পুত্ৰৰ প্ৰেমিকাৰ সৈতে বিয়া পাতিবলৈ মাতৃ সন্মত নহ’বও পাৰে। তাৰ অৰ্থ এইটো হ’ব নোৱাৰে যে তেওঁ পুত্ৰক প্ৰেমিকা (Son’s girlfriend)ৰ আত্মহত্যাৰ বাবে উৎসাহিত (Encouraged to commit suicide) কৰিছে। উচ্চতম ন্যায়ালয়ে (Suprem Court of India) আত্মহত্যাৰ বাবে প্ৰৰোচিত (abetment to suicide) কৰাৰ এটা গোচৰ খাৰিজ (Case dismissed) কৰি এনেদৰে কয়। আনকি মহিলাগৰাকীয়ে যদি পুত্ৰৰ প্ৰেমিকাক যদি কয় যে “যদি মোৰ পুত্ৰৰ অবিহনে জীয়াই থাকিব নোৱাৰা তেন্তে মৰি যোৱা”, তেতিয়াও ইয়াক আত্মহত্যাৰ বাবে প্ৰৰোচিত বুলি গণ্য কৰিব নোৱাৰি বুলিও শীৰ্ষ ন্যায়ালয়ে কয়।
এনে এক ঘটনা ২০০৮ চনত সংঘটিত হৈছিল। সৌম্য পাল নামৰ এগৰাকী যুৱতীয়ে নৰেন্দ্ৰপুৰ আৰু গৰিয়া ষ্টেচনৰ মাজত ৰে’লৰ সন্মুখত জঁপিয়াই আত্মহত্যা কৰিছিল। তেওঁ বাবু দাস নামৰ এজন যুৱকৰ সৈতে সম্পৰ্কত আছিল। আৰক্ষীৰ অনুসন্ধানত প্ৰকাশ পাইছিল যে দুয়ো প্ৰায় তিনি-চাৰি বছৰ ধৰি সম্পৰ্কত আছিল। যুৱতীগৰাকীৰ মৃতদেহ উদ্ধাৰ কৰাৰ পিছত আৰক্ষীয়ে প্ৰথমতে অপ্ৰাকৃতিক মৃত্যুৰ গোচৰ ৰুজু কৰিছিল। পিছত মৃতকৰ পৰিয়ালৰ অভিযোগৰ ভিত্তিত বাবুৰ পিতৃ-মাতৃ আৰু আন আত্মীয়সকলৰ বিৰুদ্ধে এটা গোচৰ ৰুজু কৰা হয়। মৃতকৰ পৰিয়ালে দাবী কৰিছিল যে তেওঁলোকে সৌম্যক বাৰে বাৰে সম্পৰ্কৰ পৰা ওলাই যাবলৈ কৈছিল। তেওঁক পঢ়াশুনাত মনোনিবেশ কৰিবলৈ কৈছিল। কিন্তু বাবুৰ পৰিয়ালৰ সদস্যসকলে এই সকলোবোৰত তেওঁক লিপ্ত কৰি ৰাখিছিল বুলি তেওঁলোকে অভিযোগ কৰিছিল।
পিছত আৰক্ষীৰ অনুসন্ধানত প্ৰকাশ পাইছিল যে ঘটনাটোৰ কেইদিনমান পূৰ্বে বাবুৰ তেওঁৰ প্ৰেমিকাৰ সৈতে তৰ্ক হৈছিল। মৃতকৰ পৰিয়ালে অভিযোগ কৰিছিল যে বাবুৰ মাতৃয়ে দুয়োৰে বিয়াত আপত্তি কৰিছিল। প্ৰেমিকাৰ পৰিয়ালে এইটোও অভিযোগ কৰিছিল যে তেওঁলোকে সৌম্যক অপমানো কৰিছিল। গোচৰটো প্ৰথমতে কলিকতা উচ্চ ন্যায়ালয়ত বিচাৰাধীন আছিল। তাত আদালতে বাবুৰ পৰিয়ালৰ সদস্যসকলৰ বিৰুদ্ধে নিৰ্দেশ দিছিল। কিন্তু তেওঁলোকে উচ্চতম ন্যায়ালয়ত আদেশটোক প্ৰত্যাহ্বান জনাইছিল। বিষয়টো ন্যায়াধীশ বিভি নাগাৰত্ন আৰু সতীশ চন্দ্ৰ শৰ্মাৰ বিচাৰপীঠৰ সন্মুখত শুনানিৰ বাবে আহে।
শীৰ্ষ ন্যায়ালয়ৰ দুই ন্যায়াধীশৰ বিচাৰপীঠে বাবুৰ পৰিয়ালৰ সদস্যসকলৰ বিৰুদ্ধে আত্মহত্যাৰ বাবে প্ৰৰোচিত কৰাৰ গোচৰ খাৰিজ কৰে। আদালতে কয় যে এগৰাকী মহিলাই তেওঁৰ সন্তানক তেওঁৰ প্ৰেমিকাৰ সৈতে বিয়া কৰাবলৈ সন্মত নহ’লেও, ইয়াক প্ৰত্যক্ষ বা পৰোক্ষভাৱে আত্মহত্যাৰ প্ৰৰোচনা বুলি ক’ব নোৱাৰি। আত্মহত্যাত প্ৰৰোচনাৰ ধাৰাটো যোগ দিবলৈ, আপোনাক এনে এক কাৰ্যৰ প্ৰাথমিক প্ৰমাণৰ প্ৰয়োজন যি মৃতকক সেই সিদ্ধান্ত ল’বলৈ বাধ্য কৰে।
উল্লেখযোগ্য যে যোৱা বছৰ বাংগালুৰুৰ এজন তথ্য প্ৰযুক্তি পেছাদাৰী অতুল সুভাষৰ মৃত্যুৰ পিছত তেওঁৰ শহুৰেকৰ ওপৰত আত্মহত্যাৰ বাবে প্ৰৰোচিত কৰাৰ অভিযোগ উত্থাপিত হৈছিল। অতুলৰ ঘটনাৰ পিছৰে পৰা সাম্প্ৰতিক সময়ত আত্মহত্যাৰ বাবে প্ৰৰোচিত কৰাৰ আন কেইবাটাও ঘটনা ঘটিছে। অৱশ্যে উচ্চতম ন্যায়ালয়ে পূৰ্বতে কেইবাবাৰো কৈছিল যে আত্মহত্যাৰ বাবে প্ৰৰোচিত কৰাৰ গোচৰ গ্ৰহণযোগ্য হ’ব পাৰে, কিন্তু কিছুমান ক্ষেত্ৰত এয়া গ্ৰাহ্য হ’ব নোৱাৰে।
