অসমৰ পৰিৱেশ বিনষ্ট কৰাৰ বাবে ৰাজ্যৰ ভিতৰ-বাহিৰ পৰা চেষ্টা চলি আছে আৰু এইক্ষেত্রত সামাজিক মাধ্যমক এচামে ডাঙৰ অস্ত্র হিচাপে গ্ৰহণ কৰিছে। সামাজিক মাধ্যমৰ পাঁচ হাজাৰোধিক একাউণ্ট যোৱা এমাহৰ পৰা হঠাতে সক্ৰিয় হৈ পৰিছে। দিছপুৰৰ লোক সেৱা ভৱনত অনুষ্ঠিত এক সংবাদমেলত এই কথা উল্লেখ কৰে মুখ্যমন্ত্রী ডঃ হিমন্ত বিশ্ব শৰ্মাই (CM Himanta Biswa Sarma)।
অসমৰ আগন্তুক নিৰ্বাচনক লৈ কেতবোৰ উপাদান সক্ৰিয় হোৱা বুলি উল্লেখ কৰি মুখ্যমন্ত্রীয়ে কয় যে সামাজিক মাধ্যমত তেওঁলোকে প্ৰ’-পেলেষ্টাইনী, প্ৰ’-ইৰাণী, প্ৰ’-মহম্মদ ইউনুছৰ লগতে অসমৰ এজন নেতা আৰু দলৰ সমৰ্থনত পোষ্ট কৰি আছে। ইয়াৰ এক ফৰেনচিক বিশ্লেষণৰ ব্যৱস্থা কৰা বুলিও মুখ্যমন্ত্ৰীয়ে উল্লেখ কৰে।
মুখ্যমন্ত্ৰীয়ে এনে ২,০৯২ টা একাউণ্ট অধ্যয়ন কৰা বুলি উল্লেখ কৰি কয় যে ইয়াত দেখা গৈছে যে তেওঁলোকৰ ভিতৰত ৭০০ ৰো অধিক বাংলাদেশৰ, ৩৫০ টা পাকিস্তানৰ, ৫০০ ৰো অধিক একাউণ্ট মাধ্যপ্ৰাচ্যৰ পৰা সক্ৰিয় হৈ আছে। এই একাউণ্টবোৰে অসমৰ এজন নেতা আৰু কংগ্ৰেছক লাইক কৰাৰ উপৰি তেওঁলোক উগ্ৰ ইছলামিক মৌলবাদী বুলিও উল্লেখ কৰিছে মুখ্যমন্ত্ৰীয়ে। আনহাতে, তেওঁলোকে অসমৰ এজন নেতা আৰু অসম কংগ্ৰেছক ফল’ কৰাৰ কথা উল্লেখ কৰি এই মানুহখিনিৰ মাজত এটা সংযোগ থকাৰ অভিযোগ আনে।
ইয়াৰ পৰায়ে অসমৰ আগন্তুক নিৰ্বাচনক লৈ অসমত ফাণ্ডামেণ্টেলিষ্ট এলিমেণ্টছৰ প্ৰৱেশ ঘটাটো অনুমান কৰিব পাৰি বুলি মুখ্যমন্ত্ৰী ডঃ হিমন্ত বিশ্ব শৰ্মাই গুৰুতৰ অভিযোগ উত্থাপন কৰে। আনকি এই বাহিৰা উপাদানবোৰেঅসমত আহি গুৱাহাটীৰ খাৰঘুলি আৰু জি এছ ৰোডত ঘৰ ভাৰাত লৈ থকা বুলিও বিস্ফোৰক মন্তব্য কৰে। লগতে এই সকলোবোৰ চৰকাৰৰ নিৰীক্ষণত থকা বুলিও উল্লেখ কৰে।
