ভাৰত-পাকিস্তানৰ সংঘাতৰ বাবে সাময়িকভাৱে স্থগিত ৰখা হৈছে আই পি এল (IPL)। কেতিয়া পুনৰ আৰম্ভ হ’ব সেই কথা সময়ত ঘোষণা কৰিব বি চি চি আয়ে। বৃহস্পতিবাৰে পাকিস্তানৰ ড্ৰ’ন আক্ৰমণৰ বাবে পঞ্জাব কিংছ আৰু দিল্লী কেপিটেলছৰ খেলখন মাজভাগতে বন্ধ হৈ পৰে। তেতিয়াৰে পৰাই আই পি এল সাময়িকভাৱে স্থগিত ৰখা হ’ব পাৰে বুলি জল্পনা-কল্পনাৰ সৃষ্টি হৈছিল। শুকুৰবাৰে সেয়া সত্য হয়।
বি চি চি আইৰ এজন বিষয়াই সংবাদ সংস্থা পিটিআইক কয়, “যেতিয়া দেশৰ পৰিস্থিতি এনেকুৱা হয়, যুদ্ধৰ পৰিৱেশ থাকে, তেতিয়া ক্ৰিকেট খেলাটো ভাল নালাগে।”
উল্লেখ্য যে ‘অপাৰেচন সিন্দুৰ’ৰ পিছত যোৱা বুধবাৰে নিশাৰ ভাগত ইডেন গাৰ্ডেনৰ মেচত বোমা আতংকৰ সৃষ্টি হয়। আনহাতে, জয়পুৰৰ সাৱাই মানসিং ষ্টেডিয়ামত বৃহস্পতিবাৰে সংঘটিত হয় বোমা বিস্ফোৰণ।
তাৰ পিছত বৃহস্পতিবাৰে নিশাৰ মেচখন পাকিস্তানত ড্ৰ’ন আক্ৰমণৰ বাবে মাজভাগতে বন্ধ কৰিবলগীয়া হয়। ইয়াৰ ফলত বি চি চি আয়ে কোনো ধৰণৰ বিপদাশংকা ল’ব বিচৰা নাই। সেয়ে সম্প্ৰতি আই পি এল স্থগিত ৰখাৰ কথা ঘোষণা কৰা হৈছে।
উল্লেখ্য যে ২৫ মে’ত ইডেন গাৰ্ডেনত অনুষ্ঠিত হোৱাৰ কথা আছিল ফাইনেল। সাম্প্ৰতিক পৰিস্থিতিৰ প্ৰতি লক্ষ্য ৰাখি আই পি এল বিদেশলৈ যাব নেকি সেই লৈয়ো প্ৰশ্ন উত্থাপন হৈছে। সূত্ৰ অনুসৰি, আই পি এলৰ অন্তিম পৰ্যায় দক্ষিণ আফ্ৰিকালৈও যাব পাৰে।
অৱশ্যে প্ৰতিযোগিতাখনৰ বাকী থকা মেচসমূহৰ সন্দৰ্ভত পিছত সিদ্ধান্ত লোৱা হ’ব বুলি বি চি চি আয়ে প্ৰকাশ কৰে । ব’ৰ্ডে লগতে কয় যে এই সিদ্ধান্ত সুৰক্ষাৰ কাৰণে লোৱা হৈছে। সম্প্ৰতি অনিৰ্দিষ্টকাললৈ পিছুৱাই দিয়া হৈছে আই পি এল।
