰি নেটিজেনসকলক প্ৰভাৱিত কৰাৰ চেষ্টা কৰিছিল। তেওঁলোকে কেইবাটাও বেনামী একাউণ্টৰ পৰা ভুৱা মেছেজ কৰি এই অপপ্ৰচাৰ কৰিছিল।
গুজৰাট এ টি এছৰ দাবী যে ফাৰ্দিন নামৰ যুৱকজনৰ হাতত মৌলবাদী আৰু নিষিদ্ধ সংগঠনৰ বিভিন্ন গ্ৰন্থ আৰু কাগজ উদ্ধাৰ হৈছে। অভিযোগ অনুসৰি, যুৱকজনৰ হাতত ‘অপাৰেচন সিন্দুৰ’ৰ বিৰুদ্ধে আল কায়দাৰ মতামতৰ সৈতে জড়িত নথি-পত্ৰও আছিল। দুয়ো মিলি চৰকাৰবিৰোধী কাম-কাজত জড়িত হৈ পৰিছিল।
গ্ৰেপ্তাৰ কৰা লোককেইজনৰ বিৰুদ্ধে অবৈধ কাৰ্যকলাপ (প্ৰতিৰোধ) আইনৰ ১৩, ১৮, ৩৮ আৰু ৩৯ ধাৰাত গোচৰ ৰুজু কৰা হৈছে। ইয়াৰ উপৰি ভাৰতীয় দণ্ডবিধিৰ ১১৩, ১৫২, ১৯৬ আৰু ৬১ ধাৰাত এজাহাৰ দাখিল কৰা হৈছে। বুধবাৰে আদালতত হাজিৰ কৰা হ’ব ছামাক।
