হাৰিয়ানা বিধানসভা নিৰ্বাচনৰ (Haryana Election) ভোটগ্ৰহণ শনিবাৰে পুৱা ৭ বজাৰ পৰা আৰম্ভ হৈছে। এই প্ৰক্ৰিয়া সন্ধিয়া ৬ বজালৈকে চলিব। ৯০ খন আসনৰ হাৰিয়ানা বিধানসভা নিৰ্বাচন এটা পৰ্যায়তে অনুষ্ঠিত হৈছে। অহা ৮ অক্টোবৰ, মঙলবাৰে ফলাফল প্ৰকাশ পাব।
নিৰ্বাচনৰ বাবে পুৱাৰে পৰা সকলো ভোটকেন্দ্ৰতে কঠোৰ নিৰাপত্তা ব্যৱস্থা গ্ৰহণ কৰা হৈছে। আৰক্ষীৰ লগতে অৰ্ধসামৰিক বাহিনীকো নিৰাপত্তাৰ দায়িত্ব দিয়া হৈছে। ৩০ হাজাৰৰো অধিক আৰক্ষী জোৱান আৰু কেন্দ্ৰীয় বাহিনীৰ ২২৫টা কোম্পানীক ভোটগ্ৰহণৰ বাবে নিয়োগ কৰা হৈছে।
আনহাতে, প্ৰতিটো বুথত ৱেবকাষ্টিঙৰো ব্যৱস্থা আছে। এই নিৰ্বাচনত মুঠ ভোটাৰৰ সংখ্যা দুই কোটিতকৈও অধিক। ইয়াৰে ভিতৰত মহিলা ভোটাৰৰ সংখ্যা প্ৰায় ৯৬ লাখ। নিৰ্বাচনত অৱতীৰ্ণ হৈছে ১০৩১ গৰাকী প্ৰাৰ্থী। মুঠ ভোটকেন্দ্ৰৰ সংখ্যা হৈছে ২০,৬২৯টা।
উল্লেখ্য যে বিগত ১০ বছৰে হাৰিয়ানাত বিজেপি ক্ষমতাত আছে। গেৰুৱা শিবিৰৰ লক্ষ্য এইবাৰ হেট্ৰিক অৰ্জন কৰা। কিন্তু কংগ্ৰেছে এইবাৰ কঠোৰ যুঁজ দিছে।
আনহাতে, হাৰিয়ানাৰ জাট প্ৰধান অঞ্চলত প্ৰাক্তন মুখ্যমন্ত্ৰী ওমপ্ৰকাশ চৌতালাৰ আই এন এলডি (ভাৰতীয় জাতীয় লোকদল) আৰু তেওঁৰ নাতি তথা প্ৰাক্তন উপ-মুখ্যমন্ত্ৰী দুষ্মন্ত চৌতালাৰ দল জে জে পি (জননায়ক জনতা পাৰ্টি)ৰ প্ৰতিদ্বন্দ্বিতা অব্যাহত আছে।
এই নিৰ্বাচনত উল্লেখযোগ্য প্ৰাৰ্থীৰ ভিতৰত মুখ্যমন্ত্ৰী নয়ব সিং চাইনী (বিজেপি, লাডৱা), প্ৰাক্তন মুখ্যমন্ত্ৰী তথা বিৰোধী দলৰ নেতা ভূপেন্দ্ৰ সিং হুদা (কংগ্ৰেছ, গড়ী চাম্পলা-কিলোই), প্ৰাক্তন উপ-মুখ্যমন্ত্ৰী দুষ্মন্ত চৌতালা (জেজেপি, উচানা কলন) ইত্যাদি অৱতীৰ্ণ হৈছে। আনহাতে, জুলানা সমষ্টিত কংগ্ৰেছৰ টিকটত প্ৰতিদ্বন্দ্বিতা কৰিছে অলিম্পিয়ান বিনেশ ফ’গাটে।
