উচ্চতম ন্যায়ালয়ে বুধবাৰে এলাহাবাদ উচ্চ ন্যায়ালয়ৰ (Allahabad High Court) ধৰ্ষণ সম্পৰ্কীয় এক ৰায় স্থগিত ৰাখে । এলাহাবাদ উচ্চ ন্যায়ালয়ে শেহতীয়া এক ৰায়ত কৈছিল যে এগৰাকী মহিলাৰ স্তনত চেপা দিয়া বা পাইজামাৰ ৰছা খোলাটো ধৰ্ষণৰ চেষ্টা বুলি গণ্য কৰিব নোৱাৰি।
এগৰাকী কিশোৰীক এটি কালভাৰ্টৰ তললৈ টানি নি তেওঁক যৌন আতিশয্যা চলোৱাৰ প্ৰসংগত উক্ত ৰায় প্ৰদান কৰি উচ্চ ন্যায়ালয়ে কৈছিল যে সেয়া ধৰ্ষণ বা ধৰ্ষণৰ চেষ্টা হিচাপে গণ্য কৰিবলৈ যথেষ্ট নহয়।
ন্যায়াধীশ বি আৰ গাভাই আৰু এ জি মাছিৰ বিচাৰপীঠে কয়, “আমি অতি দুখেৰে ক’বলৈ বাধ্য যে উক্ত ক্ৰমৰ কিছুমান পৰ্যবেক্ষণত যিয়ে ৰায়দান লিখিছে, সেয়াই তেওঁৰ সম্পূৰ্ণ অসংবেদনশীলতা উন্মোচন কৰে, যিটো গ্ৰহণযোগ্য নহয়।”
এই সন্দৰ্ভত মঙলবাৰে উচ্চতম ন্যায়ালয়ে স্বতপ্ৰণোদিত গোচৰ ৰুজু কৰে। আদালতে পৰ্যবেক্ষণ কৰে যে ১৭ মাৰ্চৰ ৰায়দান তাৎক্ষণিকভাৱে লিপিবদ্ধ হোৱা নাছিল। সেয়া চাৰি মাহৰ সংৰক্ষণৰ পিছত দিয়া হৈছিল, যিটো ন্যায়াধীশগৰাকীৰ মনোযোগৰ সাক্ষী।
বিচাৰপীঠে কয় যে যিহেতু এই পৰ্যবেক্ষণসমূহ “আইনৰ মৌলিক নীতিৰ বিপৰীত আৰু গুৰুতৰভাৱে অমানৱীয়” গতিকে তেওঁলোকে ইয়াক একাষৰীয়া কৰাৰ পক্ষত আছে। তদুপৰি, উচ্চতম ন্যায়ালয়ে কেন্দ্ৰীয় চৰকাৰ, উত্তৰ প্ৰদেশ চৰকাৰ আৰু উচ্চ ন্যায়ালয়ৰ পক্ষসমূহক জাননী জাৰি কৰি ছলিচিটৰ জেনেৰেলৰ সহায় বিচাৰিছিল।
এই ক্ষেত্ৰত ছলিচিটৰ জেনেৰেলও উচ্চতম ন্যায়ালয়ৰ পক্ষ লয়।
উল্লেখ্য যে ২০২২ চনৰ জানুৱাৰী মাহত উত্তৰ প্ৰদেশৰ কাছগঞ্জৰ পক্সো (POCSO) আদালতত এগৰাকী মহিলাই তিনিজন পুৰুষৰ বিৰুদ্ধে ধৰ্ষণ আৰু ভাবুকি দিয়াৰ অভিযোগ উত্থাপন কৰি এগোচৰ ৰুজু কৰিছিল।
২০২১ চনৰ ১০ নৱেম্বৰত গাঁৱৰে দুজন যুৱকে তেওঁৰ কন্যাক মটৰবাইকেৰে ঘৰলৈ যোৱাৰ প্ৰস্তাৱ দিছিল বুলি এজাহাৰত অভিযোগ কৰে। আনহাতে, ছোৱালীজনী অহাৰ লগে লগে যুৱককেইজনে তেওঁৰ স্তনত ধৰি পায়জামাৰ ৰছী ছিঙি কালভাৰ্টৰ তললৈ টানি লৈ যোৱাৰ অভিযোগ কৰা হৈছিল।
এই ঘটনাত কাছগঞ্জ আদালতে যুৱককেইজনৰ বিৰুদ্ধে ধৰ্ষণ আৰু POCSO আইনৰ অধীনত অভিযোগ দাখিল কৰে। কিন্তু এলাহাবাদ উচ্চ ন্যায়ালয়ে এই নিৰ্দেশৰ পৰিৱৰ্তন কৰি তেওঁলোকৰ বিৰুদ্ধে ধৰ্ষণৰ পৰিৱৰ্তে অশ্লীল আক্ৰমণৰ অভিযোগ উত্থাপন কৰিবলৈ নিৰ্দেশ দিয়ে।
