সংবিধানৰ প্ৰস্তাৱনাত ‘সমাজবাদ’ আৰু ‘ধৰ্মনিৰপেক্ষতা’ শব্দক সমৰ্থন উচ্চতম ন্যায়ালয়ৰ (Supreme Court) । সোমবাৰে মুখ্য ন্যায়াধীশ সঞ্জীৱ খান্না আৰু ন্যায়াধীশ পিভি সঞ্জয় কুমাৰৰ উচ্চতম ন্যায়ালয়ৰ বিচাৰপীঠে কয় যে সংসদে ৩৬৮ নং অনুচ্ছেদৰ অধীনত সংবিধান সংশোধন কৰিব পাৰে। কিন্তু সেই সংশোধনীত সংবিধানৰ মৌলিক গাঁথনি বা ‘Basic structure’ অনুসৰণ কৰিব লাগিব।
উল্লেখ্য যে ১৯৭৬ চনত তদানীন্তন প্ৰধানমন্ত্ৰী ইন্দিৰা গান্ধীৰ কংগ্ৰেছ চৰকাৰে ৪২ সংখ্যক সংবিধান সংশোধনীৰ জৰিয়তে প্ৰস্তাৱনাত ‘সমাজবাদী’ আৰু ‘ধৰ্মনিৰপেক্ষতা’ শব্দ দুটা অন্তৰ্ভুক্ত কৰিছিল। ভাৰত ৰাষ্ট্ৰৰ পৰিচয় হিচাপে ইতিমধ্যে সংবিধানৰ প্ৰস্তাৱনাত উল্লেখ কৰা হৈছিল- সাৰ্বভৌম, গণতান্ত্ৰিক আৰু গণৰাজ্য এই তিনিটা শব্দ।
১৯৭৬ চনত তাৰ লগত এই নতুন শব্দ দুটা সংযোজন কৰা হয়।Vকিন্তু উচ্চতম ন্যায়ালয়ত এই শব্দ দুটাৰ অন্তৰ্ভুক্তিক লৈ প্ৰশ্ন উত্থাপন কৰা হৈছিল। সোমবাৰে এই গোচৰসমূহ একত্ৰিত কৰি উচ্চতম ন্যায়ালয়ত শুনানি গ্ৰহণ কৰা হয়।
গোচৰকাৰীসকলৰ ভিতৰত উল্লেখযোগ্য হʼল বিজেপিৰ প্ৰাক্তন সাংসদ সুব্ৰমণিয়ম স্বামী, সমাজকৰ্মী বলৰাম সিং আৰু অধিবক্তা অশ্বিনী উপাধ্যায়। ৪২ সংখ্যক সংশোধনীৰ ফলত মূল সংবিধানখন বিকৃত কৰা হৈছে বুলি বিবাদীসকলে যুক্তি দিছিল।
সংবিধান সভাৰ আলোচনাত এই শব্দ দুটা প্ৰস্তাৱনাৰ বাহিৰত ৰখাৰ সিদ্ধান্ত লোৱা বুলিও দাবী কৰে সংবিধান প্ৰণয়কসকলে। কিন্তু উচ্চতম ন্যায়ালয়ে এই সকলোবোৰ যুক্তি নাকচ কৰে। উচ্চতম ন্যায়ালয়ে কয় যে সংবিধানে সংবিধান সংশোধনৰ বাবে সংসদক ক্ষমতা প্ৰদান কৰিছে।
ইয়াৰ উপৰি উচ্চতম ন্যায়ালয়ে এইটোও পৰ্যবেক্ষণ কৰে যে এই দুটা শব্দ বছৰ বছৰ ধৰি বহু ন্যায়িক পৰীক্ষাৰ মাজেৰে পাৰ হৈ আহিছে। ১৯৯৪ চনৰ এছ আৰ বোম্মাই গোচৰৰ কথা উল্লেখ কৰি উচ্চতম ন্যায়ালয়ে কয় যে এই দুটা শব্দ সংবিধানৰ মৌলিক গাঁথনিৰ পৰিপন্থী নহয়।
