খোৱা পানীৰ বটলত শেলুৱৈজাতীয় পদাৰ্থৰ বাবে জাতীয়বাদী যুৱ ছাত্ৰ পৰিষদে সোমবাৰে দিনৰ ২ মান বজাত জিলা আয়ুক্তলৈ এক স্মাৰক পত্ৰ প্ৰেৰণ কৰে ৷ বোকাজান মহকুমা এলেকাত কম সময়ৰ ভিতৰতে কাঠফুলাৰ দৰে গঢ় লৈ উঠা একাংশ খোৱা পানীৰ ফেক্টৰীত উৎপাদিত খোৱা পানী সমূহৰ বিশুদ্ধতাক লৈ আশংকা প্ৰকাশ কৰি আজি কাৰ্বি আংলং জিলা আয়ুক্তলৈ এখনি স্মাৰক পত্ৰ প্ৰেৰণ কৰে অসম জাতীয়তাবাদী যুৱ ছাত্ৰ পৰিষদৰ বোকাজান আঞ্চলিক সমিতিয়ে।
সভাপতি চানদীপ শইকীয়া আৰু সম্পাদক নিলয় দুৱৰা স্বাক্ষৰিত স্মাৰক পত্ৰত উল্লেখ কৰা অনুসৰি বোকাজান মহকুমাৰ খটখটী থানাৰ অন্তৰ্গত লংকাথাৰ বস্তিস্থিত এছ কে এন্টাৰপ্ৰাইজত উৎপাদিত এক লিটাৰৰ পানীৰ বটলত শেলুৱৈ জাতীয় ডাঠ পদাৰ্থ উপঙি থকা দেখিবলৈ পোৱা গৈছে। এনে দূষিত পানী সেৱন কৰাৰ ফলত জনস্বাস্থ্যৰ প্ৰতি আহিবলগীয়া ভাবুকিৰ প্ৰতি লক্ষ্য ৰাখি ইয়াৰ বিৰুদ্ধে বিহিত ব্যৱস্থা গ্ৰহণৰ দাবী জনায়।
