মণিপুৰ (Manipur)ত অপহৰণ কৰি নি হত্যা (Kidnapped and murdered) কৰা মেইটেই পৰিয়ালটোৰ ছয়গৰাকী সদস্যৰ মৰণোত্তৰ পৰীক্ষাৰ প্ৰতিবেদন (Post-mortem report of six members) পোহৰলৈ আহিছে। তেওঁলোকক কেনেদৰে অত্যাচাৰ কৰি হত্যা কৰা হৈছিল তাৰ সবিশেষ প্ৰতিবেদনত প্ৰকাশ পাইছে। দুবছৰীয়া শিশুটিৰ মূৰত গুলীৰ আঘাত, চকু দুটা উলিয়াই পেলোৱা হৈছিল। মাতৃ আৰু আইতাকক একাধিক গুলীৰ আঘাত কৰি নিৰ্যাতন চলোৱা হৈছিল।
কিছুদিন পূৰ্বে মণিপুৰৰ জিৰিবাম জিলাৰ এটি মেইটেই পৰিয়ালৰ ছয়গৰাকী সদস্যক অপহৰণ কৰি হত্যা কৰাৰ অভিযোগ উত্থাপন হৈছিল। এই অভিযোগ কুকি উগ্ৰপন্থী সংগঠনৰ দিশে। অসম সীমান্তৰ সমীপৱৰ্তী অঞ্চলটোৰ পৰা অপহৰণ কৰা হৈছিল ৬ গৰাকী লোকক। পিছত জিৰিবামত নদীত ওপঙি থকা শিশু আৰু বৃদ্ধাৰ মূণ্ডবিহীন মৃতদেহ উদ্ধাৰ হয়। সেয়া আছিল পৰিয়ালটোৰ ল’ৰা-ছোৱালী আৰু আইতাকৰ মৃতদেহ। উক্ত ছয়গৰাকীৰ মৰণোত্তৰ পৰীক্ষাৰ প্ৰতিবেদন আৰক্ষীয়ে লাভ কৰিছে। শিশুটিৰ পিতৃয়ে লাভ কৰে তিনিখন প্ৰতিবেদন। বাকী তিনিজনৰ প্ৰতিবেদন এতিয়াও পোৱা নাই বুলিও তেওঁ কয়।
দুবছৰীয়া শিশুটিৰ মৰণোত্তৰ পৰীক্ষাৰ প্ৰতিবেদনত কোৱা হৈছে যে তেওঁৰ মূৰৰ মাজভাগত গুলী লাগিছিল। সোঁ চকুটো ফুলি উঠিছিল। তদুপৰি শিশুটিৰ গোটেই শৰীৰত একাধিক ছুৰীৰ আঘাত পোৱা গৈছে। বুকু আৰু হাততো আঘাতৰ চিন। শিশুটিৰ মাতৃৰ বয়স ২৫ বছৰ। তেওঁৰ বুকুত তিনিটা আৰু নিতম্বত এটা গুলীৰ আঘাত। আনহাতে, ৬০ বছৰীয়া আইতাকৰ মৃতদেহত মুঠ ৫টা গুলী উদ্ধাৰ হয়। তেওঁৰ মূৰত এটা, বুকুত দুটা, পেটত এটা আৰু হাতত এটা গুলী লাগিছিল।
পৰিয়ালটোৰ আন তিনিজন সদস্যৰ ভিতৰত আছে এগৰাকী মহিলা, এগৰাকী আঠ বছৰীয়া কন্যা আৰু এটা আঠমহীয়া কেঁচুৱা। অভিযোগ অনুসৰি, পৰিয়ালটোৱে এতিয়াও তেওঁলোকৰ মৰণোত্তৰ পৰীক্ষাৰ প্ৰতিবেদন লাভ কৰা নাই।
