ASSAM TIMES POST
আয়তনৰ দিশত দেশখন অতি ক্ষুদ্ৰ৷ তেল আমদানি বন্ধ কৰিলেও ভাৰতৰ বিৰুদ্ধে কোনো প্ৰতিহিংসামূলক পদক্ষেপত সমৰ্থন নকৰে মালয়েছিয়াই৷ এনেদৰে উল্লেখ কৰিছে মালয়েছিয়াৰ প্ৰধানমন্ত্ৰী মহাথিৰ মহম্মদে৷
সোমবাৰে মালয়েছিয়াৰ প্ৰধানমন্ত্ৰী মহাথিৰ মহম্মদে কয়, প্ৰতিহিংসা চৰিতাৰ্থ কৰাৰ কাৰণে আমি অতি ক্ষুদ্ৰ৷ এই কাৰণেই নৰেন্দ্ৰ মোডীৰ চৰকাৰৰ বিৰুদ্ধে কোনো ধৰণৰ প্ৰতিহিংসামূলক বাণিজ্যিক পদক্ষেপ নলয় মালয়েছিয়াই৷ সেয়ে এই বিষয়টো মোকাবিলা কৰিবলৈ তেওঁ আন উপায় বিচাৰিব৷ সেই কথাত প্ৰধানমন্ত্ৰীজনে গুৰুত্ব দিছে৷
উল্লেখ্য যে ইন্দোনেছিয়া আৰু মালয়েছিয়াৰ পৰা ভাৰতে প্ৰতি বছৰে ৯০ লাখ টন তেল আমদানি কৰে৷ যোৱা বছৰ মালয়েছিয়াৰ পৰা সৰ্বাধিক তেল আমদানি কৰিছিল৷ ২০১৯ চনত ভাৰতে ৪৪ লাখ টন তেল কিনিছিল৷ কেইমাহমানৰ আগতে ৰাজনৈতিক কাৰণত বাণিজ্যিক সৰ্ম্পক ব্যাহত হয়৷ কাশ্মীৰ বিষয় আৰু নাগৰিকত্ব আইন লৈ বিশ্ব মঞ্চত নৰেন্দ্ৰ মোডী চৰকাৰৰ বিৰুদ্ধে সম্প্ৰতি সৰৱ হৈ পৰিছে মালয়েছিয়াৰ প্ৰধানমন্ত্ৰী৷
ছেপ্তেম্বৰ মাহত ৰাষ্ট্ৰসংঘৰ সাধাৰণ সভাত মালয়েছিয়াৰ প্ৰধানমন্ত্ৰীজনে দাবী কৰিছিল যে কাশ্মীৰৰ ভূখণ্ড ভাৰতে জোৰ কৰি দখল কৰি ৰাখিছে৷ ইয়াৰ পাছত যোৱা ডিচেম্বৰ মাহত তেওঁ দাবী কৰিছিল যে নাগৰিকত্ব আইনৰ বাবে ভাৰতত নাগৰিকৰ মৃত্যু হৈছে৷ আনকি নাগৰিকত্ব আইন ‘চূড়ান্ত অন্যায়’ বুলি তেওঁ উল্লেখ কৰি দাবী কৰিছিল ‘মুছলিমক নাগৰিকত্বৰ পৰা বঞ্চিত কৰিবৰ কাৰণেই ভাৰত চৰকাৰে এই পদক্ষেপ লৈছে৷’ এখন দেশৰ অভ্যন্তৰিণ বিষয়ত মালয়েছিয়াই মন্তব্য কৰাত ভাৰতে সৰ্ম্পক ছেদ কৰি দিছিল৷
মালয়েছিয়াৰ প্ৰধানমন্ত্ৰীৰ এনে মন্তব্যত দুয়োখন দেশৰ সৰ্ম্পকত প্ৰভাৱ পৰিবলৈ আৰম্ভ হয়৷ আনহাতে মালয়েছিয়াৰ বিৰ্তকিত ধৰ্দগুৰু জাকেৰ নায়কৰ স্থায়ী নাগৰিকত্ব প্ৰত্যাহাৰত ৰাজি নাছিল মালয়েছিয়া৷ ফলত সকলো মিলি দ্বিপাক্ষিক সৰ্ম্পকত প্ৰভাৱ পৰে৷
