“বিগত বছৰৰ পোৱা-নোপোৱা, সফলতা-বিফলতা, আশা-নিৰাশাৰ মাজতে সকলোৱে আদৰণি জনাইছে নৱবৰ্ষ ২০২৫”
চাওঁতে চাওঁতে আৰু এটা বৰ্ষই বিদায় মাগিলে সময়ৰ বুকুৰ পৰা। কেলেণ্ডাৰৰ চন সলনি কৰি ভুমুকি মাৰিছে নতুন বছৰ ২০২৫ৰ নৱ সূৰুযে। বিগত বছৰৰ পোৱা-নোপোৱা, সফলতা-বিফলতা, আশা-নিৰাশাৰ মাজতে সকলোৱে আদৰণি জনাইছে নৱবৰ্ষ ২০২৫। বছৰ আগবাঢ়ি গৈ আছে, পৃথিৱীৰ আয়ুস বৃদ্ধি পাই আছে- লগতে আমিও কনিষ্ঠৰ পৰা জ্যেষ্ঠ, জ্যেষ্ঠৰ পৰা বৃদ্ধ অৱস্থালৈ গতি কৰি আছোঁ। এই বিশ্বই প্ৰতিটো বছৰতে নতুন নতুন অভিজ্ঞতাৰ সাক্ষী হৈ আহিছে, নতুন প্ৰযুক্তি, বিষয়, ধাৰাৰ মুখামুখি হৈ আহিছে।
নিশ্চিতভাৱে কোভিড পৰৱৰ্তী সময়ৰ বছৰ হিচাপে ২০২৪ বৰ্ষটোৱে পুনৰবাৰ ঠন ধৰি উঠিছে- বিভিন্ন ক্ষেত্ৰত। ইয়াকে মূলধন হিচাপে লৈ আমি এই নতুন বছৰটোত আগবাঢ়িব লাগিব এক বিকাশমুখী যাত্ৰাত। কৰ্ম-সংস্কৃতি আৰু নতুনত্বৰ অন্বেষণৰে আমি আগন্তুক বছৰটোক আমাৰ জীৱনৰ বাবে এক উল্লেখযোগ্য বছৰ হিচাপে গঢ়িবলৈ চেষ্টা কৰিব লাগিব। এই ক্ষেত্ৰত পূৰ্বৰ বছৰৰ অভিজ্ঞতা আৰু বিফলতাবোৰক আমি নতুন ৰূপত প্ৰাপ্যৰ এক নতুন স্তৰলৈ উন্নীত কৰিব লাগিব। কনিষ্ঠসকলে জ্যেষ্ঠজনৰ পৰা আশীৰ্বাদ-অভিজ্ঞতা অৰ্জন কৰিব লাগিব। জ্যেষ্ঠসকলেও জীৱনৰ বাটত লাভ কৰা বিভিন্ন অভিজ্ঞতাৰ সংমিশ্ৰণত এক নতুন দিশৰ উন্মেষ ঘটাব লাগিব।
জীৱনৰ বাটত ঘাত-প্ৰতিঘাত অৱধাৰিত। সেইবোৰক কাটি কৰি থৈ আগবাঢ়ি যাব পৰাটোহে হৈছে প্ৰকৃত সাৰ্থকতা। এইক্ষেত্ৰত আমি মানসিক দৃঢ়তা আৰু জ্ঞানৰ পৰিসৰ বৃদ্ধিৰে অগ্ৰসৰ হ’ব লাগিব। ভৱিষ্যত প্ৰজন্মৰ বাবে বৰ্তমানৰ বিশ্ব এক কৌতুহলৰ বিষয়। বিশেষকৈ প্ৰযুক্তিৰ চমকে বিশ্বক বহু দূৰ আগবঢ়াই লৈ গৈছে। কিন্তু প্ৰযুক্তিৰ এই ঊৰ্ধ্বগামী দিনতো আমি আমাৰ শিপাক পাহৰিব নালাগিব। আমাৰ আধ্যাত্মিকতা, আমাৰ জাতীয়তাবোধ, আমাৰ নৈতিকতা এই সকলোবোৰ বিকাশমুখী যাত্ৰাত একেলগে আগবঢ়াই নিব লাগিব। তেতিয়াহে আমি প্ৰকৃত উন্নয়ন লাভ কৰা বুলি গৌৰৱবোধ কৰিব পাৰিম। উন্নতিৰ জখলাত বগাবলৈ যাওঁতে ভৰিৰ তলৰ মাটিখিনি হেৰুৱাব নালাগিব। অন্যথা আমি কিবা প্ৰকাৰে পিছলি পৰিব লাগিলে একেবাৰে পাতাললৈ গতি কৰিম।
২০২৫ বৰ্ষ হওক সকলোৰে বাবে এক আনন্দ, শান্তি, সুখ আৰু সমৃদ্ধিৰ বছৰ। সবাৰোপৰি এই বৰ্ষটো হওক মানৱ কল্যাণৰ বাবে উছৰ্গিত এটা বছৰ, মানৱতাৰ জয়গান গোৱা এটা বছৰ। নতুন বছৰটোত সকলোৰে সুস্থ মানসিকতা আৰু সু-স্বাস্থ্য কামনা কৰি ‘আছাম টাইমছ পোষ্ট’ৰ তৰফৰ পৰা আন্তৰিক শুভেচ্ছা জ্ঞাপন কৰিলোঁ।
