চন্দ্ৰযান-৩ৰ (Chandrayaan-3) সফলতাৰ পিছত কেন্দ্ৰীয় বিজ্ঞান আৰু প্ৰযুক্তি মন্ত্ৰী জিতেন্দ্ৰ সিঙে চন্দ্ৰ সম্পৰ্কীয় ইছৰোৰ পৰৱৰ্তী প্ৰকল্পৰ বিষয়ে অৱগত কৰে। চন্দ্ৰযান-৪ নতুন লক্ষ্য (Chandrayaan-4 new target) লৈ চন্দ্ৰলৈ যাব। পৰৱৰ্তী অভিযানৰ লক্ষ্য হ’ব চন্দ্ৰৰ মাটিৰ পৰা শিলৰ নমুনা সংগ্ৰহ কৰা। চন্দ্ৰযান-৪ ২০২৭ চনত উৎক্ষেপণ কৰা হ’ব বুলি কেন্দ্ৰীয় মন্ত্ৰীগৰাকীয়ে জানিবলৈ দিয়ে।
সংবাদ সংস্থা পিটিআইক দিয়া এক সাক্ষাৎকাৰত মন্ত্ৰীগৰাকীয়ে কয় যে চন্দ্ৰযান-৪ অভিযানত কমেও দুটা ৰকেট নিক্ষেপ কৰা হ’ব। গধুৰ এলভিএম-৩ ৰকেটত পাঁচটা মিছন ক্ৰিটিকেল কম্পোনেণ্ট কঢ়িয়াই নিব। কিছুমান বিশেষ কক্ষপথত স্থাপন কৰা হ’ব। মন্ত্ৰীগৰাকীয়ে কয়, “ইছৰোৱে চন্দ্ৰৰ ভূমিৰ পৰা শিল আৰু মাটিৰ নমুনা সংগ্ৰহ কৰি পৃথিৱীলৈ আনিব বিচাৰিছে। সেই উদ্দেশ্যে চন্দ্ৰযান-৪ প্ৰস্তুত কৰা হৈছে।”
ইছৰ’ৱে চন্দ্ৰলৈ এখন মহাকাশযান প্ৰেৰণ কৰিবলৈ আৰু দুবছৰ সময় লাগিব। কিন্তু তাৰ পূৰ্বে আৰু দুটা গুৰুত্বপূৰ্ণ অভিযান ভাৰতীয় মহাকাশ গৱেষণা সংস্থাৰ সন্মুখত আছে। ২০২৬ চনত গগনযান মুকলি কৰাৰ কথা। উক্ত প্ৰকল্পৰ জৰিয়তে মহাকাশযানখন ভাৰতীয়ৰ সৈতে মহাকাশত এক নিৰ্দিষ্ট উচ্চতালৈ যাব। ইয়াৰ পিছত তেওঁলোকক পুনৰ পৃথিৱীলৈ অনা হ’ব। ইয়াৰ পিছত ইছৰোৱে ‘সমুদ্ৰায়ন’ প্ৰকল্প ৰূপায়ণ কৰাৰ কথা। সেইটোও ২০২৬ চনত হ’ব৷ উক্ত প্ৰকল্পত তিনিজন বিজ্ঞানীক সাগৰৰ ছহাজাৰ মিটাৰ গভীৰতালৈ লৈ যোৱা হ’ব। এই দুয়োটা অভিযানে ভাৰতত বিজ্ঞানৰ সন্ধানত গুৰুত্বপূৰ্ণ ভূমিকা ল’বলৈ গৈ আছে বুলি কেন্দ্ৰীয় মন্ত্ৰীগৰাকীয়ে কয়।
উল্লেখযোগ্য যে ভাৰতৰ চন্দ্ৰযান-৩ লেণ্ডাৰে ২০২৩ চনৰ আগষ্ট মাহত চন্দ্ৰপৃষ্ঠ স্পৰ্শ কৰিছিল। লেণ্ডাৰ বিক্ৰমৰ পেটৰ পৰা ওলাই চন্দ্ৰৰ মাটিত ঘূৰি ফুৰিছিল ৰভাৰ প্ৰজ্ঞান। ১৪ দিনৰ বাবে বিভিন্ন নমুনা সংগ্ৰহ কৰা হৈছিল। ইয়াৰ পিছত পৰিকল্পনা অনুসৰি এই যন্ত্ৰটো চন্দ্ৰপৃষ্ঠত নিষ্ক্ৰিয় কৰি দিয়া হয়। চন্দ্ৰযান-৩ৰ সফলতাৰ বাবে ভাৰত এই তালিকাত প্ৰৱেশ কৰা বিশ্বৰ চতুৰ্থখন দেশ হিচাপে পৰিগণিত হয়। ইয়াৰ পূৰ্বে কেৱল আমেৰিকা, ৰাছিয়া আৰু চীনেহে চন্দ্ৰত মহাকাশযান অৱতৰণ কৰিছিল।
