পুনৰ বাতিল কৰা হৈছে এয়াৰ ইণ্ডিয়াৰ (Air India) কেইবাখনো বিমান। ইয়াৰ ভিতৰত ঘৰুৱা বিমান সেৱাৰ লগতে আন্তঃৰাষ্ট্ৰীয় বিমান সেৱাও আছে। এয়াৰ ইণ্ডিয়া কৰ্তৃপক্ষই বিমান বাতিলৰ বিভিন্ন কাৰণ দাঙি ধৰিছে।
এয়াৰ ইণ্ডিয়াই এক বিবৃতি প্ৰকাশ কৰি কয় যে ৰক্ষণাবেক্ষণৰ বাবে ডুবাইৰ পৰা চেন্নাইলৈ যোৱা এআই ৯০৬, দিল্লীৰ পৰা মেলবোৰ্ণলৈ এআই ৩০৮, মেলবোৰ্ণৰ পৰা দিল্লীলৈ এআই ৩০৯, ডুবাইৰ পৰা হায়দৰাবাদলৈ যোৱা এআই ২২০৪ বাতিল কৰা হৈছে। কেৱল সেয়াই নহয়, পুনেৰ পৰা দিল্লীলৈ এআই ৮৭৪, আহমেদাবাদৰ পৰা দিল্লীলৈ এআই ৪৫৬, হায়দৰাবাদৰ পৰা মুম্বাইলৈ এআই ২৮৭২ আৰু চেন্নাইৰ পৰা মুম্বাইলৈ এআই ৫৭১ বিমান বাতিল কৰা হৈছে। ৰক্ষণাবেক্ষণৰ উপৰি বেয়া বতৰ আৰু বন্ধ আকাশমাৰ্গৰ বাবেও এয়াৰ ইণ্ডিয়াই বিমান সেৱা বাতিল কৰিছে।
এয়াৰ ইণ্ডিয়াই বিমান বাতিলৰ বাবে যাত্ৰীসকলৰ আগত দুখ প্ৰকাশ কৰিছে। বিমান সংস্থাটোৱে জনাইছে যে বাতিল কৰা টিকটৰ বাবে যাত্ৰীসকলক সম্পূৰ্ণ ধন ঘূৰাই দিয়া হ’ব। অৱশ্যে যাত্ৰীসকলে ইচ্ছা কৰিলে এয়াৰ ইণ্ডিয়াই তেওঁলোকৰ বাবে বিকল্প ব্যৱস্থা কৰিব। লগতে এয়াৰ ইণ্ডিয়াৰ বিমানত বিভিন্ন পৰীক্ষা চলি থকা বুলিও জানিবলৈ দিয়ে। যদি কিবা বিসংগতি ধৰা পৰে তেন্তে সেইবোৰো মেৰামতি কৰি আছে কৰ্তৃপক্ষই।
এয়াৰ ইণ্ডিয়াই বৃহস্পতিবাৰে ঘোষণা কৰে যে প্ৰতি সপ্তাহত বিভিন্ন আন্তঃৰাষ্ট্ৰীয় পথত বিমানৰ সংখ্যা হ্ৰাস কৰিব। ইয়াৰ উপৰি ২১ জুনৰ পৰা ১৫ জুলাইলৈ তিনিটা পথত বিমান সেৱা বন্ধ কৰাৰ সিদ্ধান্ত গ্ৰহণ কৰিছে। ইৰাণ-ইজৰাইল সংঘাতৰ ফলতো এয়াৰ ইণ্ডিয়াৰ বিমান সেৱাত প্ৰভাৱ পৰিছে। এই সংঘাতৰ বাবে পশ্চিম এছিয়াৰ কেইবাটাও আকাশমাৰ্গ সাময়িকভাৱে বন্ধ কৰি দিয়া হৈছে।
ফলত একাংশ বিমানে গন্তব্যস্থানলৈ বেলেগ পথ লৈছে। কিন্তু বহুক্ষেত্ৰত দেখা যায় যে বিমানখনে সময়মতে গন্তব্য স্থানত উপস্থিত হ’ব পৰা নাই আৰু তাৰ পৰাই বিমানখনে সমস্যাৰ সন্মুখীন হৈছে। বিমান সেৱা বাতিল কৰিবলৈ বাধ্য হৈছে।
