পুনৰ উত্তপ্ত মণিপুৰ (Manipur Violence)। এই উত্তপ্ত পৰিস্থিতিৰ বাবে মণিপুৰত বন্ধ কৰি দিয়া হৈছে ইণ্টাৰনেট সেৱা (Internet services suspended in Manipur)। মঙলবাৰে বিয়লি ৩ বজাৰ পৰা আগন্তুক পাঁচ দিনৰ বাবে (১৫ ছেপ্টেম্বৰৰ বিয়লি ৩ বজালৈ) সমগ্ৰ ৰাজ্যত ইণ্টাৰনেট সংযোগ বন্ধ কৰাৰ সিদ্ধান্ত লোৱা হৈছে। মণিপুৰ চৰকাৰে মঙলবাৰে এক নিৰ্দেশনা জাৰি কৰি এই কথা প্ৰকাশ কৰে। চৰকাৰে এই নিৰ্দেশনাত কয় যে অশান্তিৰ পৰিৱেশত ছ’চিয়েল মিডিয়াত বিভিন্ন উৰাবাতৰি বিয়পি পৰিছে।
তদুপৰি, তিনিখন জিলাত প্ৰশাসনে জাৰি কৰিছে সান্ধ্যআইন (Curfew in three districts)। ইম্ফল পূব, ইম্ফল পশ্চিম আৰু থৌবাল জিলাত ছেপ্টেম্বৰৰ আৰম্ভণিৰে পৰা এটাৰ পিছত আন এটাকৈ সংঘটিত ঘটনাৰ ফলত অশান্তি ৰোধ কৰিবলৈ জাৰি কৰা হৈছে সান্ধ্যআইন। ইয়াৰ পূৰ্বে ইম্ফল পূব আৰু পশ্চিমৰ জিলা দণ্ডাধীশে পুৱা ৫ বজাৰ পৰা নিশা ১০ বজালৈ সান্ধ্যআইন শিথিল কৰাৰ কথা ঘোষণা কৰিছিল। অৱশ্যে আইন-শৃংখলাৰ পৰিস্থিতি নিয়ন্ত্ৰণত ৰাখিবলৈ মঙলবাৰে পুৱা ১১ বজাৰ পৰা পূৰ্বৰ নিৰ্দেশনা বাতিল কৰা হৈছে। জিলা দুখনৰ জিলা দণ্ডাধীশসকলে নতুন গাইডলাইন জাৰি কৰি এই কথা কয়।
মঙলবাৰে পুৱা ১১ বজাৰ পৰা দুয়োখন জিলাতে সম্পূৰ্ণ সান্ধ্যআইন ঘোষণা কৰা হৈছে। অৱশ্যে জৰুৰীকালীন সেৱাসমূহ সান্ধ্যআইনৰ আওতাৰ বাহিৰত ৰখা হৈছে। ভাৰতীয় নাগৰিক সুৰক্ষা সংহিতাৰ ১৬৩(২) ধাৰাত দেওবাৰৰ পৰা থৌবাল জিলাতো জাৰি কৰা হৈছে কাৰ্ফিউ। জিলাখনত পাঁচজন বা তাতকৈ অধিক লোকৰ সমাৱেশ সম্পূৰ্ণৰূপে নিষিদ্ধ কৰা হৈছে।
উল্লেখ্য যে ছেপ্টেম্বৰ মাহত মণিপুৰৰ পৰিস্থিতি পুনৰ উত্তপ্ত হৈ পৰে। যাৰ বাবে নিৰাপত্তা বাহিনী সষ্টম হৈ পৰিছে। ড্ৰোন আক্ৰমণ, মিছাইল আক্ৰমণৰ উপৰি আৰক্ষীৰ অস্ত্ৰভাণ্ডাৰ লুট কৰাৰ চেষ্টা চলোৱা হৈছে। শেহতীয়া এই ঘটনাবোৰত কমেও ৮ জন লোকৰ মৃত্যু হৈছে। এই হিংসাত্মক ঘটনাত আহত হয় ১২ জনতকৈ অধিক লোক। সোমবাৰে উদ্ধাৰ হয় এজন অৱসৰপ্ৰাপ্ত জোৱানৰ মৃতদেহ। দুদিন পূৰ্বে তেওঁক অপহৰণ কৰা বুলি অভিযোগ উঠিছে। আৰক্ষীৰ সূত্ৰ অনুসৰি, ইম্ফল পশ্চিম আৰু কাংপকপি জিলাৰ সীমান্তৱৰ্তী অঞ্চলৰ পৰা অৱসৰপ্ৰাপ্ত জোৱানজনৰ মৃতদেহ উদ্ধাৰ হৈছে।
আনহাতে, মণিপুৰত উদ্ভৱ হোৱা এই অস্থিৰ পৰিস্থিতিৰ প্ৰতিবাদত ৰাজপথলৈ ওলাই আহিছে ছাত্ৰ-ছাত্ৰীসকল। এই হিংসাৰ বিৰুদ্ধে আৰু বিদ্যালয় বন্ধ কৰাৰ সিদ্ধান্তৰ বিৰুদ্ধে ছাত্ৰ-ছাত্ৰীসকলে প্ৰতিবাদ সাব্যস্ত কৰে।
