ষ্টাফ ৰিপ’ৰ্টাৰ,ডিফু : অসম-মেঘালয় সীমান্তৰ কাৰ্বি ভূমিৰ তাপাত অঞ্চলত আজি পুৱাৰে পৰা সীমান্তৰ কাৰ্বি ভূমিক লৈ পুনৰ কাৰ্বি-খাছীৰ মাজত সংঘাতৰ সৃষ্টি হ’য় ৷ পশ্চিম কাৰ্বি আংলং জিলাৰ অসম-মেঘালয় সীমান্তস্থিত তাপাত অঞ্চলত কাৰ্বি আংলং স্বায়ত্ব পৰিষদৰ অধীনস্থ বিভাগীয় ফালৰ পৰা এক বৃহৎ এলেকাত কিছু দিন পূৰ্বে ৰঙা চন্দন গছৰ পুলি ৰোপন কৰে ৷ ইয়াৰ পাচতেই সীমান্তৰ খাছী আৰু কাৰ্বি লোকৰ মাজত সংঘাতৰ জুই দুয়োপক্ষৰ মাজত উমি-উমি জ্বলি আছিল ৷ উক্ত বৃহত এলেকা ভূমিত ৰঙা চন্দৰ গছ ৰোপনৰ কেন্দ্ৰ কৰিয়েই মেঘালয়ৰ এচাম দুষ্কৃতিকাৰীয়ে সীমান্ত স্থানীয় খাছীলোকক লৈ মেঘালয়ৰ ভূমি বুলি দাবী কৰি আহিছে ৷
আনহাতে একাংশ খাছীলোকে বিগত কিছুদিন পূৰ্বে অৰ্থাৎ ৰঙা চন্দন গছ ৰোপন কৰি থকাৰ মাজতো গছপুলি ৰোপনত বাধা প্ৰদান কৰি আহিছিল ৷ ইপিনে, সংঘাতৰ বিষয়ক লৈ আজি তাপাত প্ৰাথমিক বিদ্যালয়ত দুই ৰাজ্যৰ সীমান্তবাসীৰ মাজত এক শান্তিপূৰ্ণ আলোচনা হোৱাৰ কথা আছিল যদিও পুৱাতেই মেঘালয়ৰ এচাম খাছীলোকৰ পৰোছনাত আলোচনা কৰাৰ পৰিৱৰ্তে ৰোপন কৰা ৰঙা চন্দনৰ গছ পুলিবোৰ এফালৰ পৰা উভালি তহিলং কৰি থকা অৱস্থাতেই ঘটনাক লৈ কাৰ্বি-খাছীৰ মাজত তৰ্ক-বিতৰ্ক হৈ ঘটনাস্থীত দুয়োপক্ষৰ মাজত হুলস্থূলীয়া পৰিৱেশৰ সৃষ্টি হ’য় ৷
উক্ত ঘটনাত আগ্নিগৰ্ভা হৈ কাৰ্বি ৰাইজৰ সৈতে খাছীলোকৰ সংঘাত হ’য় ৷ উক্ত সংঘাতৰ মাজতে অসমৰ কাৰ্বি ভূমিৰ আশ্ৰয় শিবিৰতো খাছীলোকে অগ্নিসংযোগ কৰে ৷ ইপিনে, দুয়োপক্ষৰ মাজত সংঘাত ক্ৰমান্বয়ে বৃদ্ধি হোৱাত ঘটনাস্থলীত অসম আৰক্ষীৰ দল উপস্থিত হৈ পৰিস্থিতি নিয়ন্ত্ৰণ কৰে যদিও পৰিস্থিতি অধিক হৈ পৰাত প্ৰথমে কন্দুৱা গেছ নিক্ষেপ কৰে ৷ ইয়াৰ পাচতো নিয়ন্ত্ৰণ কৰিব নোৱাৰাত ১০ ৰাউণ্ড ৰবৰৰ গুলী নিক্ষেপ কৰিবলৈ বাধ্য হ’য় অসম আৰক্ষী ৷
ইতিমধ্যে ঘটনাস্থলীত জিলা আয়ুক্ত সাৰঙ্গপানী শৰ্মা আৰু আৰক্ষী অধীক্ষক ইদ্ৰনীল বৰুৱা উপস্থিত হৈ পৰিস্থিতি নিয়ন্ত্ৰণলৈ আনে যদিও মেঘালয়ৰ এচাম খাছী দুষ্কৃতিকাৰীৰ পৰোচনাত এচাম খাছীয়ে সীমান্তৰ খাছীলোকক লগত লৈ কাৰ্বি লোকৰ সৈতে সীমান্তৰ ভূমিক লৈ যিকোনো মুহূৰ্ত্বত পৰিস্থিতি অধিক উত্তেজনাপূৰ্ণ কৰাৰ আশংকাই প্ৰকট হৈ পৰিছে ৷
আনহাতে আজি সন্ধিয়া ডিফু কাছা ষ্টেডিয়ামত কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য ড: তুলিৰাম ৰংহাঙে সাংবাদিকৰ সৈতে কয় যে, তাপাত কাৰ্বি আংলঙৰ ভূমিত ৰঙা চন্দন ৰোপন কৰা হৈছে ৷ কিন্তু মেঘালয়ৰ খাছী সকলে কাৰ্বি আংলঙ সীমান্তৰ ডেৰ কিলোমিটাৰ ভিতৰত প্ৰৱেশ কৰি ৰঙা চন্দনৰ পুলিবোৰ নষ্ট কৰিছে ৷ ই কাৰ্বি আংলঙৰ ভূমি বুলি দাবী কৰি এই সন্দৰ্ভত মেঘালয় চৰকাৰৰ সৈতে আলোচনা কৰি সমস্যাৰ সম্ধান কৰা হব বুলি কয় ৰংহাঙে ৷
